WhatsAppએ અચાનક હજારો એકાઉન્ટ્સ કેમ રિવ્યૂમાં મૂક્યા?
મેટા (Meta) કંપની પોતાના પ્લેટફોર્મ પર સુરક્ષા જાળવી રાખવા અને સ્પામ, ઓનલાઇન ફ્રોડ, ફેક ન્યૂઝ તેમજ ઓટોમેટેડ મેસેજિંગ જેવી ગેરકાયદેસર પ્રવૃત્તિઓ પર અંકુશ મેળવવા માટે સમયાંતરે વિશેષ સુરક્ષા અભિયાન ચલાવે છે. આ જ કવાયતના ભાગરૂપે તાજેતરમાં વોટ્સએપની ઓટોમેટેડ સિક્યોરિટી સિસ્ટમે સિસ્ટમમાં શંકાસ્પદ જણાતા હજારો એકાઉન્ટ્સને અચાનક 24 કલાક માટે રિવ્યૂ મોડમાં મૂકી દીધા છે. સાંજના સમયે એપ વાપરતી વખતે ઘણા યુઝર્સને તેમના એકાઉન્ટ રિવ્યૂ હેઠળ હોવાનો મેસેજ મળ્યો હતો, જેમાં કંપની દ્વારા સ્પષ્ટ કરવામાં આવ્યું છે કે યુઝરના ડિવાઇસ અને એકાઉન્ટની પ્રવૃત્તિઓની ગહન તપાસ પૂર્ણ થયા બાદ 24 કલાકની અંદર યોગ્ય નિર્ણય લેવામાં આવશે.
શું વોટ્સએપ તમારી અંગત ચેટ્સ વાંચે છે?
સામાન્ય રીતે લોકો એવું માને છે કે વોટ્સએપ તેમની ચેટ્સ વાંચીને એકાઉન્ટ સામે પગલાં લે છે, પરંતુ વાસ્તવિકતા તદ્દન અલગ છે. વોટ્સએપ પર મોકલાતા તમામ અંગત મેસેજ 'એન્ડ-ટુ-એન્ડ એન્ક્રિપ્શન'થી સુરક્ષિત હોવાને કારણે ખુદ કંપની પણ તેની અંદરનો કન્ટેન્ટ વાંચી શકતી નથી. આમ છતાં, પ્લેટફોર્મ પર સુરક્ષા જાળવવા માટે કંપની યુઝરની મેસેજિંગ પેટર્ન અને પ્રવૃત્તિઓ પર ચોક્કસ નજર રાખે છે. જેમાં એક દિવસમાં મોકલેલા મેસેજની સંખ્યા, અજાણ્યા નંબરો સાથેનો સંપર્ક, અન્યો દ્વારા મળેલા રિપોર્ટ્સ, થર્ડ-પાર્ટી અથવા અનઅધિકૃત સોફ્ટવેરનો ઉપયોગ તેમજ ઓટોમેટેડ પ્રવૃત્તિઓ જેવી બાબતોનું મૂલ્યાંકન કરવામાં આવે છે. આ પ્રકારની બિહેવિયરલ માહિતીના આધારે જ AI-આધારિત આધુનિક સિસ્ટમ કોઈ પણ એકાઉન્ટ શંકાસ્પદ છે કે નહીં તેનો આખરી નિર્ણય લે છે.
કેવી રીતે કામ કરે છે WhatsAppની AI આધારિત રિવ્યૂ સિસ્ટમ?
વોટ્સએપ પોતાના ફ્લેટફોર્મ પર સુરક્ષા જાળવવા માટે મશીન લર્નિંગ અને આર્ટિફિશિયલ ઇન્ટેલિજન્સ (AI) આધારિત અત્યાધુનિક સિસ્ટમનો ઉપયોગ કરે છે. આ AI સિસ્ટમ રોજિંદા ધોરણે લાખો એકાઉન્ટ્સની પ્રવૃત્તિઓનું સતત ગહન વિશ્લેષણ કરતી રહે છે. આ મોનિટરિંગ દરમિયાન જો કોઈ પણ એકાઉન્ટનું વર્તન કે મેસેજિંગ પેટર્ન સામાન્ય યુઝર કરતાં અલગ અથવા શંકાસ્પદ જણાય, તો સિસ્ટમ તેને તુરંત રિવ્યૂ મોડમાં મોકલી આપે છે. જો વિશ્લેષણ દરમિયાન એકાઉન્ટનો ઉપયોગ સ્પામ ફેલાવવા કે અન્ય કોઈ ગેરરીતિ માટે થતો હોવાનું માલૂમ પડે, તો સિસ્ટમ વિના વિલંબે તેની સામે કડક કાર્યવાહી કરે છે. જોકે, આ પૂરેપૂરી ઓટોમેટેડ પ્રક્રિયા હોવાના કારણે કેટલીકવાર અલ્ગોરિધમિક ભૂલથી સામાન્ય અને નિર્દોષ યુઝર્સ પણ અજાણતા આ કાર્યવાહીની ઝપેટમાં આવી જતા હોય છે.
