એડોબીના નવા સીઈઓ તરીકે અનિલ ચક્રવર્તીની ઐતિહાસિક નિમણૂક
માઈક્રોસોફ્ટના સત્યા નડેલા, ગૂગલના સુંદર પિચાઈ અને આઈબીએમના અરવિંદ કૃષ્ણાની યાદીમાં હવે અનિલ ચક્રવર્તીનું નામ પણ જોડાઈ ગયું છે. ફોટોશોપ અને ઇલસ્ટ્રેટર જેવા લોકપ્રિય સોફ્ટવેર બનાવતી બેતાલીસ વર્ષ જૂની આ કંપનીએ પોતાના ઇનસાઇડર લીડર અનિલ ચક્રવર્તીને કમાન સોંપી છે. તેઓ છેલ્લા અઢાર વર્ષથી કંપનીનું સુકાન સંભાળી રહેલા શાંતાનુ નારાયણનું સ્થાન લેશે. શાંતાનુ નારાયણ હવે કંપનીમાં એક્ઝિક્યુટિવ ચેરમેન તરીકે સેવા આપશે. આ નેતૃત્વ પરિવર્તન એવા સમયે થયું છે જ્યારે કંપની જનરેટિવ એઆઈના વધતા પ્રભાવ વચ્ચે પોતાના અબજો ડૉલરના સામ્રાજ્યને ટકાવી રાખવા માટે સંઘર્ષ કરી રહી છે.
અનિલ ચક્રવર્તીની શૈક્ષણિક સફર અને ભવ્ય કારકિર્દી
અનિલ ચક્રવર્તીની કારકિર્દી ટેકનિકલ કુશળતા અને કોર્પોરેટ મેનેજમેન્ટનો ઉત્તમ સમન્વય દર્શાવે છે. તેમણે આઈઆઈટી એટલે કે બીએચયુ વારાણસીમાંથી કમ્પ્યુટર સાયન્સમાં બીટેક ડિગ્રી મેળવી છે. ત્યારબાદ તેમણે મસાચુસેટ્સ ઇન્સ્ટિટ્યુટ ઓફ ટેક્નોલોજીમાંથી એમએસ અને પીએચડી પૂર્ણ કરી છે. એડોબીમાં જોડાતા પહેલા તેઓ ક્લાઉડ ડેટા મેનેજમેન્ટ કંપની ઇન્ફોર્મેટિકાના ચાર વર્ષ સુધી સીઈઓ રહી ચૂક્યા છે. તેઓ મેકિંસી, સિમેન્ટેક અને વેરીસાઈન જેવી દિગ્ગજ કંપનીઓમાં પણ મહત્વના પદો પર કાર્ય કરી ચૂક્યા છે. જાન્યુઆરી 2020માં એડોબી સાથે જોડાયા બાદ તેમણે ડિજિટલ એક્સપિરિયન્સ બિઝનેસ સંભાળ્યો હતો.
એડોબીના નવા મુખિયા સામે એઆઈ અને બજારની મોટી ચેલેન્જીસ
વર્તમાન સમયમાં એડોબીના નવા વડા સામે ત્રણ સૌથી મોટી અને ગંભીર ચિંતાઓ મોઢા ફાડીને ઊભી છે. પ્રથમ મોટો ખતરો જનરેટિવ એઆઈ તરફથી છે કારણ કે મિડજર્ની અને ઓપનએઆઈ જેવા ટૂલ્સ વગર ફોટોશોપ શીખે મિનિટોમાં આકર્ષક ડિઝાઇન બનાવી રહ્યા છે. બીજો મોટો પડકાર કેનવા અને ફિગ્મા જેવા બ્રાઉઝર-આધારિત ટૂલ્સ તરફથી મળી રહ્યો છે, જેણે નવા ડિઝાઇનર્સની વચ્ચે એડોબીના જૂના એકાધિકારને મોટો આંચકો આપ્યો છે. ત્રીજી સૌથી મોટી સમસ્યા વોલ સ્ટ્રીટનો ઘટતો વિશ્વાસ છે કારણ કે કંપનીના શેરમાં સતત ગરમાગરમી અને ઘટાડો જોવા મળી રહ્યો છે.
શાંતાનુ નારાયણનો અઢાર વર્ષનો યાદગાર અને સુવર્ણ કાળ
શાંતાનુ નારાયણે વર્ષ 2007માં એડોબીના સીઈઓ તરીકેનો પદભાર સંભાળ્યો હતો. તેમનો આખો કાર્યકાળ ટેક જગતના સૌથી સફળ પરિવર્તનોમાં સ્થાન ધરાવે છે. તેમણે સીડીમાં વેચાતા પરંપરાગત ફોટોશોપ સોફ્ટવેરને ક્રિએટિવ ક્લાઉડ સબ્સ્ક્રિપ્શન મોડેલમાં સફળતાપૂર્વક પરિવર્તિત કર્યું હતું. શરૂઆતમાં ભારે વિરોધનો સામનો કરવા છતાં આ નવા મોડેલે કંપનીને એક વિશાળકાય બ્રાન્ડ બનાવી દીધી હતી. શાંતાનુ નારાયણે આ વર્ષે માર્ચ મહિનામાં જ પોતાના પદ પરથી હટવાની ઈચ્છા વ્યક્ત કરી હતી. લાંબી પ્રક્રિયાના અંતે તેમણે પોતાના વિશ્વાસુ અને પસંદગીના ઉત્તરાધિકારી અનિલ ચક્રવર્તીને આ અહેમ જવાબદારી સોંપી છે.
આ પણ વાંચો---- Apple પર બ્રિટનમાં 2.7 અબજ ડૉલરનો કેસ, ટ્રેકિંગ નિયમો પર મોટા સવાલો
