Studio On Wheels Ahmedabad : સ્વાસ્થ્ય સેવા ક્ષેત્રે નર્સની ભૂમિકાને સર્વોપરી ગણાવતા, અમદાવાદ સ્થિત શુભમ ગ્રુપ ઓફ ઇન્સ્ટિટ્યૂટના ડિરેક્ટર દેવીબેન પરમારે ગુજરાત ફર્સ્ટના 'સ્ટુડિયો ઓન વ્હીલ્સ' કાર્યક્રમમાં મહત્વના વિચારો વ્યક્ત કર્યા હતા. આ વિશેષ મુલાકાતમાં તેમણે જણાવ્યું હતું કે, હોસ્પિટલની અંદર દર્દી જ્યારે 'સિસ્ટર' કહીને સંબોધે છે, ત્યારે એક બહેન હોવાનો અને આત્મિયતાનો અહેસાસ થાય છે.
નર્સિંગ વ્યવસાયનું મહત્વ અને સન્માન
દેવીબેન પરમારે નર્સિંગ ક્ષેત્રને સેવાભાવી અને ઉમદા વ્યવસાય ગણાવતા કહ્યું કે, "દર્દીને ડોક્ટર પહેલા નર્સ મળે છે. નર્સના વ્યવહાર અને પ્રેમભર્યા શબ્દોથી દર્દીનું અડધું દુઃખ ઓછું થઈ જાય છે." વર્તમાન સમયમાં નર્સિંગના વ્યવસાય પ્રત્યે લોકોનો દ્રષ્ટિકોણ બદલાયો છે અને તેમને સમાજમાં પૂરતું સન્માન મળી રહ્યું છે. વિશ્વના દરેક દેશમાં કુશળ નર્સની માંગ ખૂબ જ વધારે છે, જે સેવા સાથે આજીવિકા મેળવવાનું શ્રેષ્ઠ માધ્યમ છે.
શુભમ ગ્રુપનો સેવાયજ્ઞ
પોતાના પારિવારિક વારસા અને મેડિકલ ક્ષેત્ર સાથેના જોડાણ વિશે વાત કરતા તેમણે જણાવ્યું કે, તેમના પુત્ર 'શુભમ'ના નામે શરૂ કરાયેલી આ હોસ્પિટલ આજે શિક્ષણના વટવૃક્ષ સમાન બની છે. અત્યારે શુભમ ગ્રુપ હેઠળ પાંચ કોલેજો કાર્યરત છે, જેમાં 3,500થી વધુ વિદ્યાર્થીઓ અભ્યાસ કરી રહ્યા છે. સંસ્થા દ્વારા માત્ર શિક્ષણ જ નહીં, પરંતુ દર વર્ષે ફ્રી મેડિકલ કેમ્પ, બ્લડ ડોનેશન, સ્વચ્છતા અને વ્યસન મુક્તિ અભિયાન જેવા સામાજિક કાર્યો પણ કરવામાં આવે છે. ગરીબ અને મધ્યમ વર્ગના વિદ્યાર્થીઓને રાહત દરે શિક્ષણ આપવું એ સંસ્થાનું મુખ્ય ધ્યેય છે.
નર્સ એક યોદ્ધા તરીકેની ઓળખ
કોરોના કાળના કપરા સમયને યાદ કરતા તેમણે નર્સને 'યોદ્ધા' ગણાવી હતી. ઘર અને હોસ્પિટલ બંનેની જવાબદારી નિભાવતી નર્સ જ્યારે કોરોના સમયે અવિરત દર્દીઓની સેવા કરતી હતી, ત્યારે તે એક સાચા સૈનિકની ભૂમિકામાં હતી. તેમણે વધુમાં જણાવ્યું કે, ગુજરાત આજે આરોગ્ય ક્ષેત્રે હરણફાળ ભરી રહ્યું છે અને સરકારની વિવિધ યોજનાઓનો સીધો લાભ સામાન્ય દર્દીઓને મળી રહ્યો છે.
આ પણ વાંચો: Studio On Wheels: Rajkot ની T N Rao School, 40 વિદ્યાર્થીઓથી શરૂ થયેલી સફર આજે 1200 વિદ્યાર્થીઓ સાથે શિક્ષણ અને સંસ્કારોનું ધામ બની
