Car Heater Safety Tips: ઠંડીમાં કારનું હીટર બની શકે છે 'સાયલન્ટ કિલર', જાણો કેવી રીતે?
- સાવધાન! કારમાં હીટર ચલાવીને સૂવું જીવલેણ સાબિત થયું
- નૈનીતાલમાં કારમાં ગરમી માટે હીટર ચાલુ રાખ્યુ અને મોત
- બંધ કેબિનમાં ઓક્સિજન ઘટતા ગૂંગળામણના કારણે સર્જાયો અકસ્માત
- હીટર સાથે 'એર રીસર્ક્યુલેશન' મોડ રાખવો હોઈ શકે છે અત્યંત જોખમી
- કાર્બન મોનોક્સાઇડ જેવા ઝેરી ગેસથી બચવા બારી ખોલવી અનિવાર્ય
Car Heater Safety Tips : શિયાળાની કકડતી ઠંડીમાં કારનું હીટર રાહત આપે છે, પરંતુ શું તમે જાણો છો કે આ જ હીટર તમારી જીવ લેવા માટે પૂરતું છે? તાજેતરમાં ઉત્તરાખંડના નૈનીતાલમાં બનેલી એક હૃદયદ્રાવક ઘટનાએ સૌને ચોંકાવી દીધા છે. નોઈડાથી આવેલા એક ડ્રાઈવરે ઠંડીથી બચવા કારમાં હીટર ચાલુ રાખીને સૂવાનું નક્કી કર્યું, પરંતુ બંધ કેબિનમાં ઓક્સિજન ઘટતા અને ઝેરી ગેસ વધતા તેનું કરૂણ મોત નીપજ્યું હતું. આ ઘટના બાદ હવે કારમાં હીટર વાપરવાની રીત અને તેની સુરક્ષા અંગે ગંભીર સવાલો ઉઠી રહ્યા છે.
ઝેરી ગેસ અને ઓક્સિજનની અછત
જ્યારે કારનું એન્જિન ચાલુ હોય અને હીટર લાંબા સમય સુધી ચાલે, ત્યારે કારના કેબિનમાં ઓક્સિજનનું સ્તર ઘટવા લાગે છે. જો કારમાં કોઈ લીકેજ હોય તો કાર્બન મોનોક્સાઇડ જેવા જીવલેણ ગેસ અંદર જમા થાય છે. આ ગેસ રંગહીન અને ગંધહીન હોવાથી વ્યક્તિને ખબર પણ નથી પડતી અને તે બેભાન થઈ જાય છે, જે મૃત્યુનું કારણ બની શકે છે.
Car Heater Safety Tips : એર રીસર્ક્યુલેશન મોડનો ભય
મોટાભાગના લોકો હીટર ચલાવતી વખતે 'એર રીસર્ક્યુલેશન' મોડ ચાલુ રાખે છે. આ મોડ બહારની તાજી હવાને અંદર આવતી અટકાવે છે અને અંદરની હવાને જ વારંવાર ફેરવે છે. ઠંડીમાં આ મોડ લાંબો સમય ચાલુ રાખવાથી કેબિનમાં હવા પ્રદૂષિત અને હાનિકારક બની જાય છે, જે શ્વાસ લેવામાં તકલીફ ઊભી કરે છે.
Car Heater Safety Tips : હીટર વાપરતી વખતે આ સાવધાની જરૂરી
નિષ્ણાતોના મતે, ગાડી સ્ટાર્ટ કર્યા પછી એન્જિનને 1 મિનિટ ગરમ થવા દો અને ત્યારબાદ જ હીટર ચાલુ કરો. તાપમાન 20 થી 22 ડિગ્રી સેલ્સિયસની વચ્ચે રાખવું જોઈએ. ક્યારેય પણ લાંબા સમય સુધી કેબિનને સંપૂર્ણ પેક ન રાખો. દર 10-15 મિનિટે એકાદ મિનિટ માટે કારની બારી થોડી ખોલો જેથી તાજી હવા અંદર આવી શકે.
આરોગ્ય પર થતી અસરો
વધારે પડતી ગરમીથી માત્ર ગૂંગળામણ જ નહીં, પણ ત્વચા અને આંખોમાં ડ્રાયનેસ (સૂકાપણું) પણ આવી શકે છે. હીટરના સતત ઉપયોગથી માથાનો દુખાવો કે ચક્કર આવવાની સમસ્યા થઈ શકે છે. તેથી, હંમેશા વેટિલેશનનું ધ્યાન રાખવું અને સમયાંતરે પાણી પીતા રહેવું સલાહભર્યું છે.
આ પણ વાંચો : જુદા-જુદા નથી હોતા ફિંગરપ્રિન્ટ્સ, AI એ જુની માન્યતા તોડી હવે બદલાશે ક્રાઇમ ઇન્વેસ્ટિગેશનની રીત?