કયા કારણોથી તમારું WhatsApp એકાઉન્ટ Reviewમાં જઈ શકે?
વોટ્સએપ પર યુઝર દ્વારા કરવામાં આવતી કેટલીક ભૂલો અથવા અસામાન્ય પ્રવૃત્તિઓને કારણે તેમનું એકાઉન્ટ સિક્યોરિટી રિવ્યૂમાં મુકાઈ શકે છે. આનું પહેલું મોટું કારણ ટૂંકા સમયમાં ઘણા અજાણ્યા નંબરો પર બલ્ક મેસેજ, પ્રમોશનલ કન્ટેન્ટ કે સતત જાહેરાતો ફોરવર્ડ કરવી છે. બીજા કારણમાં, જો અન્ય યુઝર્સ તમારા નંબર સામે સતત સ્પામ કે ફ્રોડના રિપોર્ટ્સ નોંધાવે, તો પણ સિસ્ટમ પગલાં લે છે. ત્રીજું અને ખૂબ મહત્વનું કારણ 'GB WhatsApp' કે 'WhatsApp Plus' જેવી અનઅધિકૃત મોડિફાઇડ એપ્સનો ઉપયોગ છે, જેનાથી ડેટા લીક થવાની સાથે એકાઉન્ટ પર કાયમી બેન પણ લાગી શકે છે. આ ઉપરાંત, મિશેસિયસ કે ફિશિંગ લિંક્સ અને ફેક ન્યૂઝ સતત શેર કરવાથી તેમજ બિઝનેસ માટે અનઅધિકૃત ઓટો-મેસેજિંગ કે બલ્ક માર્કેટિંગ ટૂલ્સનો ઉપયોગ કરવાથી પણ પ્લેટફોર્મની AI સિસ્ટમ એકાઉન્ટને શંકાસ્પદ ગણીને રિવ્યૂ મોડમાં મૂકી દે છે.
શું Review એટલે એકાઉન્ટ Ban?
ઘણા યુઝર્સ એવું માને છે કે વોટ્સએપ એકાઉન્ટ રિવ્યૂમાં જવાનો મતલબ તે કાયમી ધોરણે બંધ થઈ ગયું છે, પરંતુ વાસ્તવિકતામાં રિવ્યૂ અને પરમેનન્ટ બેન બંને તદ્દન અલગ સ્થિતિઓ છે. રિવ્યૂનો સીધો અર્થ એ છે કે કંપનીની સિક્યોરિટી સિસ્ટમ દ્વારા તમારા એકાઉન્ટની પ્રવૃત્તિઓની માત્ર પ્રાથમિક તપાસ ચાલી રહી છે, જેની પ્રક્રિયા સામાન્ય રીતે 24 કલાકમાં પૂર્ણ થઈ જતી હોય છે અને જો ચકાસણી દરમિયાન કોઈ ગંભીર ગેરરીતિ ન માલૂમ પડે તો એકાઉન્ટ ફરીથી પહેલાંની જેમ શરૂ થઈ શકે છે. તેની સરખામણીએ પરમેનન્ટ બેન એ એક અત્યંત કડક કાર્યવાહી છે, જેમાં એકાઉન્ટ કાયમી ધોરણે નિષ્ક્રિય કરી દેવામાં આવે છે અને તે જ નંબર પર સેવાનો ફરી ઉપયોગ કરવો શક્ય રહેતો નથી, જેના કારણે યુઝરે નવો જ નંબર મેળવવો પડે છે.
WhatsApp એકાઉન્ટ Reviewમાં મુકાઈ જાય તો શું કરવું?
જો તમારું વોટ્સએપ એકાઉન્ટ અચાનક રિવ્યૂમાં જતું રહે, તો ચિંતા કરવાની બિલકુલ જરૂર નથી, કારણ કે મોટાભાગના કિસ્સાઓમાં 24 કલાકની અંદર સિસ્ટમ દ્વારા તપાસ પૂર્ણ કરીને એકાઉન્ટ આપમેળે પુનઃસક્રિય કરી દેવામાં આવે છે. જો તમને સ્ક્રીન પર 'Request a Review' (રિવ્યૂ માટે વિનંતી) નો વિકલ્પ જોવા મળે, તો તેનો તુરંત જ ઉપયોગ કરવો જોઈએ. આ પ્રક્રિયા દરમિયાન વોટ્સએપની સપોર્ટ ટીમને સ્પષ્ટતાપૂર્વક જણાવવું કે તમે પ્લેટફોર્મના કોઈ પણ નિયમોનું ઉલ્લંઘન કર્યું નથી અને આ એકાઉન્ટનો ઉપયોગ માત્ર સામાન્ય તેમજ વ્યવહારુ હેતુ માટે જ થઈ રહ્યો છે. આવી યોગ્ય રજૂઆત કરવાથી સપોર્ટ ટીમ તમારી વિનંતીને પ્રાથમિકતા આપીને એકાઉન્ટ ઝડપથી પૂર્વવત્ કરી આપે છે.
