Surat News: ડાયમંડ સિટી સુરતમાં મેઘરાજાએ અનરાધાર બેટિંગ શરૂ કરી છે. છેલ્લા 24 કલાકમાં પડેલા અતિભારે વરસાદને કારણે સુરત શહેર અને જિલ્લો જળબંબાકાર બન્યા છે. ઠેર ઠેર પાણી ભરાઈ જવાથી જનજીવન અસ્તવ્યસ્ત થઈ ગયું છે. વિદ્યાર્થીઓની સુરક્ષા અને સલામતીને ધ્યાનમાં રાખીને, જિલ્લા શિક્ષણ અધિકારીએ સુરત શહેર અને જિલ્લાની તમામ શાળાઓમાં આવતીકાલે રજા જાહેર કરતો પરિપત્ર બહાર પાડ્યો છે.
ભારે વરસાદની સંભાવનાને લઇ શાળામાં રજા જાહેર કરાઇ
સુરત શહેરમાં પડી રહેલા અતિભારે વરસાદને કારણે અનેક વિસ્તારો જળબંબાકાર બન્યા છે અને બાળકોના ડૂબવા જેવી દુર્ઘટનાઓ પણ સામે આવી રહી છે, જેને ધ્યાનમાં રાખીને વિદ્યાર્થીઓની સુરક્ષા અને સલામતી માટે જિલ્લા શિક્ષણ અધિકારી દ્વારા સુરત શહેર અને જિલ્લાની તમામ શાળાઓમાં આવતીકાલે રજા જાહેર કરતો પરિપત્ર બહાર પાડવામાં આવ્યો છે.
વરસાદી કહેર વચ્ચે અનેક દુર્ઘટનાઓ
ભારે વરસાદે અનેક વિસ્તારોમાં તારાજી સર્જી છે. સચિન GIDC વિસ્તારની મહાવીર નગર સોસાયટીમાં અત્યંત દુઃખદ ઘટના બની હતી, જેમાં છઠ પૂજા માટે ખોદવામાં આવેલા ખાડામાં પાણી ભરાઈ જવાથી 2 માસૂમ બાળકો (શ્રેયા આયુષ ઝા અને કૃષ્ણા) ડૂબી ગયા હતા, જેમને મૃત જાહેર કરવામાં આવ્યા હતા. આ ઉપરાંત, સરથાણા વિસ્તારમાં આવેલી આદર્શ નિવાસી શાળામાંથી 37 વિદ્યાર્થીઓ અને 12 સ્ટાફ મેમ્બરનું ફાયર બ્રિગેડ દ્વારા રેસ્ક્યુ કરવામાં આવ્યું હતું. રેલવે ગરનાળા નજીક સર્વોદય બેંકમાં પણ પાણી ભરાઈ જતા ફસાયેલા 21 લોકોનો ફાયરની ટીમે આબાદ બચાવ કર્યો હતો.
તંત્રની સ્થિતિ અને અપીલ
સુરત પાલિકા કમિશનર એમ. નાગરાજને જણાવ્યું હતું કે, શહેરના કેટલાક વિસ્તારોમાં 50 mm થી વધુ વરસાદ નોંધાયો છે. ભેદવાડ અને સીમાડા ખાડી ભયજનક સપાટી પર વહી રહી છે. લોકોએ બિનજરૂરી ઘરોની બહાર ન નીકળવા અને સુરક્ષિત રહેવા અપીલ કરી છે. સુરત કલેક્ટર તેજસ પરમારે જણાવ્યું હતું કે, જિલ્લામાં તમામ મામલતદાર અને પંચાયત કચેરીઓને એલર્ટ કરી દેવામાં આવી છે અને કંટ્રોલ રૂમ દ્વારા પરિસ્થિતિ પર સતત નજર રાખવામાં આવી રહી છે. હાલ તાપી નદીનું જળસ્તર નિયંત્રણમાં છે, પરંતુ તંત્ર દ્વારા સાવચેતીના ભાગરૂપે કલેક્ટર કચેરીમાં યોજાનારી બોર્ડ મિટિંગ રદ કરી દેવામાં આવી છે.
આ પણ વાંચો: Surat Police Rescue: સુરત પોલીસ બની દેવદૂત, શાળામાં બાળકો અને ઘરોમાંથી લોકોનું કર્યું રેસ્ક્યું
