• Gemini Nano Banana Saree ટ્રેન્ડ પાછળનો ખતરનાક સત્ય
• AI ટ્રેન્ડથી મજા કે ગોપનીયતાનો ભય?
• ઝલક ભવાનીનો અનુભવ ઉઘાડે AI ની ગુપ્ત શક્તિ
• Google Gemini Trend : સાડી લુકની આડમાં સુરક્ષાનો ખતરો
• ડિજિટલ ફૂટપ્રિન્ટથી AI જાણે તમારી છુપાયેલી ઓળખ
• Nano Banana Saree Trend : મનોરંજન કે જોખમ?
• ફોટા અપલોડ કરતા પહેલા બે વાર વિચારજો!

સોશિયલ મીડિયા પર હાલમાં 'Google Gemini Nano Banana Saree'નો ટ્રેન્ડ ધૂમ મચાવી રહ્યો છે. આ ટ્રેન્ડમાં લોકો પોતાના ફોટા AI દ્વારા સાડીના સુંદર લુકમાં બદલી રહ્યા છે. પરંતુ, શું આ મનોરંજક ટ્રેન્ડ ખરેખર સલામત છે? એક યુવતીના ચોંકાવનારા અનુભવે આ ટેકનોલોજીની ડરામણી બાજુ સામે લાવી છે.

Gemini AI અને વાયરલ ટ્રેન્ડ

Google નું નવું AI ફીચર, Gemini, યુઝર્સને તેમના સેલ્ફી અથવા ફોટાને 4K રેટ્રો પોટ્રેટમાં રૂપાંતરિત કરવાની સુવિધા આપે છે. ખાસ કરીને છોકરીઓ અને મહિલાઓ સાડી લુકના ફોટા બનાવવા માટે આ ફીચરનો બહોળા પ્રમાણમાં ઉપયોગ કરી રહી છે. શરૂઆતમાં, આ ટ્રેન્ડ ખૂબ જ મનોરંજક અને આકર્ષક લાગતો હતો, પરંતુ હવે તેની પાછળ છુપાયેલા જોખમો સામે આવી રહ્યા છે, જે યુઝર્સની ગોપનીયતા માટે મોટો ખતરો ઉભો કરી શકે છે.

ઝલક ભવાનીનો ભયાનક અનુભવ, Gemini પર કર્યો હતો ફોટો અપલોડ

ઇન્સ્ટાગ્રામ યુઝર ઝલક ભવાની (@jhalakbhawnan) એ પણ આ ટ્રેન્ડ અજમાવ્યો. તેણે લીલા સૂટમાં પોતાનો એક ફોટો અપલોડ કર્યો, અને AI એ તેને સાડીના સુંદર લુકમાં બદલી નાખ્યો. પ્રથમ નજરમાં ફોટો ખૂબ સુંદર લાગ્યો, પરંતુ જ્યારે તેમણે ફોટોને ધ્યાનથી જોયો, ત્યારે તેમના હોશ ઉડી ગયા.

AI દ્વારા જનરેટ થયેલા ફોટામાં, તેમના ડાબા હાથ પર એક તલ સ્પષ્ટપણે દેખાતો હતો. આ તલ ખરેખર તેમના શરીર પર હતો, પરંતુ અચરજની વાત એ હતી કે તેમણે Gemini પર જે ઓરિજિનલ ફોટો અપલોડ કર્યો હતો, તેમાં તેમણે લાંબી બાંયનો સૂટ પહેરેલો હતો, જેના કારણે તલ દેખાતો નહોતો.

આ ઘટનાએ એક મોટો સવાલ ઊભો કર્યો : Gemini ને કેવી રીતે ખબર પડી કે ઝલક ભવાનીના હાથ પર તલ છે?

ડિજિટલ ફૂટપ્રિન્ટ અને AI ની ગુપ્ત શક્તિ

ઝલક ભવાનીનો આ અનુભવ સોશિયલ મીડિયા પર વાયરલ થયો અને લાખો લોકોએ તેના પર પ્રતિક્રિયા આપી. લોકોએ તરત જ આના કારણો શોધવાનું શરૂ કર્યું. એક યુઝરે સમજાવ્યું કે AI તમારા ડિજિટલ ફૂટપ્રિન્ટમાંથી માહિતી એકત્રિત કરે છે. તેનો અર્થ એ કે, તમે ક્યારેક પણ તમારા ફોટા Google Photos, Facebook, Instagram કે અન્ય કોઈપણ પ્લેટફોર્મ પર અપલોડ કર્યા હોય, તો AI તે બધા ડેટાને એકસાથે જોડીને એક સંપૂર્ણ પ્રોફાઇલ બનાવી શકે છે.

