સુરત સમરસ હોસ્ટેલ બહાર ભારે હોબાળો: બોયઝ હોસ્ટેલમાં જમવામાં વંદો મળતાં વિદ્યાર્થીઓ લાલઘૂમ

ભોજનમાંથી વાંદો નીકળતાં જ મચ્યો હોબાળો

સમરસ બોયઝ હોસ્ટેલમાં રહેતા વિદ્યાર્થીઓ જ્યારે મેસમાં જમવા બેઠા હતા, ત્યારે પીરસવામાં આવેલી રસોઈમાંથી વાંદો નીકળતાં વિદ્યાર્થીઓ સ્તબ્ધ થઈ ગયા હતા. વિદ્યાર્થીઓએ આક્ષેપ કર્યો છે કે હોસ્ટેલમાં નિયમિતપણે હલકી ગુણવત્તાનું, વાસી અને ગંદકીયુક્ત ભોજન પીરસવામાં આવે છે, જેના કારણે વિદ્યાર્થીઓના સ્વાસ્થ્ય સામે સતત ગંભીર ખતરો તોળાતો રહે છે. આવી ઘોર બેદરકારીથી રોષે ભરાયેલા છાત્રોએ ભોજનનો બહિષ્કાર કરીને જમવાની થાળીઓ જમીન પર પટકી પોતાનો આક્રોશ વ્યક્ત કર્યો હતો.

ABVP આગેવાનો દોડી આવ્યા, ધરણા પ્રદર્શન શરૂ

ઘટનાની જાણ થતાં જ અખિલ ભારતીય વિદ્યાર્થી પરિષદ (ABVP)ના કાર્યકરો અને અગ્રણી શુભમ રાજપૂત (ABVP Leader Shubham Rajput) તાત્કાલિક સમરસ બોયઝ હોસ્ટેલ ખાતે પહોંચી ગયા હતા. ABVP ની આગેવાનીમાં વિદ્યાર્થીઓએ મેસના કોન્ટ્રાક્ટર અને હોસ્ટેલ વહીવટી તંત્ર વિરુદ્ધ જોરદાર સૂત્રોચ્ચાર કરીને ધરણા શરૂ કર્યા હતા. અગ્રણીઓએ ચીમકી આપી હતી કે ગર્લ્સ હોસ્ટેલની ઘટના બાદ પણ જો તંત્ર સુધર્યું ન હોય તો જવાબદાર અધિકારીઓ અને મેસ સંચાલકો સામે ફોજદારી રાહે પગલાં લેવા જોઈએ.

તંત્રની વારંવારની બેદરકારી સામે આક્રોશ

વિદ્યાર્થીઓએ જણાવ્યું હતું કે સરકારી અનુદાનથી ચાલતી આ સમરસ હોસ્ટેલમાં હજારો વિદ્યાર્થીઓ રહે છે, પરંતુ મેસમાં સ્વચ્છતાના કોઈ નિયમોનું પાલન થતું નથી. ફૂડ સેફ્ટી વિભાગ દ્વારા હોસ્ટેલના રસોડાની તાત્કાલિક તપાસ કરવામાં આવે, મેસનો કોન્ટ્રાક્ટ રદ કરી બ્લેકલિસ્ટ કરવામાં આવે અને જ્યાં સુધી કાયમી ધોરણે સ્વચ્છ ભોજનની વ્યવસ્થા સુનિશ્ચિત ન થાય ત્યાં સુધી આ આંદોલન ચાલુ રાખવાનો વિદ્યાર્થીઓએ સંકલ્પ કર્યો છે.

આ પણ વાંચો: સુરત VNSGU સમરસ હોસ્ટેલમાં મોટો હોબાળો: ખરાબ ભોજન મામલે વિદ્યાર્થિનીઓના ધરણા!