Surat News: પીપોદરા GIDC માં કરૂણ ઘટના, મશીનમાં દુપટ્ટો ફસાતાં મહિલા કામદારનું મોત

દુપટ્ટો મશીનમાં ખેંચાતા મહિલાનું ગળું પણ ખેંચાયું

મળતી માહિતી મુજબ, ઓરિસ્સાની વતની ત્રિવેણી રાના નામની મહિલા પીપોદરા સ્થિત એક લુમ્સના કારખાનામાં કામ કરતી હતી. કામ દરમિયાન અચાનક તેમનો દુપટ્ટો મશીનના ચાલતા ભાગમાં ફસાઈ ગયો હતો. દુપટ્ટો મશીનમાં ખેંચાતા મહિલાનું ગળું પણ તેની સાથે ખેંચાયું હતું, જેના કારણે તેમને ગળાના ભાગે ગંભીર ઈજાઓ પહોંચી હતી. આટલી ગંભીર સ્થિતિમાં મહિલાને બચાવવાની કોઈ તક મળી ન હતી અને ઘટના સ્થળે જ તેમનો પ્રાણપંખેરું ઉડી ગયું હતું.

સીસીટીવીમાં ઘટના કેદ

આ સમગ્ર હૃદયદ્રાવક ઘટના કારખાનામાં લાગેલા સીસીટીવી કેમેરામાં કેદ થઈ ગઈ હતી. ફૂટેજમાં જોઈ શકાય છે કે મહિલા કામ કરી રહી હતી ત્યારે અચાનક દુપટ્ટો લુમ્સ મશીનના ગિયરમાં ફસાઈ જાય છે અને ક્ષણવારમાં જ આ અકસ્માત સર્જાય છે. સીસીટીવી ફૂટેજ સામે આવતા જ ઉદ્યોગ જગતમાં અને સ્થાનિકોમાં ચકચાર મચી ગઈ છે. મહિલાના પરિવારજનોમાં પણ શોકની લાગણી પ્રસરી ગઈ છે.

પોલીસ તપાસ શરૂ

ઘટનાની જાણ થતા જ પાલોદ પોલીસનો કાફલો તાત્કાલિક સ્થળ પર દોડી આવ્યો હતો. પોલીસે મૃતદેહને પોસ્ટમોર્ટમ માટે હોસ્પિટલ ખસેડીને આગળની કાર્યવાહી હાથ ધરી છે. પ્રાથમિક તપાસમાં આ એક અકસ્માત હોવાનું જણાય છે, પરંતુ કારખાનામાં કામદારોની સુરક્ષાને લઈને પણ અનેક સવાલો ઉભા થઈ રહ્યા છે. પોલીસે મિલના સંચાલકોના નિવેદનો લેવાની પ્રક્રિયા શરૂ કરી છે.

આ પણ વાંચોઃ  Surat Fake Demolition: ચોમાસા ટાણે જ ગરબોના ઘર તોડનાર કોણ? નકલી ડિમોલિશન મામલે વિવાદ વકર્યો, સરકારે માગ્યો જવાબ