હંમેશા ફક્ત ઓફિશિયલ WhatsAppનો જ ઉપયોગ કરો
ઓનલાઇન ગોપનીયતા અને ડિવાઇસની સુરક્ષા જાળવી રાખવા માટે હંમેશા વોટ્સએપના અધિકૃત પ્લેટફોર્મનો જ ઉપયોગ કરવો હિતાવહ છે. જો તમારા સ્માર્ટફોનમાં GB WhatsApp કે તેના જેવી કોઈ પણ થર્ડ-પાર્ટી અથવા મોડિફાઇડ એપ ઇન્સ્ટોલ કરેલી હોય, તો ડિવાઇસના ડેટાને જોખમમાંથી બચાવવા માટે તેને તરત જ અનઇન્સ્ટોલ કરી દેવી જોઈએ. એકાઉન્ટ પર કાયમી બેન લાગવાથી બચવા તેમજ સુરક્ષિત મેસેજિંગ અનુભવ મેળવવા માટે માત્ર ગૂગલ પ્લે સ્ટોર (Google Play Store) કે એપલ એપ સ્ટોર (Apple App Store) પરથી જ ઓરિજિનલ WhatsApp ડાઉનલોડ કરીને તેનો ઉપયોગ કરવાની સલાહ આપવામાં આવે છે.
WhatsApp અપડેટ રાખો અને 24 કલાક પછી પણ સમસ્યા રહે તો શું કરવું?
સુરક્ષા સંબંધિત ખામીઓ અને ટેકનિકલ સમસ્યાઓથી બચવા માટે વોટ્સએપને હંમેશા લેટેસ્ટ વર્ઝનમાં અપડેટ રાખવું અત્યંત જરૂરી છે, કારણ કે જૂની એપ્લિકેશન ઘણીવાર સુરક્ષા જોખમો ઊભા કરી શકે છે. જો તમારું એકાઉન્ટ રિવ્યૂમાં ગયું હોય અને 24 કલાકનો સમય વીતી ગયા પછી પણ પુનઃસક્રિય ન થાય, તો ગભરાયા વગર સીધો વોટ્સએપ સપોર્ટ ટીમનો સંપર્ક કરવો જોઈએ. સપોર્ટ ટીમને ઈમેલ કરતી વખતે કન્ટ્રી કોડ સાથેનો તમારો રજિસ્ટર્ડ મોબાઈલ નંબર, ઉદ્ભવેલી સમસ્યાનો સ્પષ્ટ સ્ક્રીનશોટ અને મુશ્કેલી અંગેની તમામ વિગતવાર માહિતી ચોક્કસથી મોકલવી, જેથી તમારી સમસ્યાનો ઝડપથી ઉકેલ આવી શકે.
ભવિષ્યમાં WhatsApp Ban કે Reviewથી કેવી રીતે બચવું?
વોટ્સએપ એકાઉન્ટને ભવિષ્યમાં સસ્પેન્શન, રિવ્યૂ કે કાયમી બેન થવાથી બચાવવા માટે કેટલીક પાયાની સાવચેતીઓ રાખવી અત્યંત જરૂરી છે. આ માટે હંમેશાં ગૂગલ પ્લે સ્ટોર કે એપ સ્ટોર પરથી ડાઉનલોડ કરેલી ઓફિશિયલ એપનો જ ઉપયોગ કરવો, એકાઉન્ટ સિક્યોરિટી માટે ટૂ-સ્ટેપ વેરિફિકેશન (2FA) ચાલુ રાખવું અને કોઈ પણ સ્પામ કે અનઅધિકૃત ઓટો-મેસેજિંગ સોફ્ટવેરથી દૂર રહેવું. તે ઉપરાંત, અજાણ્યા નંબરો પર વારંવાર મેસેજ કરવા, એક જ મેસેજ મોટા પ્રમાણમાં ફોરવર્ડ કરવો, ચકાસ્યા વગરની લિંક્સ કે ફેક ન્યૂઝ ફેલાવવા અને ગ્રુપ્સમાં સતત પ્રમોશનલ પોસ્ટ્સ મૂકવાનું ટાળવું જોઈએ. અહીં નોંધનીય છે કે ઓટોમેટેડ AI સિસ્ટમની અલ્ગોરિધમિક ભૂલને કારણે ક્યારેક કોઈ પણ ગેરરીતિ વિના સામાન્ય અને નિર્દોષ યુઝર્સના એકાઉન્ટ પણ રિવ્યૂમાં મુકાઈ શકે છે, પરંતુ આવી સ્થિતિમાં કંપની જરૂરી ચકાસણી પૂર્ણ કરીને શક્ય તેટલી ઝડપે એકાઉન્ટને પુનઃસક્રિય કરી દેતી હોય છે.
આ પણ વાંચો : WhatsApp Username : મોડું ન કરતા! ઇન્સ્ટાગ્રામની જેમ વોટ્સએપ પર પણ બીજા કોઈ તમારું નામ રિઝર્વ કરી લે તે પહેલાં આ કરો
