ધ્રાંગધ્રામાં મોટી કરૂણાંતિકા: સ્કૂલ બસનું તળિયું તૂટતાં 6 વર્ષના બાળકનું મોત

6 વર્ષિય દિવ્યરાજસિંહ સોલંકીનું નીપજ્યું મોત

આ કરૂણ દુર્ઘટનામાં ઓમ શાંતિ વિદ્યાલયમાં અભ્યાસ કરતા 6 વર્ષિય દિવ્યરાજસિંહ સોલંકી (Divyarajsinh Solanki) નામના માસૂમ બાળકે પોતાનો જીવ ગુમાવ્યો છે. બસનું તળિયું અચાનક તૂટી જતાં દિવ્યરાજસિંહ નીચે રસ્તા પર પટકાયો હતો અને ગંભીર રીતે ઈજાગ્રસ્ત થયો હતો. બસમાં સવાર અન્ય બાળકો અને ચાલકમાં અફરાતફરી મચી ગઈ હતી.

સારવાર મળે તે પહેલાં જ માસૂમ બાળકના પ્રાણ પંખેરું ઊડી ગયા

બનાવ બનતાં જ આસપાસના લોકો એકઠા થઈ ગયા હતા અને લોહીલુહાણ હાલતમાં માસૂમ બાળકને ત્વરિત સારવાર અર્થે હોસ્પિટલ ખસેડવાની તજવીજ હાથ ધરવામાં આવી હતી. જોકે, ઈજાઓ એટલી ગંભીર હતી કે તેને હોસ્પિટલ પહોંચાડીને સારવાર શરૂ કરાય તે પહેલાં જ બાળકે રસ્તામાં જ દમ તોડી દીધો હતો. બાળકના અકાળે અવસાનના સમાચાર મળતાં જ તેના પરિવારમાં આક્રંદ છવાઈ ગયો હતો.

RTO ની કામગીરી સામે ઉગ્ર રોષ

ખાનગી શાળાની બસમાં સુરક્ષા અને ફિટનેસના માપદંડોને નેવે મૂકીને વાહનો ચલાવવામાં આવતા હોવાના આક્ષેપ સાથે સ્થાનિકો અને વાલીઓમાં ભારે રોષ વ્યાપી ગયો છે. જર્જરિત બસના કારણે માસૂમ બાળકના મોત માટે શાળા સંચાલકો અને બસ માલિકની ઘોર બેદરકારીને જવાબદાર ગણાવવામાં આવી રહી છે. બનાવ અંગે પોલીસે ગુનો નોંધી આગળની કાયદેસરની તપાસ હાથ ધરી છે.