Studio on Wheels: રાજકોટના લોકપ્રિય ધારાસભ્ય રમેશભાઈ ટીલાળા, ખેડૂત પુત્રથી જનપ્રતિનિધિ સુધીની સફર
Studio on Wheels: 'સ્ટુડિયો ઓન વ્હીલ્સ' (Studio on Wheels) ની ટીમ રંગીલા રાજકોટ (Rajkot) માં પહોંચી હતી અહીં એક એવા વ્યક્તિત્વ સાથે મુલાકાત કરવામાં આવી હતી જેમને રાજકોટના લોકો જમીન સાથે જોડાયેલા અને નિષ્ઠાવાન જનપ્રતિનિધિ તરીકે ઓળખે છે. રાજકોટ દક્ષિણ બેઠકના ધારાસભ્ય રમેશભાઈ ટીલાળા (Ramesh Tilala) સાથેની આ ખાસ વાતચીતમાં તેમના સંઘર્ષમય જીવન, રાજકીય સફર અને વિકાસના વિઝન પર ઊંડાણપૂર્વક ચર્ચા કરવામાં આવી હતી.
Studio on Wheels માં રમેશભાઈ ટીલાળાની ખેડૂત પુત્રથી ધારાસભ્ય સુધીની સફર
એક સામાન્ય ખેડૂત પુત્ર તરીકે જન્મેલા રમેશભાઈ ટીલાળાની સફર અત્યંત પ્રેરણાદાયી છે. સાપર-વેરાવળ જેવા વિસ્તારમાં એક નાનકડી ફેક્ટરી સ્થાપીને ઉદ્યોગ જગતમાં પગરણ માંડનાર રમેશભાઈએ 20 વર્ષ સુધી ઇન્ડસ્ટ્રીઝ એસોસિએશનના ચેરમેન તરીકે કામ કર્યું છે. ઉદ્યોગપતિ હોવા છતાં તેમનામાં રહેલી સમાજસેવાની ભાવના જ તેમને રાજકારણમાં ખેંચી લાવી. તેઓ માને છે કે, "સમાજસેવા અને રાજકારણ એ એક સિક્કાની બે બાજુ છે," અને જનતાના કામો વધુ સરળતાથી થાય તે માટે સત્તાનો ઉપયોગ માત્ર એક સાધન તરીકે કરવો જોઈએ.
કાર્યકર્તાઓનું સન્માન
રાજકોટ દક્ષિણની બેઠક પર તેમને મળેલી 80,000 મતોની જંગી બહુમતી એ તેમની લોકપ્રિયતાનો પુરાવો છે. રમેશભાઈ આ ભવ્ય જીતનો શ્રેય ભારતીય જનતા પાર્ટીના એક-એક વોર્ડના કાર્યકર્તા અને તેમને સાથ આપનાર દરેક ઉદ્યોગપતિને આપે છે. તેમની ચૂંટણીમાં કાર્યકરોએ કરેલી રાત-દિવસની મહેનત પ્રત્યે તેઓ કૃતજ્ઞતા વ્યક્ત કરવાનું ચૂકતા નથી.
12 લોકોનો વિશેષ સ્ટાફ
ધારાસભ્ય બન્યા બાદ તેમણે પ્રજાની સુવિધા માટે એક નવું મોડેલ ઉભું કર્યું છે. તેમની ઓફિસમાં 12 લોકોનો સમર્પિત સ્ટાફ તૈનાત છે, જેનું કામ સરકારી યોજનાઓ સામાન્ય માનવી સુધી પહોંચાડવાનું છે. વિધવા પેન્શન, વૃદ્ધા પેન્શન, ડોમિસાઈલ સર્ટિફિકેટ કે રેશનકાર્ડ જેવા કાર્યો માટે લોકોને સરકારી કચેરીઓના ધક્કા ન ખાવા પડે, તે માટે રમેશભાઈએ તેમની ઓફિસને જ 'વન-સ્ટોપ સોલ્યુશન' બનાવી દીધી છે.
પડકારો અને કોરોનાકાળની યાદો
"ચેલેન્જ વગર કામ કરવાની મજા નથી," તેવું માનતા રમેશભાઈએ કોરોનાના કપરા કાળને યાદ કર્યો હતો. જ્યારે આખું વિશ્વ સ્થગિત હતું, ત્યારે તેમણે ઉદ્યોગકારો અને કામદારોની ચિંતા કરી. તેઓ કહે છે કે, લોકોના હિતમાં તેમણે જેલમાં જવાની તૈયારી બતાવી હતી પણ ઉદ્યોગો ધમધમતા રાખ્યા હતા. આ ઉપરાંત તેમણે 30 દિવસ સુધી સતત રસોડું ચલાવીને લાખો લોકો સુધી ભોજન અને રેશન કિટ પહોંચાડવાનું સત્કાર્ય કર્યું હતું.
રાજકોટનું ભવિષ્ય અને પર્યાવરણ પ્રત્યેનું વિઝન
રાજકોટ આજે 'મિની જાપાન' તરીકે નામના મેળવી રહ્યું છે, ત્યારે રમેશભાઈનું ધ્યાન આધુનિક વિકાસની સાથે પર્યાવરણ પર પણ છે. તેઓ વૃક્ષારોપણને જન આંદોલન તરીકે જુએ છે. "આવતીકાલની પેઢી આપણી પાસે જવાબ માંગશે કે તમે પ્રદૂષણ મુક્ત વાતાવરણ માટે શું કર્યું?" આ સવાલ સાથે તેઓ પાણી બચાવવા અને પ્રદૂષણ ઘટાડવાના પ્રયાસો પર ભાર મૂકે છે. તેમના ડ્રીમ પ્રોજેક્ટમાં 400 વર્ષ જૂના રામનાથ મહાદેવ મંદિરનો જીર્ણોદ્ધાર મુખ્ય છે, જે રાજકોટની ઓળખને વધુ મજબૂત બનાવશે.
Studio on Wheels: ધારાસભ્ય શ્રી Rameshbhai Tilala સાથે રાજકીય અને વિકાસલક્ષી મુદ્દાઓ પર વિશેષ સંવાદ#Rajkot #StudioOnWheels #RameshbhaiTilala #MLAUnderview #RajkotSouth #GujaratPolitics #BreakingNews #LocalNews #GujaratFirst #SaurashtraNews #LatestUpdates #Development pic.twitter.com/fpbz0KG7ge
— Gujarat First (@GujaratFirst) May 23, 2026
રાજકારણમાં હોવા છતાં રમેશભાઈ ટીલાળાની સાદગી અને લોકોની વચ્ચે રહીને કામ કરવાની તેમની રીત તેમને અન્ય નેતાઓથી અલગ પાડે છે. તેમની આ સફર દરેક ઉગતા ઉદ્યોગપતિ અને યુવા નેતા માટે એક આદર્શ પાઠ સમાન છે.
આ પણ વાંચો: Studio on Wheels: અલ્પેશભાઈ ઢોલરિયાની મજૂરી કામથી લઈ માર્કેટ યાર્ડના ચેરમેન સુધીની સફર