ગુજરાતના રમતગમત મંત્રી ડો. જયરામ ગામીતની તબિયત લથડી, છાતીમાં દુખાવા બાદ સુરતમાં હાર્ટ સર્જરી

સર્જરી બાદ હૃદયમાં મૂકાયું સ્ટેન્ટ

તબીબી પરીક્ષણ દરમિયાન મંત્રી ડો. જયરામ ગામીત (Dr. Jayram Gamit) ના હૃદયની નળીઓમાં બ્લોકેજ (Blockage) હોવાનું સામે આવ્યું હતું. પરિસ્થિતિની ગંભીરતાને ધ્યાનમાં લઈને ડૉક્ટરોએ વિલંબ કર્યા વિના ઈમરજન્સી સર્જરી (Emergency Surgery) કરવાનો નિર્ણય લીધો હતો. તબીબોની ટીમે સફળતાપૂર્વક ઓપરેશન કરીને મંત્રીના હૃદયમાં સ્ટેન્ટ (Stent) મૂક્યું છે. આ સફળ પ્રક્રિયા બાદ મંત્રીની તબિયતમાં સુધારો જોવા મળ્યો છે. હોસ્પિટલના સત્તાવાર સૂત્રોના જણાવ્યા અનુસાર, હાલમાં તેમની તબિયત સ્થિર અને સારી હોવાનું જાણવા મળ્યું છે.

હાલ તબિયત સ્થિર, નિષ્ણાત તબીબોની દેખરેખ હેઠળ ઓબ્ઝર્વેશનમાં

સર્જરી બાદ કોઈપણ પ્રકારની આડઅસર કે જટિલતા ન સર્જાય તે માટે ડો. જયરામ ગામીત (Dr. Jayram Gamit) ને હાલ તબીબોની કડક દેખરેખ હેઠળ હોસ્પિટલના સ્પેશિયલ વોર્ડમાં એડમિટ (Admitted) રાખવામાં આવ્યા છે. આગામી 24 થી 48 કલાક સુધી તેમને ઓબ્ઝર્વેશન હેઠળ રાખવામાં આવશે.

રાજ્યના એક મહત્વના મંત્રી હોસ્પિટલમાં દાખલ થતાં જ વહીવટી તંત્ર અને રાજકીય આલમમાં ચિંતાની લહેર પ્રસરી ગઈ હતી. તેમના પરિવારજનો અને નિકટના આગેવાનો પણ સુરત (Surat) મૈત્રી હોસ્પિટલ ખાતે પહોંચી ગયા છે. હોસ્પિટલ પ્રશાસન દ્વારા જણાવવામાં આવ્યું છે કે મંત્રી અત્યારે સંપૂર્ણ ભાનમાં છે અને ડૉક્ટરોની ટીમ તેમની પળેપળની સ્થિતિ પર નજર રાખી રહી છે. તેમના સમર્થકો અને કાર્યકરો દ્વારા મંત્રી ઝડપથી સ્વસ્થ થઈને જનસેવામાં પરત ફરે તેવી પ્રાર્થનાઓ કરવામાં આવી રહી છે.

આ પણ વાંચો: મધ્યાહન ભોજનના કર્મચારીઓ આક્રમક:લઘુત્તમ વેતન અને 12 મહિનાના પગારની માંગ સાથે આંદોલનનું રણશિંગું