Surat: જન્મદિવસની ઉજવણી બની લોહિયાળ, CCTVમાં કેદ થયા ખૌફનાક દ્રશ્યો

પલસાણાના ઔદ્યોગિક વિસ્તારમાં જાહેરમાં મારામારીની ઘટના

મળતી માહિતી અનુસાર, સોનુ રાજપૂત પોતાના મિત્રના જન્મદિવસની ઉજવણી કરવા માટે પલસાણા આવ્યો હતો. ઉજવણી પૂર્ણ કરીને તે પરત ફરી રહ્યો હતો ત્યારે સોનુ પંડિત નામના યુવકે અન્ય ત્રણ સાથીદારો સાથે મળીને તેને અટકાવ્યો અને ઝપાઝપી શરૂ કરી. આ દરમિયાન આરોપીઓએ ઢીકા પાટુનો માર તેમજ ટેબલ જેવા સાધનો વડે સોનુ રાજપૂત પર બેફામ માર માર્યો હતો.

ઘટના સીસીટીવી કેમેરામાં કેદ

આ સમગ્ર મારામારીની ઘટના નજીકમાં લાગેલા સીસીટીવી કેમેરામાં કેદ થઈ ગઈ છે, જેના આધારે પોલીસ તપાસ આગળ વધારી રહી છે. આ ઘટનાનું મુખ્ય કારણ એક વર્ષ પહેલાં થયેલા કોઈ બબાલ અને અંગત અદાવત હોવાનું જાણવા મળ્યું છે. જૂની દુશ્મનાવટને કારણે આરોપીઓએ આવી ઘટનાને અંજામ આપ્યો હતો.

પલસાણા પોલીસ ઘટનાસ્થળે પહોંચી

આ ઘટનાની જાણ થતાં જ પલસાણા પોલીસ ઘટનાસ્થળે પહોંચી હતી. સોનુ રાજપૂતની ફરિયાદના આધારે સોનુ પંડિત સહિત અન્ય ત્રણ આરોપીઓ સામે મારામારી, હુમલો અને અન્ય કલમો હેઠળ ગુનો નોંધવામાં આવ્યો છે. પોલીસે આરોપીઓની ધરપકડ કરવા માટે તપાસ શરૂ કરી દીધી છે અને સીસીટીવી ફૂટેજના આધારે વધુ કાર્યવાહી કરવામાં આવશે.આવી ઘટનાઓથી સમાજમાં ભયનું વાતાવરણ ફેલાય છે.

આ પણ વાંચો:  Bhavnagar: દરગાહ નજીક ખૂની ખેલ, ચાર શખ્સો તીક્ષ્ણ હથિયારો લઇને યુવક પર તૂટી પડ્યાં, જૂની અદાવતનો બદલો કે અન્ય કારણ?