Surat Food Poisoning: સુરત શહેરમાંથી એક અત્યંત ચોંકાવનારી અને દુઃખદ ઘટના સામે આવી છે. વરાછા વિસ્તારમાં આવેલી 'શીતલ રેસ્ટોરન્ટ' માંથી લાવવામાં આવેલી સબ્જી ખાવાથી એક જ પરિવારના પાંચ સભ્યોની તબિયત ગંભીર રીતે લથડી હતી, જેમાં બે દિવસની સારવાર દરમિયાન ચાર વર્ષની માસૂમ બાળકીનું કરુણ મોત નીપજ્યું છે. આ ઘટનાને પગલે સમગ્ર વિસ્તારમાં ચકચાર મચી ગઈ છે અને લોકોમાં રોષ જોવા મળી રહ્યો છે.
Surat માં શીતલ રેસ્ટોરન્ટનું ખાણું ખાવાથી 4 વર્ષની માસૂમ બાળકીનું મોત
પ્રાપ્ત માહિતી અનુસાર, કળસરીયા પરિવારના પાંચ સભ્યોએ શનિવારે વરાછાની શીતલ રેસ્ટોરન્ટમાંથી સબ્જી ખરીદીને ઘરે આરેાગી હતી. સબ્જી ખાધા બાદ વહેલી સવારે પરિવારના પાંચેય સભ્યોની તબિયત અચાનક બગડવા લાગી હતી. તમામની તબિયત લથડતા તેમને તાત્કાલિક હોસ્પિટલમાં દાખલ કરવામાં આવ્યા હતા. જ્યાં હોસ્પિટલમાં બે દિવસ સુધી ચાલેલી સારવાર દરમિયાન ચાર વર્ષની માસૂમ બાળકીનું મોત થયું હતું. પ્રાથમિક રિપોર્ટમાં પણ બાળકીનું મોત ફૂડ પોઈઝનિંગના કારણે થયું હોવાનો સ્પષ્ટ ઉલ્લેખ કરવામાં આવ્યો છે. જો કે, બાળકીના મોતનું સચોટ અને આખરી કારણ પોસ્ટમોર્ટમ (PM) રિપોર્ટ આવ્યા બાદ જ બહાર આવશે તેવું સામે આવ્યું છે.
પાલિકાનું ફૂડ વિભાગ ઊંઘતું ઝડપાયું, રેસ્ટોરન્ટમાં ભારે ગંદકી
ઘટનાની ગંભીરતા વધતા અને બાળકીના મોત બાદ પાલિકાનું આરોગ્ય અને ફૂડ વિભાગ હરકતમાં આવ્યું હતું. સુરતના મેયર માયા માવાણીના જ વોર્ડમાં આવેલી આ રેસ્ટોરન્ટમાં જ્યારે ટીમે દરોડા પાડ્યા ત્યારે ચોંકાવનારા દ્રશ્યો સામે આવ્યા હતા. રેસ્ટોરન્ટમાં ખુલ્લો ખોરાક, અસહ્ય ગંદકી, ફુગવાળેલી તુવેર દાળ અને સડેલા કાંદા મળી આવ્યા હતા. તપાસ દરમિયાન રેસ્ટોરન્ટમાંથી પનીર, દાળ, વિવિધ વાનગીઓ તેમજ ફ્રીઝરમાં રાખેલું દૂધ પણ એક્સપાયરી ડેટ વગરનું અને અખાધ્ય જથ્થામાં મળી આવ્યું હતું.
તાત્કાલિક રેસ્ટોરન્ટ કરાવી દીધી બંધ
આરોગ્ય મંત્રીની કડક સૂચનાઓ છતાં સ્થાનિક તંત્ર ઘોર નિંદ્રામાં જોવા મળ્યું હતું, જેના કારણે સંચાલકો બેરોકટોક લોકોના આરોગ્ય સાથે ચેડાં કરી રહ્યા હતા. વિવાદ વધતા પાલિકાએ તાત્કાલિક રેસ્ટોરન્ટને હાલ પૂરતી બંધ કરાવી દીધી છે અને અખાધ્ય ખોરાક તથા દૂધ સહિતના સમગ્ર જથ્થાનો નાશ કર્યો છે. ફૂડ સેફ્ટી ઓફિસર ભાવેશ બ્રહ્મભટ્ટની ટીમે સ્થળ પર કાર્યવાહી હાથ ધરી હતી.
આરોગ્યમંત્રી પ્રફુલ પાનસેરિયાની ગંભીર નોંધ
માસૂમ બાળકીના કથિત ફૂડ પોઈઝનિંગથી થયેલા મોતની ઘટનાને રાજ્યના આરોગ્યમંત્રી પ્રફુલ પાનસેરિયાએ અત્યંત ગંભીરતાથી લીધી છે. આરોગ્યમંત્રીએ આ ઘટનાની સંપૂર્ણ જાણકારી અને વિગતો મેળવીને સમગ્ર મામલે ઊંડાણપૂર્વક તપાસ કરવા માટે કડક આદેશો આપ્યા છે. મંત્રીની સૂચના બાદ સંબંધિત વિભાગોની ટીમો દોડતી થઈ છે અને આ કેસમાં કયા પ્રકારની તપાસ અને કાયદાકીય કાર્યવાહી થાય છે તેના પર સૌની નજર ટકેલી છે.
આ પણ વાંચો: Navsari ના દરિયામાં મોટી દુર્ઘટના, 2.5 નોટિકલ માઈલ દૂર બોટ પલટતા 9 માછીમારો ફસાયા
