વોટ્સએપમાં આવી રહ્યું છે પ્રાઇવસીનું નવું મોટું અપડેટ
મેટા માલિકીની કંપની વોટ્સએપે સત્તાવાર અહેવાલમાં જણાવ્યું છે કે આ અઠવાડિયાથી જ ગ્રાહકો પોતાની પસંદગીના યુઝરનેમ રિઝર્વ કરવાની પ્રક્રિયા શરૂ કરી શકશે. જોકે, આ સુવિધા વૈશ્વિક સ્તરે તમામ યૂઝર્સ માટે ધીમે-ધીમે તબક્કાવાર રીતે બહાર પાડવામાં આવશે. જે દેશોમાં આ અપડેટ ઉપલબ્ધ થશે, ત્યાં યૂઝર્સને એપ્લિકેશનની અંદર જ ડાયરેક્ટ નોટિફિકેશન આપીને તેની સવિસ્તાર માહિતી આપવામાં આવશે, જેથી તેઓ સમયસર પોતાનું વિશિષ્ટ નામ સુરક્ષિત કરી શકે.
10 આંકડાનો ખાનગી મોબાઈલ નંબર હતો અનિવાર્ય
વોટ્સએપ પર કોઈની પણ સાથે વાતચીત શરૂ કરવા માટે સામે વાળી વ્યક્તિ પાસે આપણો 10 આંકડાનો ખાનગી મોબાઈલ નંબર હોવો અનિવાર્ય હતો. પરંતુ હવે ટેલિગ્રામ એપ્લિકેશનની જેમ જ માત્ર યુઝરનેમના માધ્યમથી સુરક્ષિત કનેક્શન સ્થાપિત કરી શકાશે, જે પ્રાઇવસીના ક્ષેત્રમાં એક બહુ મોટું કદમ માનવામાં આવે છે.
સોસાયટી કે ઓફિસ ગ્રુપમાં જોડાતી વખતે તે કેવી રીતે આપશે સુરક્ષા?
આ નવીનતમ સિસ્ટમ હેઠળ, જો તમે એકવાર તમારું યુનિક યુઝરનેમ સેટ કરી લો છો, તો પહેલીવાર તમારી સાથે ચેટ કરનાર અજાણ્યા શખ્સને તમારો વાસ્તવિક મોબાઈલ નંબર બિલકુલ દેખાશે નહીં. કંપનીના જણાવ્યા મુજબ, આજે લાખો લોકો પોતાની રોજિંદી જરૂરિયાતો જેવી કે કોઈ ચોક્કસ ઇવેન્ટ, ઓનલાઇન ક્લાસ, ઓફિસ પ્રોજેક્ટ્સ, રેસિડેન્શિયલ સોસાયટી અથવા પબ્લિક ગ્રુપ્સમાં જોડાવા માંગે છે, પરંતુ તેઓ સુરક્ષાના કારણોસર પોતાનો અંગત નંબર દરેક સાથે શેર કરવા ઈચ્છતા નથી. યૂઝર્સની આ નડી રહેલી મોટી સમસ્યાને કાયમી ધોરણે દૂર કરવા માટે જ કંપની આ ફીચર લઈને આવી છે.
વિશ્વભરમાં વોટ્સએપના 3 અબજ કરતા પણ સક્રિય યૂઝર્સ
હાલમાં વિશ્વભરમાં વોટ્સએપના 3 અબજ કરતાં પણ વધારે સક્રિય યૂઝર્સ છે. આટલી વિશાળ વસ્તીમાં ઘણા લોકોની નામની પસંદગી એક સમાન હોઈ શકે છે. આથી જ કોઈ અન્ય વ્યક્તિ તમારી ઓળખનું નામ ચોરી ન લે, તે માટે કંપનીએ ફીચરના સત્તાવાર લોન્ચિંગ પહેલાથી જ નામ રિઝર્વ કરવાની આ ઓપન વિન્ડો શરૂ કરી દીધી છે.
ઓટોમેટિક યુઝરનેમ જનરેટરના સજેશન આવશે
જે યૂઝર્સને પોતાના માટે એક આકર્ષક અને વિશિષ્ટ નામ પસંદ કરવામાં મુશ્કેલી પડશે, તેમના માટે કંપની એપ્લિકેશનની અંદર જ એક ઇન-બિલ્ટ આર્ટિફિશિયલ ઇન્ટેલિજન્સ આધારિત યુઝરનેમ જનરેટર ટૂલ મફતમાં પ્રદાન કરશે. આ ટૂલ યૂઝરની પ્રોફાઇલ અને પસંદગીના આધારે સ્ક્રીન પર કેટલાક સુરક્ષિત નામોના સૂચનો બતાવશે, જેમાંથી કોઈપણ એક નામ પર ક્લિક કરીને તેને સેટ કરી શકાશે.
