Gujarat Goverment: જાહેર કર્યું 500 કરોડનું મેગા બજેટ, ખાડી રિ-ડેવલપમેન્ટ માટે માસ્ટર પ્લાન તૈયાર

શહેરી વિકાસ વિભાગની ટીમે કરી સમીક્ષા બેઠકો

મંત્રી હર્ષભાઇ સંઘવીએ માહિતી આપતા જણાવ્યું કે, ગઈકાલે ગાંધીનગરથી આવેલી શહેરી વિકાસ વિભાગની (Urban Development Department) ખાસ ટીમે સુરત મ્યુનિસિપલ કોર્પોરેશન (SMC - Surat Municipal Corporation) અને સ્થાનિક વહીવટીતંત્રના અધિકારીઓ સાથે તબક્કાવાર મહત્વની બેઠકો યોજી હતી. આ બેઠકોમાં ખાડીઓની વર્તમાન સ્થિતિ અને ચોમાસા દરમિયાન પાણી ભરાઈ જવાની સમસ્યાના મૂળભૂત કારણો પર વિસ્તૃત ચર્ચા-વિચારણા કરવામાં આવી હતી.

પાણી વહન ક્ષમતા વધારવા અને કોંક્રિટ કામ કરવા આદેશ

આ આયોજનના મુખ્ય ભાગરૂપે, ખાડીઓની પાણી વહન કરવાની ક્ષમતા કેવી રીતે વધારી શકાય તે મુદ્દે ટેકનિકલ પાસાઓની સમીક્ષા કરાઈ હતી. ભવિષ્યમાં ક્યારેય પૂરની સ્થિતિ (Flood Situation) ઊભી ન થાય તે માટે ખાડીઓની આસપાસ મજબૂત કોંક્રિટ કામ (Concrete Work) કરવા માટેના સ્પષ્ટ આદેશો આપી દેવામાં આવ્યા છે. આ ઉપરાંત, ખાડીની આસપાસ થયેલા ગેરકાયદેસર દબાણો પૂરના પાણીના કુદરતી પ્રવાહને રોકે છે, તેથી આવા તમામ દબાણોને તાત્કાલિક અસરથી હટાવવા માટે તંત્રને કડક સૂચના આપવામાં આવી છે.

ખાડી રિ-ડેવલપમેન્ટ માટે 500 કરોડનું મેગા બજેટ

સુરત શહેરને પૂરમુક્ત કરવાના આ ભગીરથ કાર્ય માટે રાજ્ય સરકારે મોટી નાણાકીય સહાયની પણ જાહેરાત કરી છે. હર્ષભાઇ સંઘવીએ જણાવ્યું કે, સુરત ખાડી રિ-ડેવલપમેન્ટ પ્રોજેક્ટ (Creek Redevelopment Project) માટે સરકારે 500 કરોડ રૂપિયાનું માતબર બજેટ મંજૂર કર્યું છે. આ ભંડોળનો ઉપયોગ ખાડીઓને ઉંડી કરવા, પહોળી કરવા અને આધુનિક ડ્રેનેજ સિસ્ટમ વિકસાવવા માટે કરવામાં આવશે, જેથી સુરતના નાગરિકોને ખાડીપૂરના ડરથી કાયમી છુટકારો મળી શકે.

આ પણ વાંચો: Surat Flood Relief Pakage: સુરત પૂર પીડિતો માટે સરકારે જાહેર કર્યું મેગા પેકેજ, લારીવાળાને 7500 અને પાકી દુકાનોને મળશે 1 લાખની રોકડ