Surat Rain News: સુરત શહેરમાં મોડી રાતથી શરૂ થયેલા અનરાધાર વરસાદે જનજીવનને ભારે અસર પહોંચાડી છે. મેઘરાજાના આક્રમક મિજાજને કારણે શહેરના અનેક વિસ્તારોમાં પાણી ભરાઈ ગયા છે, જેના કારણે સુરતવાસીઓની મુશ્કેલીમાં વધારો થયો છે.
Surat માં મોડી રાતથી પડેલા ભારે વરસાદ
શહેરના મહત્વના ગણાતા શ્યામ મંદિર અને VIP રોડ પર વરસાદી પાણી ફરી વળતા રસ્તાઓ તળાવમાં ફેરવાઈ ગયા છે. એટલું જ નહીં, શહેરીજનોની જીવાદોરી સમાન BRTS રૂટ પણ સંપૂર્ણપણે પાણીમાં ગરકાવ થઈ ગયો છે. રસ્તાઓ પર પાણી ભરાઈ જતા વાહનચાલકો અટવાયા હતા, તો રાહદારીઓને કેડ સમા પાણીમાંથી પસાર થવા માટે મજબૂર થવું પડ્યું હતું.
તંત્રની પ્રિ-મોન્સુન કામગીરીની પોલ ખૂલી
શહેરના અનેક વિસ્તારોમાં ખાડીઓ ઉભરાવવાની સમસ્યાથી લોકો પહેલાથી જ ત્રાહિમામ પોકારી ઉઠ્યા છે. માંડ-માંડ ખાડીપુરની સ્થિતિમાંથી બહાર આવેલા રહીશોને ફરી એકવાર ભારે વરસાદના કારણે હાલાકીનો સામનો કરવો પડી રહ્યો છે. વહીવટી તંત્ર દ્વારા હાથ ધરવામાં આવેલી પ્રિ-મોન્સુન કામગીરી સામે ફરી એકવાર ગંભીર સવાલો ઉભા થયા છે. ભારે વરસાદના કારણે સર્જાયેલી આ સ્થિતિએ સુરત મહાનગરપાલિકાના દાવાઓની હવા કાઢી નાખી છે.
હવામાન વિભાગની આગાહી મુજબ હજુ પણ વરસાદી માહોલ યથાવત રહેવાની શક્યતા છે, ત્યારે સુરતવાસીઓએ ઘરની બહાર નીકળતી વખતે સાવચેત રહેવું અનિવાર્ય છે.
આ પણ વાંચો: Surendranagar News: સાયલામાં બોગસ ડોક્ટર ઝડપાયો, પાનની દુકાનમાં ક્લિનિક, 68 હજારથી વધુનો મુદ્દામાલ જપ્ત, મોટાભાગની દવાઓ એક્સપાયરી ડેટવાળી