કન્ટેન્ટ ક્રિએટર્સ માટે મેટા પ્લેટફોર્મ પર સમાન ઓળખ ઉભી કરવાની સુવિધા
આ ક્રાંતિકારી સુવિધા ખાસ કરીને ડિજિટલ કન્ટેન્ટ ક્રિએટર્સ, સોશિયલ મીડિયા ઇન્ફ્લુએન્સર્સ, નાના વ્યાપારીઓ અને સામાજિક સંસ્થાઓ માટે માર્કેટિંગના હેતુથી બહુ ઉપયોગી સાબિત થશે. જો તેમની પાસે ફેસબુક અથવા ઇન્સ્ટાગ્રામ પ્લેટફોર્મ પર અગાઉથી જ કોઈ વેરિફાઇડ આઈડી ઉપલબ્ધ હોય, તો તેઓ તે જ સમાન નામને વોટ્સએપ પર પણ સત્તાવાર રીતે ક્લેમ કરી શકશે. આનાથી તમામ મેટા પ્લેટફોર્મ્સ પર તેમની બ્રાન્ડ વેલ્યુ અને વ્યાપારી ઓળખ એકસરખી જળવાઈ રહેશે.
સચોટ અને સાચુ યુઝર્સનેમ હોવુ અત્યંત આવશ્યક
જોકે, વોટ્સએપે સ્પષ્ટતા કરી છે કે આ સુધારો થયા પછી પણ તે કોઈ પબ્લિક સોશિયલ મીડિયા પ્લેટફોર્મ બનવા જઈ રહ્યું નથી. અહીં યુઝરનેમ સર્ચ કરવા માટે ગૂગલ જેવી કોઈ સાર્વજનિક ડાયરેક્ટરી ઉપલબ્ધ હશે નહીં. કોઈ વ્યક્તિનો સંપર્ક કરવા માટે તમારી પાસે તેનું સાચું અને સચોટ યુઝરનેમ હોવું અત્યંત જરૂરી રહેશે.
સિક્યોરિટી માટે ખાસ તૈયાર કરાયેલી આધુનિક 'યુઝરનેમ કી'
યૂઝર્સની સાયબર સુરક્ષાને સર્વોચ્ચ અગ્રતા આપતા મેટા કંપનીએ આ અપડેટ સાથે એક નવીનતમ 'યુઝરનેમ કી' પ્રોટોકોલ સિસ્ટમ પણ ડેવલપ કરી છે (WhatsApp Username Key Security). જો કોઈ ગ્રાહક ઈચ્છે તો તે પોતાના સેટિંગ્સમાં જઈને આ વધારાના સિક્યોરિટી ઓપ્શનને મેન્યુઅલી ઓન કરી શકે છે. આ ઓપ્શન સક્રિય થયા બાદ, જો કોઈ અજાણી વ્યક્તિ તમને પહેલીવાર મેસેજ મોકલવાનો પ્રયત્ન કરશે, તો તેને માત્ર યુઝરનેમ સિવાય તમારી પર્સનલ 'કી' એન્ટર કરવાની પણ જરૂર પડશે. આ એડવાન્સ લેયર પ્રોટેક્શનના કારણે અજાણ્યા ઓનલાઇન ફ્રોડ કરનારા તત્વો માટે સામાન્ય નાગરિકોનો સંપર્ક કરવો તદ્દન અશક્ય બની જશે.
સિસ્ટમ અને સેટિંગ્સની વિગત
જો તમારી પાસે વોટ્સએપનું લેટેસ્ટ અપડેટેડ વર્ઝન અવેલેબલ છે, તો આ ફીચર લાઇવ થતાં જ તમે ખૂબ જ સરળ સ્ટેપ્સ અનુસરીને તેને એક્ટિવેટ કરી શકશો:
Settings > Account > Username
ઉપર દર્શાવેલા પાથ પર જઈને તમે તમારી મનપસંદ આઈડી સુરક્ષિત કરી શકો છો. આવનારા થોડા મહિનાઓમાં આ પ્રાઇવસી સ્ટ્રેટેજી વિશ્વના તમામ એન્ડ્રોઇડ અને આઇઓએસ (iOS) યૂઝર્સ સુધી સત્તાવાર રીતે પહોંચાડી દેવામાં આવશે.
આ પણ વાંચો : Apple Product Price Hike: મોંઘા થયા એપલ પ્રોડક્ટ્સ!, ભાવવધારો જાણી ઉડી જશે તમારા હોશ
