Studio on Wheels Vadodara: ડૉ. વિજયભાઈ શાહ સાથે ખાસ મુલાકાત, જાણો 8,000 પોસ્ટમોર્ટમનું કડવું સત્ય!

ફોરેન્સિક સાયન્સના જ્ઞાતા અને 8,000 કેસનો અનુભવ

1989માં અમદાવાદની પ્રતિષ્ઠિત BJ મેડિકલ કોલેજમાંથી ફોરેન્સિક મેડિસિનનો અભ્યાસ પૂર્ણ કરનાર ડૉ. વિજયભાઈ પાસે 8,000 થી વધુ પોસ્ટમોર્ટમ કરવાનો અનુભવ છે. ઇન્ટરવ્યુ દરમિયાન તેમણે જણાવ્યું હતું કે, ફોરેન્સિક સાયન્સ માત્ર મૃત્યુનું કારણ જાણવા માટે નથી, પરંતુ તે ગુનાના ઉકેલ માટેનું સૌથી મોટું હથિયાર છે. તેમણે સમજાવ્યું કે કેવી રીતે કુદરતી મૃત્યુ અને શંકાસ્પદ મૃત્યુ વચ્ચેનો ભેદ પોસ્ટમોર્ટમ દ્વારા વૈજ્ઞાનિક રીતે સ્પષ્ટ થાય છે. ઘણીવાર ડ્રાઈવિંગ દરમિયાન હાર્ટ એટેક આવવા જેવી ઘટનાઓમાં પોસ્ટમોર્ટમ દ્વારા સત્ય બહાર આવે છે.

રાધિકા જીમખાના કેસ અને ભૂતકાળના સંસ્મરણો

ડૉ. શાહે વર્ષ 1992ના ચકચારી 'રાધિકા જીમખાના હત્યાકાંડ'ને યાદ કરતા જણાવ્યું કે, તે સમયની તપાસ કેટલી જટિલ હતી. AK-47 જેવા હથિયારોથી થયેલી 9 વ્યક્તિઓની હત્યામાં પોસ્ટમોર્ટમની પ્રક્રિયા કેવી રીતે ગુનેગારોને સજા અપાવવામાં નિર્ણાયક સાબિત થઈ હતી, તે તેમણે વિગતવાર સમજાવ્યું. આ ઉપરાંત અમદાવાદ પ્લેન ક્રેશ અને 1990-95 દરમિયાનના રમખાણોમાં ફોરેન્સિક તપાસના મહત્વ પર પણ તેમણે પ્રકાશ પાડ્યો હતો.

ઇન્દુ બ્લડ બેંકની 33 વર્ષની અવિરત સેવા

ડૉ. વિજયભાઈએ ઇન્દુ બ્લડ બેંકની 33 વર્ષની સફર વિશે વાત કરતા ગર્વ વ્યક્ત કર્યો. તેમણે જણાવ્યું કે, કરફ્યુ હોય કે કોરોના જેવી વિકટ મહામારી, આ બ્લડ બેંકના દરવાજા લોકો માટે ક્યારેય બંધ થયા નથી. ગુજરાત રક્તદાનના ક્ષેત્રમાં સમગ્ર દેશમાં કેમ મોખરે છે, તે અંગે તેમણે ગુજરાતના લોકોની સંવેદનશીલતાને બિરદાવી હતી.

પર્યાવરણ અને જળસંચય

તબીબી ક્ષેત્રની સાથે ડૉ. વિજયભાઈ પર્યાવરણ પ્રત્યે પણ એટલા જ જાગૃત છે. જળસંચય અને પાણીના સંગ્રહ માટે તેમણે કરેલા કાર્યો સમાજ માટે એક ઉત્તમ ઉદાહરણ છે. તેમણે સંદેશ આપ્યો કે, "જન્મથી કોઈ ગુનેગાર હોતો નથી, પરંતુ ગુનાને રોકવા માટે ન્યાયિક પ્રક્રિયામાં ફોરેન્સિક તપાસ અનિવાર્ય છે."

આ પણ વાંચો:  Studio on Wheels Dholera: ધોલેરામાં 70% NRI રોકાણ! 7 OAK' ના MD રાજદીપસિંહ ચુડાસમાએ શેર કરી મહત્વની વિગતો