Kirti Patel Surat Case: પોલીસ સ્ટેશન બહાર જ મચાવ્યો હોબાળો, કીર્તિ પટેલ અને સસ્પેન્ડેડ મહિલા પોલીસકર્મી સામે FIR

બદનક્ષીના કેસમાં હાજરી આપવા આવીને મચાવ્યો હોબાળો

મળતી વિગતો અનુસાર, કીર્તિ પટેલ અગાઉ નોંધાયેલા એક બદનક્ષીના કેસના સંદર્ભમાં પુણા પોલીસ સ્ટેશન ખાતે હાજરી આપવા માટે પહોંચી હતી. આ દરમિયાન તેની સાથે ભાવનગરની સસ્પેન્ડેડ મહિલા કોન્સ્ટેબલ નયના બારૈયા પણ હાજર હતી. પોલીસ મથકની અંદર અને બહાર કીર્તિ પટેલ અને નયના બારૈયાએ કોઈ બાબતને લઈને ઉગ્ર દલીલો કરી હતી અને પોલીસ સ્ટેશનના પટાંગણમાં જ મોટો હોબાળો મચાવ્યો હતો. સરકારી કામગીરીમાં રૂકાવટ અને કાયદો-વ્યવસ્થાનો ભંગ કરવા બદલ પુણા પોલીસે આ બંને વિરુદ્ધ ગુનો નોંધી આગળની તપાસ હાથ ધરી છે.

અગાઉ પણ ખંડણી અને અપહરણ જેવા ગંભીર ગુનાઓ છે દાખલ

ઉલ્લેખનીય છે કે કીર્તિ પટેલનો વિવાદો સાથે જૂનો નાતો રહ્યો છે. અગાઉ પણ ગુજરાતના જુદા જુદા શહેરોમાં તેની સામે મારામારી, ધમકી, ખંડણી અને અપહરણ જેવા અત્યંત ગંભીર ગુનાઓ દાખલ થઈ ચૂક્યા છે, જેમાં તેની ધરપકડ પણ થઈ હતી. સોશિયલ મીડિયા પર લાઈવ આવીને અન્ય લોકોને બિભત્સ ગાળો આપવા અને ધમકાવવા બદલ તે અગાઉ પણ જેલની હવા ખાઈ ચૂકી છે. હવે સુરતમાં પોલીસ સ્ટેશન બહાર જ કાયદાના લીરેલીરા ઉડાડતા પોલીસ તંત્રએ આકરી કાર્યવાહી કરવાનો સંકેત આપ્યો છે.

આ પણ વાંચો: Canada Firing: કેનેડામાં લાઈવ મ્યુઝિક ફેસ્ટિવલ દરમિયાન અંધાધૂંધ ફાયરિંગ: 2ના મોત, હુમલાખોર ફરાર