Studio On Wheels Vadodara : સંસ્કારી નગરી વડોદરામાં કાયદો અને વ્યવસ્થાની સ્થિતિ સુદ્રઢ બનાવવા માટે પોલીસ વિભાગ દ્વારા આધુનિક ટેકનોલોજી અને પ્રોએક્ટિવ પોલીસિંગ પર વિશેષ ભાર મૂકવામાં આવી રહ્યો છે. પોલીસ કમિશનર નરસિમ્હા કોમારના માર્ગદર્શન હેઠળ, વડોદરા પોલીસે ગુનાખોરી પર નિયંત્રણ લાવવા અને નાગરિકોને ઝડપી ન્યાય અપાવવા માટે એક નવો માર્ગ મોકળો કર્યો છે.
'ડિટેક્શન એ જ શ્રેષ્ઠ પ્રિવેન્શન' નો મંત્ર
વડોદરામાં પોલીસ કમિશનર નરસિમ્હા કોમારના નેતૃત્વમાં સુરક્ષા અને કાયદો-વ્યવસ્થાની સ્થિતિ વધુ મજબૂત બની છે. શહેર પોલીસ દ્વારા આધુનિક ટેકનોલોજીના ઉપયોગ અને પ્રોએક્ટિવ પોલીસિંગ પર વિશેષ ભાર મૂકવામાં આવી રહ્યો છે. પોલીસ કમિશનરના જણાવ્યા અનુસાર, શહેર પોલીસની પ્રાથમિકતા ગુનાઓનું નિવારણ અને તપાસની ગુણવત્તા વધારવાની છે. આ માટે હોટસ્પોટ એનાલિસિસ દ્વારા સંવેદનશીલ વિસ્તારોમાં પોલીસની વિઝિબિલિટી વધારવામાં આવી છે, જેનાથી અસામાજિક તત્વો પર કડક નિયંત્રણ આવ્યું છે.
ટેકનોલોજીના ઉપયોગથી મળેલી સફળતા
ગુજરાત સરકારના મહત્વાકાંક્ષી વિશ્વાસ પ્રોજેક્ટ હેઠળ સીસીટીવી, ડ્રોન અને બોડી કેમેરાના નેટવર્કને કારણે ગુનાખોરીના આંકડામાં નોંધપાત્ર ઘટાડો થયો છે. પોલીસના ડેટા મુજબ, વર્ષ 2025માં શહેરમાં થયેલ ચોરી, લૂંટ અને ડકેતી જેવા ગુનાઓ પૈકી 73 ટકા કેસો ઉકેલવામાં પોલીસને સફળતા મળી છે. ખાસ કરીને ચેન સ્નેચિંગના કિસ્સામાં 100 ટકા જેટલા ગુનાઓ ડિટેક્ટ કરવામાં આવ્યા છે.
પોલીસના સફળ કામકાજમાં નાગરિકોનો સહકાર ખૂબ જરૂરી
શહેર પોલીસ માટે ટેકનોલોજી આશીર્વાદ સમાન બની છે. સીસીટીવી કેમેરાના માધ્યમથી શહેરભર પર સતત નજર રાખવામાં આવે છે, જે શાંતિ અને સુરક્ષા જાળવવામાં મદદરૂપ થાય છે. આ ઉપરાંત વહીવટી તંત્ર સાથે મળીને રોડ સેફ્ટીની દિશામાં પણ સારી કામગીરી કરવામાં આવી છે.કમિશનરે ભારપૂર્વક કહ્યું કે પોલીસના સફળ કામકાજ માટે નાગરિકોનો સહકાર ખૂબ જરૂરી છે. પ્રજામાં પોલીસ માટે પ્રેમ અને ગુનેગારોમાં પોલીસનો ખૌફ હોય તે જરૂરી છે. વિવિધ એનજીઓ અને અન્ય એજન્સીઓ સાથે પણ પોલીસ સંકલનમાં રહીને કામ કરી રહી છે.
