Cyber Fraud: રક્ષક જ બન્યા ભક્ષકનો શિકાર, યુપીમાં 4 પોલીસ જવાનો સાથે 25 લાખની ઓનલાઈન છેતરપિંડી!

Cyber Fraud: મોટા નફાની લાલચ આપીને છેતરપિંડી આચરી

સમગ્ર ઘટનામાં સાયબર ઠગોએ યુપી પોલીસના જવાનોને ખોટા રોકાણ પ્લેટફોર્મ પર પૈસા લગાવવા માટે મજબૂર કર્યા હતા. આ ભેજાબાજો Botbro, Crossmarket અને MineCrypto નામના નકલી ઓનલાઈન ટ્રેડિંગ પ્લેટફોર્મ ચલાવતા હતા. તેઓ સામાન્ય લોકોને તેમજ પોલીસ જવાનોને રોકાણ કરેલી રકમ પર 8 થી 10 ટકા સુધીના ઉંચા વળતરની લાલચ આપતા હતા. આ નકલી સ્કીમમાં ફસાયેલા લોકો પોતાની મહેનતની કમાણી ગુમાવી બેઠા હતા.

Cyber Fraud: કોન્સ્ટેબલની એક ફરિયાદથી થયો મોટો ખુલાસો

આ આખા કૌભાંડની તપાસ સોનભદ્ર જિલ્લામાં તૈનાત કોન્સ્ટેબલ દીપક કુમાર વર્માની ફરિયાદ પછી શરૂ થઈ હતી. આ પોલીસ જવાને પોતાની ફરિયાદમાં જણાવ્યું હતું કે નકલી ઇન્વેસ્ટમેન્ટ સ્કીમના નામે તેમની પાસેથી 10.70 લાખ રૂપિયાની છેતરપિંડી થઈ છે. સોનભદ્રના પોલીસ અધિક્ષક (SP) અભિષેક વર્મા અને એડિશનલ એસપી ઋષભ રનવાલે આ વિશે માહિતી આપી હતી. બેંકિંગ વ્યવહારો અને ટેકનિકલ તપાસ કરતા માલૂમ પડ્યું કે આ ટોળકીએ કુલ 4 પોલીસ કર્મચારીઓ પાસેથી 25.03 લાખ રૂપિયા પડાવી લીધા હતા.

લખનઉથી ચાર રીઢા આરોપીઓની ધરપકડ

બેંક ખાતાના રેકોર્ડ્સ અને ટેકનિકલ લોકેશનના આધારે પોલીસે લખનઉમાં મોટો દરોડો પાડ્યો હતો. આ દરોડા દરમિયાન પોલીસે સુફિયાન, મોહમ્મદ દાનિશ, અરશદ સિદ્દીકી અને તુફૈલ ખાન નામના ચાર આરોપીઓની 30 જૂનના રોજ ધરપકડ કરી લીધી હતી. આ તમામ આરોપીઓ લખનઉના રહેવાસી છે. પોલીસે આ ગુનેગારો પાસેથી 5 મોબાઈલ ફોન, 1 લેપટોપ અને ગુનામાં વપરાયેલી 1 ફોર વ્હીલર ગાડી પણ કબજે લીધી છે.

બેંક ખાતા બદલીને પૈસા ઉપાડી લેતા હતા

પૂછપરછ દરમિયાન આરોપીઓએ સ્વીકાર્યું કે, તેઓ લોકોને ટૂંકા સમયમાં અસાધારણ નફો મેળવવાની લાલચ આપતા હતા. તેઓ ભોગ બનનાર વ્યક્તિના પૈસા અલગ-અલગ બેંક ખાતામાં ટ્રાન્સફર કરી દેતા હતા. ત્યારબાદ આ રકમ એટીએમ કે બેંકમાંથી ઉપાડીને આપસમાં વહેંચી લેતા હતા. સાયબર પોલીસે લોકોને અજાણ્યા વોટ્સએપ ગ્રૂપ અને નકલી ટ્રેડિંગ એડવાઈઝથી બચવા માટે ખાસ અપીલ કરી છે.

આ પણ વાંચો--- Haryana Murder Case : નહેરમાં લાશ, કિનારે સ્કૂટર અને પત્નીના મગરના આંસુ...પણ ડિલીટ થયેલા એ 49 ફોન કોલ્સે પલટી નાખી આખી વાર્તા!