Surat Flood News: સુરતમાં ભારે વરસાદ અને પૂરને કારણે વેપારીઓને થયેલા આર્થિક નુકસાનના પગલે જિલ્લા કલેક્ટર તેજસ પરમાર દ્વારા મહત્વના નિર્ણયો લેવામાં આવ્યા છે. જિલ્લા કલેક્ટરના અધ્યક્ષસ્થાને વીમા કંપનીઓના પ્રતિનિધિઓ સાથે યોજાયેલી બેઠકમાં વેપારીઓને રાહત આપવા માટે ક્લેમની પ્રક્રિયા ઝડપી બનાવવા સ્પષ્ટ સૂચના આપવામાં આવી છે.
Surat મા ઈન્સ્યોરન્સ ક્લેમ માટે પોર્ટલ શરૂ થશે
કલેક્ટરે જણાવ્યું હતું કે, વેપારીઓ કે એજન્સીઓની ફરિયાદના નિવારણ માટે ટૂંક સમયમાં એક સ્પેશિયલ પોર્ટલ શરૂ કરવામાં આવશે, જેના પર મળેલી ફરિયાદો સીધી વીમા કંપનીઓને ટ્રાન્સફર કરવામાં આવશે. આ પ્રક્રિયામાં વેપારીઓને ઓછામાં ઓછી તકલીફ પડે તે હેતુથી સંકલન સાધવા માટે એક નોડલ ઓફિસરની પણ નિમણૂક કરવામાં આવી છે
આપત્તિમાં ભાવ વધારો કરનારાઓ નહીં બચે
બીજી તરફ, આપત્તિના સમયમાં કાળાબજારી કરનારા તત્વોને કલેક્ટરે કડક ચેતવણી આપી છે. પૂર બાદ રિપેરિંગ શોપ્સ અને અનાજની દુકાનો પર વસ્તુઓના ભાવમાં વધારો કરી લોકોની મજબૂરીનો ફાયદો ઉઠાવવાની ફરિયાદો મળી છે. આ અંગે કલેક્ટરે જણાવ્યું હતું કે, જો કોઈ દુકાનદાર કે વ્યક્તિ વધુ ભાવ લેતા પકડાશે, તો તેમની સામે સખત કાયદાકીય પગલાં લેવામાં આવશે.
યુદ્ધના ધોરણે સર્વેની કામગીરી ચાલુ
વધુમાં, જિલ્લામાં સહાયની કામગીરી અંગે માહિતી આપતા કલેક્ટરે કહ્યું કે, અત્યાર સુધીમાં શહેરના છ તાલુકાઓમાં કાર્યરત ૫૦ ટીમો દ્વારા સર્વે કરી 2500 પરિવારોને 1.50 કરોડ રૂપિયાની સહાય કેશ ડોલ્સ અને ઘરવખરી સ્વરૂપે ચૂકવવામાં આવી છે. બાકી રહેલા વિસ્તારોમાં પણ યુદ્ધના ધોરણે સર્વેની કામગીરી ચાલુ છે અને અસરગ્રસ્ત પરિવારોને સત્વરે સહાય મળી રહે તે માટે તંત્ર સતત પ્રયત્નશીલ છે.
આ પણ વાંચો: Vadodara News: રોઝરી સ્કૂલના શિક્ષકની ક્રૂરતા, માથામાં તેલ ન નાખવા બાબતે સજા, હૃદયની બીમારીથી પીડિત વિદ્યાર્થીને 6 રાઉન્ડ દોડાવ્યા
