Surat : યુવકના ઘરે જઈ મારામારી કરી, ઘર-દુકાન અને કારને લગાવી આગ!

ડાયમંડ નગરી સુરતમાં (Surat) ગુનેગારોને જાણે છૂટો દોર મળી ગયો હોય તેમ લાગી રહ્યું છે. શહેરનાં માંગરોળનાં પીપોદરા GIDC વિસ્તારમાં રાતે લગભગ 11 વાગે એક બુટલેગરે તેનાં સાગરીતો સાથે મળીને ભારે ધમાલ મચાવી હતી અને આખી સોસાયટી માથે લીધી હતી. બાઇક અથડાવા જેવી નજીવી બાબતે બુટલેગર તેનાં સાગરીતો સાથે યુવકનાં ઘરે પહોંચ્યો હતો અને બબાલ કરી યુવકનાં પરિવારજનો પર હુમલો કર્યો હતો. આ હુમલામાં કેટલાક લોકો ઇજાગ્રસ્ત પણ થયા હતા. સાથે જ બુટલેગર અને તેનાં સાથીઓએ સોસાયટીમાં વાહનો, મકાન અને દુકાનમાં તોડફોડ કરી આગ લગાવી હતી. આ મામલે જાણ થતાં ASP, DYSP ઘટના સ્થળે દોડી આવ્યા હતા અને કાર્યવાહી હાથ ધરી હતી.

પ્રાપ્ત માહિતી અનુસાર, સુરતનાં (Surat) માંગરોળ પીપોદરા GIDC વિસ્તારમાં આવેલ પાર્થ સોસાયટીમાં ગતરાતે અંદાજે 11 કલાકે અજંપાભરી સ્થિતિ સર્જાઈ હતી. કેટલાક લુખ્ખા તત્વોએ સોસાયટીમાં ધમાલ મચાવીને મકાન, દુકાન અને વાહનોમાં તોડફોડ કરી હતી અને આગ લગાવી હતી. ઘટનાની જાણ થતાં ASP, DYSP સહિત પોલીસ જવાનો સ્થળે પહોંચ્યા હતા અને કાર્યવાહી હાથ ધરી હતી. પ્રાથમિક તપાસ અનુસાર, એક યુવક દ્વારા મોટર સાયકલ અથડાવા જેવી નજીવી બાબતે વિસ્તારમાં દારૂનો ધંધો કરતો બુટલેગર પદ્માનાભ વિજય મલિક ઉર્ફ પકોડા તેનાં 10 જેટલા સાગરીતો સાથે પાર્થ સોસાયટી પહોંચ્યો હતો.

આરોપ અનુસાર, બુટલેગર પદ્માનાભ વિજય મલિકે તેનાં સાગરીતો સાથે મળી યુવકનાં ઘરે જઈ મારઝૂડ કરી હતી અને ઘર અને દુકાનમાં આગ લગાવી હતી. સાથે જ સોસાયટીમાં પાર્ક એક કારને પણ આગ લગાવી હતી. આ ઘટનામાં યુવકનાં પરિવારજનો ઇજાગ્રસ્ત થયા હોવાની પણ માહિતી છે. આ મામલે પોલીસે (Surat Police) બુટલેગર પદ્માનાભ વિજય મલિક ઉર્ફ પકોડાની ધરપકડ કરી છે અને આગળની કાર્યવાહી હાથ ધરી છે. માહિતી અનુસાર, આરોપી સામે અગાઉ પણ મારામારી અને દારૂ સહિતનાં અનેક કેસ નોંધાયેલા છે.