22 કરોડથી વધુનો મુદ્દામાલ અને 27 કરોડ સાયબર ફ્રોડ પરત અપાવ્યા
પોલીસ વિભાગ હવે રજિસ્ટર, રિસ્પોન્ડ, રિકવર અને રિટર્ન ના સૂત્ર સાથે કામ કરી રહ્યું છે. ગત વર્ષે પોલીસે 22 કરોડથી વધુ રકમનો ચોરાયેલો મુદ્દામાલ અને સાયબર ક્રાઈમમાં ફસાયેલા 27 કરોડ રૂપિયા ભોગ બનનાર નાગરિકોને પરત અપાવ્યા છે, જે પોલીસની પારદર્શિતા અને કાર્યક્ષમતાનું ઉત્તમ ઉદાહરણ છે.
વડોદરામાં ક્રાઈમ રેટમાં ઘટાડો
પોલીસ કમિશનરે સ્પષ્ટ કર્યું છે કે ક્રાઈમ રેટમાં પહેલા કરતા નોંધપાત્ર ઘટાડો થયો છે અને મિલકત તેમજ ફાઈનાન્સ સંબંધિત ગુનાઓ પર ખાસ ધ્યાન આપવામાં આવ્યું છે. ભૂતકાળમાં જોવા મળતા રાયોટિંગના ગુનાઓ હવે નહિવત થઈ ગયા છે. બુટલેગરો, જુગારીઓ અને વિસ્તારમાં રૌફ જમાવતા તત્વો પર બાજ નજર રાખવામાં આવી રહી છે, અને ગુનેગારોના આખા નેટવર્કને તોડવા માટે આયોજનબદ્ધ રીતે કામગીરી કરવામાં આવી છે. પરિણામે વડોદરાના નાગરિકો આજે શાંતિનો શ્વાસ લઈ રહ્યા છે. મધ્ય ગુજરાતના મહત્વપૂર્ણ શહેર તરીકે વડોદરામાં નવરાત્રિ અને અન્ય ધાર્મિક તહેવારો દરમિયાન શી ટીમની ખાસ તૈનાતી અને સતર્કતા રાખવામાં આવે છે.
યુવાનોને કડક ચેતવણી અને પોલીસના મિત્રભાવનો સંદેશ
શહેરમાં વધી રહેલી રીલ્સ બનાવવાની અને બાઈક સ્ટંટ કરવાની ઘટનાઓ પર ચિંતા વ્યક્ત કરતા પોલીસ કમિશનરે યુવાનોને સ્પષ્ટ સંદેશ આપ્યો છે. તેમણે કહ્યું કે, "પોલીસ કાયદો પાળનારા નાગરિકોની મિત્ર છે, પરંતુ કાયદો તોડનાર કે અસામાજિક પ્રવૃત્તિ કરનારાઓ સામે પોલીસ કડક કાર્યવાહી કરશે". સુરક્ષાના ભોગે કોઈ પણ મનોરંજન સાંખી લેવામાં આવશે નહીં.
પોલીસકર્મીઓના વેલફેર પર ધ્યાન
પોલીસ સ્ટાફની 24 કલાકની વ્યસ્ત અને પડકારજનક કામગીરીને ધ્યાનમાં રાખીને, તેમના માનસિક સ્વાસ્થ્ય અને ફિટનેસ માટે પણ વિશેષ આયોજન કરવામાં આવ્યું છે, જેથી તેઓ નાગરિકોને વધુ સારી સેવા આપી શકે.અંતમાં તેમણે યુવાનોને દેશહિતના કામમાં આગળ વધવા પ્રોત્સાહિત કર્યા હતા.
આ પણ વાંચો: Studio on Wheels Vadodara: જેલ નહીં, સુધારા ગૃહ, IPS Usha Rada એ જણાવી જેલ પ્રશાસનની અંદરની વાસ્તવિકતા
