Studio on Wheels: આપઘાતનો વિચાર છોડી 200 બાળકોના માવતર બન્યા, પૂજાબેન પટેલની પ્રેરણાદાયી સફર
- Studio on Wheels માં Prayas Parents Association ના પ્રમુખ પૂજાબેન પટેલ સાથે સંવાદ
- આપઘાતનો વિચાર છોડી 200 બાળકોના માવતર બન્યા
- સંતાનની દિવ્યાંગતા બની સેવાનું નિમિત્ત
- 'પ્રયાસ' સંસ્થા જ્યાં મનોદિવ્યાંગ બાળકોને મળે છે નિઃશુલ્ક હૂંફ
Studio on Wheels: સ્ટુડિયો ઓન વ્હીલ્સ (Studio on Wheels) ના વિશેષ એપિસોડમાં જેડી ગુજરાતી (JD Gujarati) એ એક એવી પ્રેરણાદાયી વ્યક્તિની મુલાકાત લીધી છે, જેની વાત સાંભળીને આંખમાં આંસુ અને હૃદયમાં હિંમત બંનેનો અનુભવ થાય છે. આ વાર્તા છે રાજકોટની સંસ્થા પ્રયાસ પેરેન્ટ્સ એસોસિએશન (Prayas Parents Association) ના પ્રમુખ પૂજાબેન પટેલની.
Studio on Wheels માં Prayas Parents Association ના પ્રમુખ પૂજાબેન પટેલ સાથે સંવાદ
પૂજાબેન પટેલની સફર એક સામાન્ય ગૃહિણી તરીકે શરૂ થઈ હતી, પરંતુ તેમના પોતાના સંતાનનો ઓટિઝમ અને મનોદિવ્યાંગતા સાથેનો જન્મ તેમના જીવનનો સૌથી મોટો વળાંક સાબિત થયો. શરૂઆતના આઘાતમાં તૂટી ગયેલા પૂજાબેને એક સમયે આપઘાતનો પ્રયાસ પણ કર્યો હતો. પરંતુ તે અંધકારમાંથી બહાર આવીને તેમણે મનોદિવ્યાંગ બાળકો માટે કામ કરવાનો મક્કમ નિર્ધાર કર્યો. તેમણે માત્ર બાળકોને સાચવવાનું જ કામ ન કર્યું, પરંતુ આ વિષયને ઊંડાણપૂર્વક સમજવા માટે સ્પેશિયલ એજ્યુકેશનમાં બી.એડ., એમ.એડ. કર્યું અને હાલ તેઓ પીએચડી (PhD) કરી રહ્યા છે.
પ્રયાસ સંસ્થા અને તેની પ્રવૃત્તિઓ
વર્ષ 2010 થી કાર્યરત આ સંસ્થામાં હાલ 5 વર્ષથી લઈને 58 વર્ષ સુધીના 200 જેટલા મનોદિવ્યાંગ બાળકો અને વ્યક્તિઓ એક જ છત નીચે શિક્ષણ અને હૂંફ મેળવે છે. અહીં ડાઉન સિન્ડ્રોમ (Down Syndrome), સેરેબ્રલ પાલ્સી (Cerebral Palsy) અને ઓટિઝમ જેવી વિવિધ સ્થિતિ ધરાવતા બાળકોને તાલીમ આપવામાં આવે છે. પૂજાબેને મનોદિવ્યાંગ (Intellectual Disability) શબ્દ પ્રચલિત કર્યો, જેથી આ બાળકોને સામાન્ય શારીરિક વિકલાંગતાથી અલગ ઓળખ મળી શકે.
નમસ્કાર દર્શક મિત્રો, 'Studio on Wheels' ના આ વિશેષ એપિસોડમાં આજે એક એવી ગાથા છે જે તમારી આંખમાં આંસુ અને હૃદયમાં હિંમત બંને લાવી દેશે.
આજે JD Gujarati મુલાકાત લઈ રહ્યા છે Rajkot ની સંસ્થા Prayas Parents Association ના પ્રમુખ Pujaben Patel ની. આ માત્ર એક સંસ્થાની વાત નથી, પણ એક… pic.twitter.com/JkVJtGYSK3— Gujarat First (@GujaratFirst) May 9, 2026
ઓટિઝમ અને જાગૃતિ
પૂજાબેને ઓટિઝમ જેવી ગંભીર સમસ્યા વિશે વાત કરતા જણાવ્યું કે આ એક નોન-વિઝિબલ ડિસેબિલિટી (Non-visible Disability) છે. એટલે કે, બાળક દેખાવમાં સામાન્ય હોવા છતાં તેની વર્તણૂક અલગ હોય છે. વાલીઓ ઘણીવાર શરૂઆતના વર્ષોમાં આ ઓળખી શકતા નથી. યોગ્ય સમયે ઓળખ અને યોગ્ય તાલીમ એ જ આ સમસ્યાનો એકમાત્ર ઈલાજ છે.
માનવતાનું ઉદાહરણ
આજની મોંઘવારીના યુગમાં પણ, માનવતાના ઉત્તમ ઉદાહરણ રૂપે આ સંસ્થામાં એક પણ રૂપિયાનો ચાર્જ (Zero Charges) લીધા વગર બાળકોની સંભાળ અને તાલીમ આપવામાં આવે છે. રાજકોટ મહાનગરપાલિકા દ્વારા ફાળવવામાં આવેલા બિલ્ડિંગમાં આ સેવાયજ્ઞ અવિરત ચાલી રહ્યો છે.
વાલીઓ અને સમાજને પ્રેરણાદાયી સંદેશ
પૂજાબેનનું માનવું છે કે, આવા બાળકોને ક્યારેય તરછોડો નહીં, તેમનો સ્વીકાર કરો. તેમના મતે, જે દિવસે માતા-પિતા પોતાના દિવ્યાંગ બાળકનો જેવો છે તેવો સ્વીકાર કરી લેશે, તે દિવસે તેઓ અડધી જંગ જીતી જશે. ઈશ્વરે તમને સક્ષમ સમજીને જ આ વિશેષ બાળકની જવાબદારી સોંપી છે તેમ માનીને આગળ વધવું જોઈએ. આમ પોતાના વ્યક્તિગત દુઃખને સેવામાં પરિવર્તિત કરી પૂજાબેને સાબિત કરી દીધું છે કે સેવા જ પરમો ધર્મ છે. પ્રયાસ સંસ્થા આજે એવા અનેક વાલીઓ માટે આશાનું કિરણ છે જેઓ જીવનના પડકારો સામે હિંમત હારી રહ્યા છે.
આ પણ વાંચો: Studio On Wheels: કમિશનર બંછાનિધિ પાનીએ અમદાવાદના સર્વાંગી વિકાસ માટેનો નવો રોડમેપ કર્યો રજૂ