સાવધાન! 10 એપ્રિલથી હાઈવે પર ટોલ ટેક્સ રોકડમાં નહીં સ્વીકારાય, જાણો નવા નિયમો

સડક પરિવહન અને રાજમાર્ગ મંત્રાલય (Ministry of Road Transport and Highways) ના આદેશ અનુસાર, હવે ટોલ ટેક્સની ચૂકવણી રોકડમાં કરી શકાશે નહીં. ટોલ નાકા પર કેશ આપવાને કારણે લાગતી લાંબી લાઈનો અને સમયનો બગાડ અટકાવવા માટે આ કડક નિયમ લાગુ કરવામાં આવ્યો છે.

Toll Plaza Cash Payment : ફાસ્ટેગ બન્યું ફરજિયાત

 નવી વ્યવસ્થા હેઠળ હવે દરેક વાહન પર ફાસ્ટેગ (FASTag) હોવું અનિવાર્ય છે. ટોલની રકમ સીધી ફાસ્ટેગ એકાઉન્ટમાંથી કપાઈ જશે, જેથી વાહનોએ ઉભા રહ્યા વગર જ ટોલ પસાર કરી શકશે. જો કોઈ વાહનમાં ફાસ્ટેગ નહીં હોય, તો તેને યુપીઆઈ (UPI) દ્વારા ચૂકવણી કરવાનો વિકલ્પ મળશે, પરંતુ તેના માટે સામાન્ય દર કરતા 1.25 ગણો વધુ ચાર્જ આપવો પડશે.

નિયમ તોડનારા સામે કડક કાર્યવાહી

 જો કોઈ વાહન ચાલક ફાસ્ટેગ કે યુપીઆઈ દ્વારા પેમેન્ટ નહીં કરે, તો તેને હાઈવે પર પ્રવેશતા અટકાવવામાં આવશે અથવા વાહન હટાવી દેવામાં આવશે. આ ઉપરાંત, વાહન માલિકને ઈ-નોટિસ (E-Notice) પણ મોકલવામાં આવશે. જો નોટિસ મળ્યાના ત્રણ દિવસમાં ચૂકવણી નહીં થાય, તો બમણો દંડ ભરવો પડશે.

વાર્ષિક પાસની સુવિધા 

ખાનગી કાર માલિકો માટે વાર્ષિક પાસની પણ વ્યવસ્થા કરવામાં આવી છે. 3,075 રૂપિયામાં વાર્ષિક પાસ લઈને વર્ષમાં 200 વખત ટોલ પ્લાઝા પસાર કરી શકાય છે. તેમજ જે લોકોને ટોલમાંથી મુક્તિ મળે છે, તેમણે હવે માત્ર આઈડી કાર્ડ બતાવવાને બદલે "Exempted FASTag" લેવો પડશે. ભવિષ્યમાં NHAI મલ્ટી-લેન ફ્રી ફ્લો ટેકનોલોજી (Multi-lane Free Flow Technology) પર કામ કરી રહી છે, જેથી મુસાફરી વધુ ઝડપી બનશે.

આ પણ વાંચો : DarkSword : ક્લિક કર્યા વગર iPhone હેક થતા ખૌફ, Apple સતર્ક બન્યું !