Monsoon 2026 : ચોમાસાના પ્રારંભમાં જ દક્ષિણ ગુજરાત સહિતના અનેક વિસ્તારોમાં ધોધમાર વરસાદ વરસ્યો છે. ચોમાસામાં સંભવિત પૂરની સ્થિતિને પહોંચી વળવા માટે વહીવટી તંત્ર સજ્જ બન્યું છે. સુરતના ઓલપાડ ખાતે NDRFની ટુકડીઓને તૈનાત કરવામાં આવી છે. સુરક્ષાના ભાગરૂપે વડોદરા બટાલિયનની 6 વિશેષ ટીમોને તૈનાત કરાઈ છે, જે કોઈપણ કટોકટીના સમયે મદદ માટે સંપૂર્ણ સજ્જ રહેશે.
Monsoon 2026 : રૂબી ડોગ અને ડીપ ડાઈવરનો પણ કરાયો સમાવેશ
ઉલ્લેખનીય છે કે આ વિશેષ ટુકડીની કામગીરી વધુ કાર્યક્ષમ બનાવવા માટે તેમાં અદ્યતન સાધનો અને નિષ્ણાત જવાનોનો સમાવેશ કરાયો છે. આ ટીમમાં 30 કુશળ જવાન સાથે 2 મહિલા રેસ્ક્યુઅર્સનો પણ સમાવેશ કરવામાં આવ્યો છે. જે મહિલાઓ અને બાળકોના બચાવ કાર્યમાં વિશેષ ભૂમિકા ભજવશે. આ ઉપરાંત, ટીમમાં એક 'ડીપ ડાઈવર' પણ છે, જે ઊંડા પાણીમાં ફસાયેલા વ્યક્તિઓને સુરક્ષિત રીતે બહાર કાઢવા માટે સક્ષમ છે.
ઓલપાડમાં રેસ્ક્યુ માટે NDRFની તડામાર તૈયારી
મહત્વનું છે કે પૂરની સ્થિતિમાં રેસ્કયુ ઓપરેશનને વધુ સારી પાર પાડવામાં માટે NDRFની ટીમ સાથે 'રૂબી' નામની તાલીમબદ્ધ ડોગ પણ તૈનાત કરવામાં આવી છે. ટીમ પાસે ડિઝાસ્ટર મેનેજમેન્ટ માટે જરૂરી તમામ જીવનરક્ષક સાધનો જેવા કે કટર મશીન, લાઈફ જેકેટ અને રબર બોટનો જથ્થો ઉપલબ્ધ છે.
30 જવાનો સાથે 2 મહિલા રેસ્ક્યુઅરનો કરાયો સમાવેશ
તંત્ર દ્વારા લેવાયેલા આ સાવચેતીના પગલાં ચોમાસા દરમિયાન નાગરિકોની સુરક્ષા સુનિશ્ચિત કરવા માટે અત્યંત મહત્વના છે. કોઈપણ અનિચ્છનીય ઘટના કે પૂરની પરિસ્થિતિ સર્જાય તો આ ટીમ તાત્કાલિક રાહત અને બચાવ કામગીરી હાથ ધરીને જાન-માલનું નુકસાન ઘટાડવા માટે કટિબદ્ધ છે. જિલ્લા વહીવટી તંત્રની આ સજ્જતા ચોક્કસપણે નાગરિકોને સુરક્ષાનો અહેસાસ કરાવશે અને કટોકટીના સમયે વળતો પ્રહાર કરવાની શક્તિ પૂરી પાડશે.
આ પણ વાંચો : Surat : 'તેરા તુઝકો અર્પણ' કાર્યક્રમ હેઠળ લૂંટાયેલા રૂ.35 લાખ વેપારીઓને સોંપાયા, સુરત પોલીસની નિષ્ઠાવાન કામગીરી
