સુરતમાં મોટી દુર્ઘટના: મીંઢોળા નદીના ધસમસતા પ્રવાહમાં 20 વર્ષીય યુવક તણાયો

ચપ્પલ પકડવા જતાં પગ લપસ્યો અને નદીમાં ગરકાવ થયો

સ્થાનિક લોકો પાસેથી મળતી માહિતી અનુસાર, 20 વર્ષીય શિવશંકર શ્રીવાસ્તવ મલેકપોર ગામ પાસે આવેલા મીંઢોળા નદીના કોઝવે નજીક હાજર હતો. આ દરમિયાન અચાનક તેનું ચપ્પલ નદીના પાણીમાં પડીને તણાવા લાગ્યું હતું. ચપ્પલને પકડવાના પ્રયાસમાં યુવક કોઝવેના કિનારે પહોંચ્યો હતો, જ્યાં લીલ અને પાણીના જોરદાર પ્રવાહને કારણે તેનો પગ લપસી ગયો હતો. જોતજોતામાં યુવક ઊંડા પાણીમાં ખાબક્યો હતો અને નદીના તેજ પ્રવાહ માં તણાઈ ગયો હતો.

બારડોલી અને કડોદરા ફાયર ટીમોનું સંયુક્ત રેસ્ક્યૂ ઓપરેશન

યુવક પાણીમાં ડૂબી રહ્યો હોવાનું જોઈને આસપાસના લોકોએ બૂમાબૂમ કરી મૂકી હતી અને તાત્કાલિક સ્થાનિક પોલીસ તેમજ ફાયર વિભાગને જાણ કરી હતી. બનાવની ગંભીરતાને ધ્યાને રાખીને બારડોલી ફાયર બ્રિગેડ (Bardoli Fire Brigade) અને કડોદરા ફાયર બ્રિગેડની ટીમો બોટ અને લાઈફ જેકેટ્સ સહિતના રેસ્ક્યૂ સાધનો સાથે તાબડતોબ ઘટનાસ્થળે પહોંચી ગઈ હતી. ફાયર વિભાગના જવાનોએ નદીના વહેણમાં યુવકની શોધખોળ (Search Operation) માટે સઘન અભિયાન હાથ ધર્યું હતું.

સાંજ સુધી શોધખોળ છતાં કોઈ પત્તો નહીં, સ્થાનિક પોલીસ પણ જોડાઈ

પલસાણા પોલીસ સ્ટેશન (Palsana Police Station) નો કાફલો પણ ઘટનાસ્થળે પહોંચી ગયો હતો અને પરિસ્થિતિ પર કાબૂ મેળવ્યો હતો. ફાયર ફાઈટર્સ દ્વારા મોડી સાંજ સુધી નદીના ઊંડા પટમાં સતત સર્ચ ઓપરેશન ચલાવવામાં આવ્યું હતું, પરંતુ પાણીનો પ્રવાહ વધુ હોવાને કારણે યુવકની કોઈ ભાળ મળી શકી નહોતી. અંધારું થવા છતાં અને પ્રતિકૂળ સંજોગો વચ્ચે પણ વહીવટી તંત્ર દ્વારા યુવકને શોધવાના પ્રયાસો સતત ચાલુ રાખવામાં આવ્યા છે.

આ પણ વાંચો: સુરેન્દ્રનગરના વઢવાણમાં ઘરકંકાસમાં પતિ બન્યો હત્યારો: પત્નીને છરીના ઘા ઝીંકી રહેંસી નાખી, આરોપી પતિ ફરાર