સુરત હીરા બજારમાં 4.80 કરોડની ઠગાઈ, દુબઈથી નેપાળ થઈ સુરત આવતાં જ પોલીસે દબોચ્યો, દેશભરમાં નોંધાઈ છે 227 ફરિયાદો

4.80 કરોડની હીરા છેતરપિંડી અને 42.28 લાખનું સાયબર ફ્રોડ

પોલીસ પાસેથી મળતી વિગતો અનુસાર, આરોપી નીતિન ઉર્ફે કાનાએ બેન્ક મેનેજર સાથે સાંઠગાંઠ રચીને 42.28 લાખ રૂપિયાનું સાયબર ફ્રોડ આચર્યું હતું. આ ઉપરાંત, સુરતના પ્રતિષ્ઠિત હીરા બજારના વેપારીઓ પાસેથી વિશ્વાસ કેળવી 4.80 કરોડ રૂપિયાની કિંમતના હીરા મેળવી છેતરપિંડી આચરી હતી. આ ગુનાઓ સામે આવ્યા બાદ સુરત પોલીસના ઇકો સેલમાં તેની સામે ગુનો નોંધાયો હતો અને તે પોલીસ પકડથી બચવા નાસતો ફરતો હતો.

દુબઈથી નેપાળ અને ત્યાંથી બસ દ્વારા સુરત પહોંચ્યો

ગુનો આચર્યા બાદ નીતિન ભારત છોડીને દુબઈ (Dubai) ભાગી છૂટ્યો હતો. ભારતીય તપાસ એજન્સીઓ અને સુરત પોલીસ દ્વારા તેના પર વોચ રાખવામાં આવી રહી હતી. ધરપકડથી બચવા માટે આરોપીએ ચાલબાજી અપનાવી અને દુબઈથી સીધો ભારત આવવાને બદલે ફ્લાઇટ મારફતે નેપાળ (Nepal) પહોંચ્યો હતો. ત્યાંથી તે સરહદ પાર કરીને ખાનગી બસ મારફતે છૂપા વેશે સુરત પહોંચ્યો હતો, પરંતુ સાયબર સેલ અને ક્રાઇમ બ્રાન્ચે બાતમીના આધારે તેને દબોચી લીધો હતો.

ટેલિગ્રામ દ્વારા ચાઇનીઝ ગેંગ સાથે કનેક્શન

તપાસમાં સૌથી મોટો અને ચોંકાવનારો ખુલાસો એ થયો છે કે આરોપી નીતિન ટેલિગ્રામ (Telegram) એપ્લિકેશન મારફતે કુખ્યાત ચાઇનીઝ સાયબર ગેંગ (Chinese Cyber Gang) સાથે સંપર્કમાં હતો. તે ભારતીય નાગરિકોના બોગસ બેન્ક એકાઉન્ટ્સ (Bank Accounts) ની વિગતો આ વિદેશી હેકર્સ અને સાયબર માફિયાઓને પૂરી પાડતો હતો. આંતરરાષ્ટ્રીય કક્ષાએ કાર્યરત આ સાયબર ગેંગ વિરુદ્ધ ભારતભરમાં કુલ 227 જેટલી ફરિયાદો નોંધાયેલી છે. સુરત પોલીસ હવે આરોપીના રિમાન્ડ મેળવી ગેંગના અન્ય સાગરીતો સુધી પહોંચવા કવાયત કરી રહી છે.

આ પણ વાંચો: સાયબર ક્રાઇમનો મોટો સપાટો: ફેક ID બનાવી મહિલાઓને હેરાન કરનારા 8 ઝડપાયા, ટૂંક સમયમાં જાહેર થશે સ્પેશિયલ હેલ્પલાઇન નંબર