Women's T20 World Cup માં ભારતની હાર અને હરમનપ્રીતની નિરાશા
ભારતીય ટીમ માટે મહિલા T20 વર્લ્ડ કપ 2026 ની આ 18મી મેચ ઘણી નિરાશાજનક રહી છે. ટોસ જીતીને પહેલા બેટિંગ કરવાનો નિર્ણય લેનાર ભારતે 20 ઓવરમાં 7 વિકેટ ગુમાવી 158 રન બનાવ્યા. દક્ષિણ આફ્રિકાએ લક્ષ્યનો પીછો કરતા 19.1 ઓવરમાં 4 વિકેટના નુકસાને 161 રન બનાવી વિજય મેળવ્યો. મેચ બાદ કેપ્ટન હરમનપ્રીત કૌરે કબૂલ્યું કે ટીમ કેટલીક નિર્ણાયક તકોનો લાભ ઉઠાવવામાં નિષ્ફળ રહી છે. આ હાર છતાં કેપ્ટને બાકી રહેલી મેચો માટે સકારાત્મક અભિગમ જાળવી રાખવા પર ભાર મૂક્યો.
Women's T20 World Cup: હાર માટે શું કારણ?
ભારતીય બોલરોએ બનાવેલા 158 રનના સ્કોરનો બચાવ કરતી વખતે ફિલ્ડિંગમાં અનેક ખામીઓ જોવા મળી હતી. ફિલ્ડરોએ દક્ષિણ આફ્રિકાના ખેલાડીઓને મહત્વના જીવનદાન આપ્યા. સબસ્ટિટ્યુટ ફિલ્ડર રાધા યાદવે મેરિઝાનને 25 અને 65 રનના સ્કોર પર કેચ છોડી જીવનદાન આપ્યા. મેરિઝાને આ તકોનો ભરપૂર ફાયદો ઉઠાવી 81 રન બનાવી ટીમ માટે જીત સુનિશ્ચિત કરી. કેપ્ટન હરમનપ્રીત કૌરે સ્વીકાર્યું કે આ સ્તરે આવી ભૂલો ખૂબ ભારે પડે છે અને પ્રતિસ્પર્ધી કોઈ પણ છૂટ આપતા નથી.
બોલરોનું પ્રદર્શન અને આગામી પડકારો
આપને જણાવી દઈએ કે, મેચમાં શ્રી ચારણી અને શેફાલી વર્માએ બોલિંગમાં ઉત્કૃષ્ટ પ્રદર્શન કર્યું. શ્રી ચારણીએ 4 ઓવરમાં 24 રન આપી 3 વિકેટ મેળવી હતી. શેફાલી વર્માએ 4 ઓવરમાં 22 રન આપી 1 વિકેટ ઝડપી લીધી હતી. કેપ્ટન હરમનપ્રીતે આ બંને ખેલાડીઓના પ્રદર્શનના વખાણ કર્યા હતા. તો અન્ય બોલરો તરફથી સારુ પ્રદર્શન ન મળતા તેણે ચિંતા વ્યક્ત કરી છે.
સ્પિનરો અંગે કેપ્ટનનો દ્રષ્ટિકોણ
પીચની પરિસ્થિતિને ધ્યાનમાં રાખીને હરમનપ્રીત કૌરે સ્પિનરોની ભૂમિકાને મહત્વની ગણાવી. બોલિંગ દરમિયાન ટર્ન મળી રહ્યો હતો, તેથી ફિંગર સ્પિનરોનો ઉપયોગ વધુ અસરકારક સાબિત થયો. શેફાલી અને શ્રી ચારણીએ શાનદાર કામગીરી કરી છે. કેપ્ટને બાકીના સ્પિનરોને આવી પીચો પર વધુ ચતુરાઈથી બોલિંગ કરવાનું સૂચન આપ્યું. ટીમ મેનેજમેન્ટ હવે બેસશે અને બાકીની મેચો માટે બ્લૂપ્રિન્ટ તૈયાર કરશે જેથી સેમીફાઇનલની આશા જીવંત રહે.
ભારતીય ટીમની આગામી મેચ અને સ્થળ
નોંધનીય છે કે, ભારતના બે મેચ બાકી છે, ભારતીય ટીમ 25 જૂને બાંગ્લાદેશ સામે ટકરાશે, ત્યારબાદ 28 જૂને ઓસ્ટ્રેલિયા સામે ટકરાશે. ભારતીય કેપ્ટન હરમનપ્રીતે કહ્યું, "અમારી પાસે હજુ બે મેચ બાકી છે. હવે તે મેચો વિશે વિચારવાનો સમય છે. આગામી મેચ પહેલા અમારી પાસે હજુ બે કે ત્રણ દિવસ બાકી છે. અમે બેસીને શું કરવું તે વિશે વિચારીશું અને તે મુજબ અમારી પ્લેઇંગ ઇલેવન પસંદ કરીશું."
આ પણ વાંચો--- IND W vs SA W : સાઉથ આફ્રિકાનો ભારત સામે 6 વિકેટે વિજય, કેપ્ટન મારીજાને કરી તોફાની ઈનિંગ
