મેટા (Meta) 1 ઓક્ટોબર, 2026થી બિઝનેસ મેસેજિંગ (Business Messaging)ના દરોમાં ફેરફાર કરવા જઈ રહી છે. નવી સિસ્ટમ હેઠળ કંપનીઓ દ્વારા ગ્રાહકોને મોકલાતા કેટલાક સર્વિસ (Service), યુટિલિટી (Utility) અને ઓથેન્ટિકેશન (Authentication) મેસેજ માટે ચાર્જ વસૂલવામાં આવશે.
શું સામાન્ય WhatsApp યુઝર્સે પૈસા ચૂકવવા પડશે?
ના. સામાન્ય વોટ્સએપ યુઝર્સ માટે મિત્રો, પરિવારજનો અથવા અન્ય લોકો સાથે ચેટ કરવી પહેલાની જેમ જ મફત રહેશે. જો કોઈ યુઝર WhatsApp મારફતે કોઈ બિઝનેસનો સંપર્ક કરે તો પણ ગ્રાહકને મેસેજ મોકલવા માટે કોઈ ચાર્જ ચૂકવવો પડશે નહીં. નવી બિલિંગ સિસ્ટમ (Billing System) માત્ર એવા વ્યવસાયો માટે છે જે મોટા પાયે ગ્રાહકો સાથે સંપર્ક કરવા માટે WhatsApp Business Platformનો ઉપયોગ કરે છે.
કયા બિઝનેસ પર પડશે અસર? (WhatsApp Message Charge)
આ નવા નિયમોની સૌથી વધુ અસર બેંકો (Banks), ઈ-કોમર્સ પ્લેટફોર્મ (E-commerce Platforms), મોટા સ્ટાર્ટઅપ્સ (Startups) અને અન્ય કંપનીઓ પર પડશે, જે ગ્રાહકોને ઓટોમેટેડ મેસેજ (Automated Messages) મોકલે છે. ઉદાહરણ તરીકે, બેંક દ્વારા મોકલવામાં આવતા એકાઉન્ટ એલર્ટ (Account Alert), ઓનલાઇન શોપિંગ પ્લેટફોર્મના ડિલિવરી અપડેટ (Delivery Update), કંપનીઓ દ્વારા મોકલાતા OTP અથવા કસ્ટમર કેર (Customer Care)ના જવાબ જેવા મેસેજ બિઝનેસ મેસેજિંગ સિસ્ટમ દ્વારા મોકલવામાં આવે છે.
1 ઓક્ટોબરથી શું બદલાશે?
1 ઓક્ટોબરથી બિઝનેસ દ્વારા મોકલાતા સર્વિસ મેસેજ સંપૂર્ણપણે મફત નહીં રહે. દરેક બિઝનેસ ફોન નંબરને દર મહિને 1,000 સર્વિસ મેસેજ મફતમાં મોકલવાની મંજૂરી મળશે. આ મર્યાદા પૂરી થયા બાદ વધારાના મેસેજ માટે કંપનીઓએ ચાર્જ ચૂકવવો પડશે. નવા નિયમો મુજબ 24 કલાકની કસ્ટમર સર્વિસ વિન્ડો (Customer Service Window) દરમિયાન મોકલાતા કેટલાક યુટિલિટી મેસેજ પર પણ ચાર્જ લાગશે. જોકે, 24 કલાકની કસ્ટમર સર્વિસ વિન્ડો બંધ કરવામાં આવી રહી નથી.
કંપનીઓએ કેટલો ચાર્જ ચૂકવવો પડશે?
ભારતમાં રહેલા રિસીપિયન્ટ્સ (Recipients) માટે મેટાની ઓક્ટોબર 2026 રેટ લિસ્ટ મુજબ યુટિલિટી, ઓથેન્ટિકેશન અથવા સર્વિસ મેસેજ પર ટેક્સ પહેલાં લગભગ ₹0.115 પ્રતિ મેસેજનો ચાર્જ છે. 18 ટકા GST ઉમેર્યા બાદ આ રકમ લગભગ 14 પૈસા પ્રતિ મેસેજ થાય છે. બીજી તરફ માર્કેટિંગ મેસેજ (Marketing Messages), પ્રમોશનલ ઓફર્સ (Promotional Offers) અને સેલ્સ મેસેજ માટેનો ચાર્જ વધુ છે. ટેક્સ પહેલાં આવા મેસેજ માટે લગભગ ₹0.8631 પ્રતિ ડિલિવર્ડ મેસેજનો દર નક્કી કરવામાં આવ્યો છે.
સામાન્ય યુઝર્સ માટે તેનો અર્થ શું?
સામાન્ય WhatsApp યુઝર્સ માટે વ્યક્તિગત મેસેજ મોકલવા પર કોઈ નવો ચાર્જ લાગુ કરવામાં આવ્યો નથી. આ બદલાવ માત્ર એવા વ્યવસાયો માટે છે જે મોટા પ્રમાણમાં ગ્રાહકોને મેસેજ મોકલવા માટે WhatsAppના બિઝનેસ ઇન્ફ્રાસ્ટ્રક્ચર (Business Infrastructure)નો ઉપયોગ કરે છે. એટલે જો તમને WhatsApp પર બેંક એલર્ટ, OTP, ઓર્ડર અપડેટ અથવા કસ્ટમર કેરનો જવાબ મળે તો નવા નિયમો હેઠળ તે મેસેજ મોકલનાર કંપનીએ Metaને ચાર્જ ચૂકવવો પડી શકે છે. ગ્રાહકે આવા મેસેજ માટે કોઈ ચાર્જ ચૂકવવાનો રહેશે નહીં.
આ પણ વાંચો : Nvidia AI Agent Safety : AI એજન્ટને રોકવા Nvidiaએ બનાવ્યું ‘ડિજિટલ સુરક્ષા કવચ’, મિલિસેકન્ડમાં થશે Quarantine
આ પણ વાંચો : WhatsApp chat themes update: વ્હોટ્સએપ પર જલ્દી બદલાશે ચેટિંગનો અંદાજ, જાણો નવા ફીચરની ખાસિયતો
