Surat Airport: ચાંદીના કડામાં છુપાવ્યું હતું અસલી સોનું! સુરત એરપોર્ટ પર સ્મગલરોની નવી ટ્રીક નિષ્ફળ

પેસેન્જર સીટ નીચેથી મળ્યું કાળું વેલ્વેટ પાઉચ

એરપોર્ટના સત્તાવાર સૂત્રો પાસેથી મળતી વિગતો અનુસાર, દુબઈથી સુરત આવેલી એર ઇન્ડિયા એક્સપ્રેસ (Air India Express) ની ફ્લાઈટ નંબર IX-274 લેન્ડ થયા બાદ, એર ઇન્ટેલિજન્સ યુનિટે નિયમિત પ્રક્રિયાના ભાગરૂપે પ્લેનની અંદર સર્ચ ઓપરેશન એટલે કે રમીજિંગ ઓપરેશન હાથ ધર્યું હતું. આ તપાસ દરમિયાન પેસેન્જર સીટ નંબર 21Bની નજીકથી કસ્ટમ્સના અધિકારીઓને એક શંકાસ્પદ કાળું વેલ્વેટ પાઉચ લાવારિસ હાલતમાં મળી આવ્યું હતું. આ પાઉચ ખોલીને તપાસ કરતા તેમાંથી ચાંદી જેવા રંગના કડા મળી આવ્યા હતા.

રૂપિયા 36.89 લાખની કિંમતનું 238 ગ્રામ સોનું જપ્ત

કસ્ટમ્સ વિભાગ (Customs Department) ના અધિકારીઓએ જ્યારે આ ચાંદી જેવા દેખાતા કડાની ઝીણવટભરી તપાસ અને કેમિકલ ટેસ્ટિંગ કર્યું, ત્યારે સામે આવ્યું કે આ કડા પર માત્ર ચાંદીનો રંગ લગાડવામાં આવ્યો હતો અને તેની અંદર અસલી સોનું છુપાવવામાં આવ્યું હતું. કસ્ટમ્સની લેબોરેટરી તપાસમાં આ જથ્થો 24 કેરેટ શુદ્ધતા ધરાવતું 238 ગ્રામ સોનું હોવાનું સાબિત થયું હતું. આ જપ્ત કરાયેલા સોનાની વર્તમાન બજાર કિંમત અંદાજે ₹36.89 લાખ આંકવામાં આવી છે.

કસ્ટમ્સ એક્ટ હેઠળ કાયદેસરની કાર્યવાહી

ફ્લાઈટની અંદર આ પાઉચ કોણ મૂકીને ગયું હતું અથવા તે કયા પેસેન્જરનું હતું, તે અંગે પ્લેનમાં સવાર કોઈ પણ મુસાફરે માલિકી હક સ્વીકાર્યો ન હતો. સોનાનો કોઈ દાવેદાર આગળ ન આવતાં કસ્ટમ્સ વિભાગે આ બિનવારસી સોનાના જથ્થાને કસ્ટમ્સ એક્ટ, 1962ની સંબંધિત કલમો હેઠળ જપ્ત કરી લીધો છે. હાલ એરપોર્ટ ઓથોરિટી દ્વારા સીટ નંબર 21B પર મુસાફરી કરનાર પ્રવાસીઓની યાદી અને સીસીટીવી કેમેરા (CCTV) ના ફૂટેજ ચકાસીને સોનાની હેરાફેરી કરનાર સ્મગલર સુધી પહોંચવા માટે આગળની તપાસ તેજ કરવામાં આવી છે.

આ પણ વાંચો: દાહોદ હાઈવે પર આતંક મચાવતી લૂંટારુ ગેંગ ઝડપાઈ: 6 આરોપીઓની ધરપકડ, એક સગીર પણ સામેલ