માણસોના Aadhar ની જેમ બેટરીને આંકડાની ઓળખ મળશે, જાણો કેવું છે આયોજન

• ભારત સરકાર દ્વારા બેટરીને લઇને નવતર અભિગમ દર્શાવાયો
• બેટરીની લાઇફ સાયકલનો રેકોર્ડ રાખવા નંબર અપાશે
• તમામ બેટરીના દસ્તાવેજોને સરકારી પોર્ટલ પર અપલોડ કરવા પડશે

Govt Propose Aadhar Like Number For Electric Batteries : જો તમે ઇલેક્ટ્રિક વાહન (EV) ચલાવો છો, અથવા ભવિષ્યમાં ઇલેક્ટ્રિક કાર અથવા અન્ય વાહન ખરીદવાનું આયોજન કરી રહ્યા છો, તો આ સમાચાર તમારા માટે છે. કેન્દ્રીય માર્ગ પરિવહન મંત્રાલયે ઇલેક્ટ્રિક વાહન બેટરીઓને "આધાર જેવો ઓળખ નંબર" આપવાનો પ્રસ્તાવ મૂક્યો છે. આનો હેતુ બેટરીનો ઉત્પાદનથી લઈને ઉપયોગ, રિસાયક્લિંગ અને અંતિમ નિકાલ સુધીનો સમગ્ર કાર્યકાળનો રેકોર્ડ જાળવવાનો છે. આ નંબર પારદર્શિતા અને સુરક્ષા સુનિશ્ચિત કરશે. સરળ શબ્દોમાં કહીએ તો, ભવિષ્યમાં, કોઈપણ EV બેટરી "અનામી" રહેશે નહીં. દરેક બેટરીનો સંપૂર્ણ રેકોર્ડ હશે.

તમામ ડેટા સરકારી પોર્ટલ પર રજીસ્ટર્ડ થશે

કેન્દ્રીય મંત્રી નીતિન ગડકરીના મંત્રાલય દ્વારા તૈયાર કરાયેલ ડ્રાફ્ટ માર્ગદર્શિકા અનુસાર, દરેક EV બેટરીને એક અનન્ય 21-અક્ષરનો બેટરી પેક આધાર નંબર (BPAN) આપવામાં આવશે. આ જવાબદારી બેટરી ઉત્પાદક, અથવા આયાતકાર પર રહેશે. વધુમાં, કાચા માલથી લઈને પરફોર્મન્સ અને રિસાયક્લિંગ સુધી, બેટરી સંબંધિત તમામ ડિજિટલ ડેટા સરકારી પોર્ટલ પર અપલોડ કરવો ફરજિયાત રહેશે.

BPAN બેટરીની ઓળખ બનશે

માર્ગદર્શિકામાં સ્પષ્ટપણે જણાવાયું છે કે, BPAN નંબર બેટરી સાથે એવી જગ્યાએ જોડાયેલ હશે, જ્યાં તે સરળતાથી દેખાય અને તેનો નાશ ન થાય. આનો અર્થ એ થયો કે જેમ આધાર નંબર વ્યક્તિની ઓળખ બની ગયો છે, તેમ BPAN બેટરીની ઓળખ બની જશે.

ફરી ઉપયોગમાં નવો નંબર જારી થશે

સરકાર માને છે કે, આ સિસ્ટમ બેટરી ઇકોસિસ્ટમમાં પારદર્શિતા, જવાબદારી અને ટકાઉપણું લાવશે. જો બેટરી રિસાયક્લિંગ અથવા પુનઃઉપયોગ (સેકન્ડ લાઇફ) માટે બદલવામાં આવે છે, તો ફેરફાર સાથે એક નવું BPAN જારી કરવામાં આવશે. આનાથી સ્પષ્ટતા થશે કે, કઈ બેટરીનો ઉપયોગ, ક્યારે અને કઈ સ્થિતિમાં થઈ રહ્યો છે.

બેટરીને પ્રાથમિકતા આપવાનો પ્રયાસ

ભારતની કુલ લિથિયમ-આયન બેટરી માંગના આશરે 80 થી 90 ટકા ઇલેક્ટ્રિક વાહનોનો હિસ્સો છે. તેથી, સરકાર પ્રારંભિક તબક્કામાં આ નવી સિસ્ટમમાં EV બેટરીને પ્રાથમિકતા આપવા માંગે છે. બેટરીની સલામતી, વ્યાપક ઉપયોગ અને પર્યાવરણીય પ્રભાવને કારણે આ પગલું મહત્વપૂર્ણ માનવામાં આવે છે.

ગ્રાહકોને સુરક્ષિત વિકલ્પ આપશે

બેટરી ઉત્પાદકો, EV કંપનીઓ, રિસાયકલર્સ અને નિયમનકારી એજન્સીઓના ઇનપુટને સમાવવા માટે આ માળખાને ઓટોમોટિવ ઇન્ડસ્ટ્રી સ્ટાન્ડર્ડ (AIS) હેઠળ અમલમાં મૂકવાની ભલામણ કરવામાં આવી છે. એવું કહેવાય છે કે આ પહેલ માત્ર પર્યાવરણને લાભ આપશે નહીં પરંતુ ગ્રાહકોને સુરક્ષિત અને વધુ વિશ્વસનીય ઇલેક્ટ્રિકલ મોબિલિટીનો વિકલ્પ આપશે.

આ પણ વાંચો -------  ઇલેક્ટ્રિસિટી વગર પણ Wi-Fi ડિવાઇસ ચાલશે, અજમાવો આ રીત