Surat Rain: સુરતમાં આભ ફાટ્યું! હાઈવે બન્યા દરિયો, ધસમસતા પ્રવાહમાં ખાખી બની દેવદૂત!

પોલીસ બની દેવદૂત: ખડેપગે બચાવ કામગીરી

આ કપરી અને કટોકટીભરી પરિસ્થિતિ વચ્ચે સુરત જિલ્લા પોલીસની (Surat District Police) એક અલગ અને સરાહનીય છબી સામે આવી છે. ઠેર-ઠેર હાઈવે પર ખાખી વર્દીધારી જવાનો લોકો માટે સાચા અર્થમાં ‘દેવદૂત’ સાબિત થયા હતા. ધસમસતા પાણીના પ્રવાહમાં ફસાયેલા અને તણાઈ રહેલા વાહનચાલકોને બચાવવા માટે પોલીસે પોતાના જીવના જોખમે રેસ્ક્યુ ઓપરેશન હાથ ધર્યું હતું. પૂરના પાણીની વચ્ચે ફસાયેલી અને બંધ પડી ગયેલી ગાડીઓ તેમજ અન્ય વાહનોને પોલીસે જાતે ધક્કા મારીને સુરક્ષિત સ્થળો પર બહાર કાઢ્યા હતા. સમગ્ર રાત દરમિયાન સુરત જિલ્લા પોલીસ ખડેપગે રહી સેવા કાર્યોમાં લાગેલી રહી હતી.

ઓલપાડના સાયણ ખાતે મોટી દુર્ઘટના ટળી

ભારે વરસાદના કારણે રસ્તાઓ પર પડેલા ખાડાઓ પાણી ભરાવાને લીધે અદ્રશ્ય થઈ ગયા છે. આવી જ એક ઘટના ઓલપાડ (Olpad) તાલુકાના સાયણ (Sayan) ખાતે બની હતી, જ્યાં પાણીના ભારે પ્રવાહ વચ્ચે એક બાઇક ચાલક અચાનક ઊંડા ખાડામાં ખાબક્યો હતો અને ડૂબવા લાગ્યો હતો. ત્યાં ફરજ પર તૈનાત સુરત પોલીસના (Surat Police) જાંબાઝ જવાનોએ તાત્કાલિક એક્શન લીધા હતા અને તે ચાલકને સહીસલામત બહાર ઊંચકી લીધો હતો, જેના કારણે એક મોટી જાનહાનિ ટળી હતી. આ વીડિયો સોશિયલ મીડિયા પર પણ ખૂબ વાયરલ થઈ રહ્યો છે.

જિલ્લા પોલીસ વડા રાજેશ ગઢિયાની મહત્વની અપીલ

સ્થિતિની ગંભીરતાને જોતા સુરત જિલ્લા પોલીસ વડા (Surat SP) રાજેશ ગઢિયાએ (Rajesh Gadhiya) તાકીદનું નિવેદન જાહેર કરીને નાગરિકોને કટોકટી વિના હાઈવે પર ન નીકળવા વિનંતી કરી છે. તેમણે જણાવ્યું કે જ્યાં સુધી પાણી સંપૂર્ણપણે ઓસરી ન જાય ત્યાં સુધી બિનજરૂરી મુસાફરી ટાળવી જ હિતાવહ છે જેથી કોઈપણ અણધારી આફતથી બચી શકાય. હાલમાં હાઈવે પરથી પાણી ધીમે-ધીમે ઓસરતા વાહનચાલકો અને સ્થાનિક લોકોએ રાહતનો શ્વાસ લીધો છે, પરંતુ વહીવટી તંત્ર હજુ પણ એલર્ટ મોડ પર છે.

આ પણ વાંચો: Sabarkantha Rain: મેઘરાજાની તોફાની બેટિંગ, હિંમતનગરમાં માત્ર 1 કલાકમાં 2 ઇંચ વરસાદથી જળબંબાકાર