Surat: વ્હાઈટનરથી પિતાનું નામ બદલ્યું! પત્નીની LIC પોલિસીના 17.46 લાખ પડાવી લીધા

• Surat Fraud Case: પતિએ પત્નીની વર્ષોની બચત પર હાથફેરો કર્યો
• અઠવા પોલીસે આરોપી પતિ મનીષ શાહની કરી ધરપકડ
• આરોપી મનીષે વર્ષ 2021માં આ આખું ષડયંત્ર રચ્યું હતું

Surat Fraud Case: સુરત શહેરમાંથી વિશ્વાસઘાત અને છેતરપિંડીનો એક ચોંકાવનારો કિસ્સો સામે આવ્યો છે. જેમાં એક પતિએ પોતાની જ પત્નીની વર્ષોની મહેનતની બચત હડપવા માટે કાયદાકીય દસ્તાવેજોમાં છેડછાડ કરી લાખો રૂપિયાની ઉચાપત કરી છે. અઠવા પોલીસ (Athwa Police) સ્ટેશનમાં નોંધાયેલી ફરિયાદ બાદ પોલીસે આરોપી પતિ મનીષ શાહ (Manish Shah) ની ધરપકડ કરી કાયદેસરની કાર્યવાહી હાથ ધરી છે.

Surat Fraud Case:  2021 થી ષડયંત્રની શરૂઆત

આ સમગ્ર મામલો વર્ષ 2021 માં શરૂ થયો હતો. આરોપી મનીષ શાહે અત્યંત સાવચેતીપૂર્વક પોતાની પત્નીની જાણ બહાર એક મોટું ષડયંત્ર રચ્યું હતું. પત્નીએ પોતાના ભવિષ્ય માટે ભારતીય જીવન વીમા નિગમ (LIC) ની પોલિસી લીધી હતી. આ પોલિસીના દસ્તાવેજોમાં પત્નીએ નોમિની (Nominee) તરીકે પોતાના પિતાનું નામ રાખ્યું હતું. જોકે, લાલચમાં આવી ગયેલા પતિએ આ સરકારી દસ્તાવેજમાં છેડછાડ કરવાનું નક્કી કર્યું.

Surat Fraud Case: વ્હાઈટનર ફેરવી પિતાનું નામ બદલ્યું

પોલીસ તપાસમાં બહાર આવ્યું છે કે મનીષે પત્નીની ગેરહાજરીમાં LIC ના ફોર્મ મેળવી લીધા હતા. આ ફોર્મમાં નોમિની તરીકે લખાયેલા પિતાના નામ પર તેણે વ્હાઈટનર (Whitener) ફેરવી દીધું હતું અને તેની જગ્યાએ પત્નીની જાણ બહાર પોતાનું નામ લખી દીધું હતું. આટલું જ નહીં, તેણે પત્નીની સહીની આબેહૂબ નકલ (Forgery of Signature) કરીને ઓફિસમાં આ દસ્તાવેજો જમા કરાવી દીધા હતા.

17.46 લાખ રૂપિયાની છેતરપિંડી

આ છેતરપિંડીના આધારે આરોપી મનીષ શાહે વીમા કંપની પાસેથી કુલ 17.46 લાખ રૂપિયા (Rs. 17.46 Lakhs) પડાવી લીધા હતા. પત્નીને જ્યારે તેની વર્ષોની બચત ઉપડી ગયાની જાણ થઈ, ત્યારે તેના પગ નીચેથી જમીન સરકી ગઈ હતી. તપાસ કરતા માલૂમ પડ્યું કે તેનો પોતાનો પતિ જ આ ગુનામાં સંડોવાયેલો છે. અંતે ન્યાય માટે પત્નીએ પોલીસનો આશરો લીધો હતો.

પોલીસે આરોપી પતિને પકડ્યો

અઠવા પોલીસે ગુનો નોંધી ટેકનિકલ અને દસ્તાવેજી પુરાવાઓની તપાસ શરૂ કરી હતી. ફોરેન્સિક એક્સપર્ટ અને વીમા કંપનીના રેકોર્ડ્સની તપાસમાં મનીષ શાહની સંડોવણીના સ્પષ્ટ પુરાવા (Evidence) મળી આવ્યા હતા. પોલીસે છેતરપિંડીમાં વપરાયેલા દસ્તાવેજો જપ્ત કર્યા છે. હાલ આરોપી પોલીસ કસ્ટડીમાં છે અને પોલીસે આ ગુનામાં અન્ય કોઈની સંડોવણી છે કે કેમ તે દિશામાં તપાસ તેજ કરી છે.

આ પણ વાંચોઃ Surat: MLA વિનુભાઈ મોરડીયાનું અસામાજિક તત્વોને અલ્ટીમેટમ, ગમે તેવો વગદાર હશે તો પણ...!