સુરતમાં બોગસ ઓર્ડર અને રિટર્નનો ખેલ: ફ્લિપકાર્ટ સાથે 42.20 લાખની ઠગાઈ, 5 ગઠિયા જેલભેગા

5 આરોપીઓની ધરપકડ

સાયબર પોલીસે આ કૌભાંડમાં સામેલ આસવ લુનાગરિયા, રક્ષિત રાદડિયા, ભૌતિક ઠુમ્મર, આકાશ વોરા અને રોહન વોરા નામના 5 શખ્સોની ધરપકડ કરી છે. પ્રાથમિક તપાસમાં સામે આવ્યું છે કે આ આરોપીઓએ ફ્લિપકાર્ટ પર 'સુખવિલાશ ક્રિએશન' (Sukhvilas Creation) ના નામે એક બોગસ સેલર એકાઉન્ટ શરૂ કર્યું હતું. આ એકાઉન્ટનો ઉપયોગ કરીને તેઓ ઓનલાઇન છેતરપિંડીનું આખું નેટવર્ક ચલાવતા હતા.

42.20 લાખની છેતરપિંડી

પોલીસ તપાસ અનુસાર, આરોપીઓએ આ એકાઉન્ટ પરથી અંદાજે 94 લાખ રૂપિયાની કુલ કિંમતના 5,121 શંકાસ્પદ ઓર્ડર્સ જનરેટ કર્યા હતા. આ મોટાભાગના ઓર્ડર્સ કેશ ઓન ડિલિવરી (Cash on Delivery - COD) મોડ પર મુકવામાં આવતા હતા. માલ ડિલિવર થયા બાદ તેઓ તરત જ ખોટા કારણો આગળ ધરીને રિટર્નની રિક્વેસ્ટ મૂકી દેતા હતા. રિટર્ન ઓર્ડરના ચાર્જ સેટલમેન્ટના સમયગાળાનો ફાયદો ઉઠાવીને કંપનીના સેલર પ્રોટેક્શન ફંડમાંથી ક્લેમ મેળવી લેતા હતા. આ મોડસ ઓપરેન્ડી દ્વારા આરોપીઓએ કુલ42.20 લાખ રૂપિયાનો ચૂનો લગાવ્યો હતો.

ફ્લિપકાર્ટની ફરિયાદ બાદ સાયબર સેલની કાર્યવાહી

જ્યારે ફ્લિપકાર્ટ (Flipkart) કંપનીના ઓડિટ દરમિયાન રિફંડના નાણાં અને રિટર્ન થયેલા માલમાં ભારે ગેરરીતિ સામે આવી અને રિફંડની રકમ પરત ન મળી, ત્યારે કંપની દ્વારા સુરત સાયબર ક્રાઈમ પોલીસ સ્ટેશનમાં સત્તાવાર ફરિયાદ નોંધાવવામાં આવી હતી. ટેકનિકલ સર્વેલન્સ (Technical Surveillance) અને ડિજિટલ ટ્રેઇલના આધારે પોલીસે ગણતરીના દિવસોમાં આ સમગ્ર રેકેટનો પર્દાફાશ કરી તમામ 5 આરોપીઓને જેલના સળિયા પાછળ ધકેલી દીધા છે.

આ પણ વાંચો: Good News: સરકારી કર્મચારીઓ માટે મોટા સમાચાર, વર્ગ-3 ના કર્મીઓ માટે નવા મેડિકલ બોર્ડની રચના