કેટલાક નિષ્ણાતોએ ચેતવણી આપી કે, આજકાલ તમામ ટેકનોલોજી પ્લેટફોર્મ એકબીજા સાથે જોડાયેલા છે. તમે તમારા Gmail, Google Drive, કે અન્ય સોશિયલ મીડિયા પર જે ફોટા અપલોડ કરો છો, તે બધા એકબીજા સાથે ડેટા શેર કરી શકે છે. તેથી, ભલે તમે જે ફોટો અપલોડ કર્યો હોય, તેમાં તલ ન દેખાતો હોય, AI પાસે તમારા જૂના ફોટામાંથી આ માહિતી ઉપલબ્ધ હોઈ શકે છે.

મનોરંજનની આડમાં ગોપનીયતાનો ખતરો

ઝલક ભવાનીના કિસ્સાએ સ્પષ્ટ કર્યું છે કે, આવા AI ટ્રેન્ડ્સ માત્ર મજા પૂરતા સીમિત નથી, પરંતુ ગોપનીયતા માટે મોટો ખતરો પણ ઊભો કરે છે. જ્યારે તમે કોઈ AI પ્લેટફોર્મ પર ફોટો અપલોડ કરો છો, ત્યારે તમે તમારી વ્યક્તિગત માહિતીને ટેકનોલોજીના હવાલે કરો છો, જેનો ઉપયોગ કઈ રીતે થશે તે કહેવું મુશ્કેલ છે.

ઝલક ભવાનીએ પોતે પણ કહ્યું, "મને ખબર નથી કે આ ટેકનોલોજી આપણા વિશે કેટલી જાણકાર છે. AI પ્લેટફોર્મ પર પોતાના ફોટા અપલોડ કરતા પહેલા દરેક વ્યક્તિએ સાવચેત રહેવું જોઈએ."

શું સાવચેતી રાખવી?

• જો તમે આવા AI ટ્રેન્ડ્સમાં ભાગ લેવા માંગો છો, તો તમારી સુરક્ષા માટે કેટલીક સાવચેતીઓ રાખવી અત્યંત જરૂરી છે:
• સંવેદનશીલ ફોટા અપલોડ કરશો નહીં : ક્યારેય તમારા ખાનગી અથવા વ્યક્તિગત ફોટા AI પ્લેટફોર્મ પર શેર કરશો નહીં.
• મેટાડેટા સાફ કરો : ફોટા અપલોડ કરતા પહેલા તેનો મેટાડેટા (સ્થાન, ઉપકરણ, તારીખ વગેરે જેવી વિગતો) દૂર કરો. આ કરવાથી તમારી વ્યક્તિગત માહિતી લીક થવાનું જોખમ ઓછું થશે.
• ગોપનીયતા નીતિ વાંચો : કોઈપણ AI એપ્લિકેશનનો ઉપયોગ કરતા પહેલા તેની ગોપનીયતા નીતિ (Privacy Policy) કાળજીપૂર્વક વાંચો અને સમજો.

ઉલ્લેખનીય છે કે, આ ટ્રેન્ડ કદાચ હાલમાં ધૂમ મચાવી રહ્યો છે, પરંતુ ઝલક ભવાનીના અનુભવે આપણને વિચારવા મજબૂર કર્યા છે કે ડિજિટલ દુનિયામાં સુરક્ષા અને ગોપનીયતા કેટલી મહત્વપૂર્ણ છે. બે વાર વિચારો અને પછી જ તમારા ફોટા અપલોડ કરો, કારણ કે એક નાનકડી મજા ક્યારે મોટો ખતરો બની જાય તે કહી શકાતું નથી.

આ પણ વાંચો :  ફોટો અપલોડ કરો અને બનાવો તમારું 3D Figurine, જાણો કેવી રીતે બનાવશો