સરકાર અને મેટા વચ્ચે હાઈ-લેવલ બેઠક

મિનિસ્ટ્રી ઓફ ઈલેક્ટ્રોનિક્સ એન્ડ ઈન્ફોર્મેશન ટેકનોલોજી (MeitY)ના ઉચ્ચ અધિકારીઓએ આ મામલે મેટાની ટીમ સાથે એક મહત્વની બેઠક યોજી હતી. સરકારે અગાઉ વોટ્સએપને એક નોટિસ (Notice) મોકલીને આ ફીચર અંગે ગંભીર સવાલો ઉઠાવ્યા હતા, જેના સંદર્ભમાં આ બેઠક બોલાવવામાં આવી હતી. બેઠકમાં સરકારી અધિકારીઓએ મેટા સમક્ષ પોતાની ચિંતાઓ સ્પષ્ટ કરી હતી. સૂત્રોના જણાવ્યા અનુસાર, સરકારને ડર છે કે જો પૂરતી સુરક્ષા વ્યવસ્થા વિના આ ફીચર લોન્ચ કરવામાં આવશે, તો દેશમાં ઓનલાઈન ફ્રોડ (Online Fraud), ફિશિંગ (Phishing), ડિજિટલ અરેસ્ટ (Digital Arrest) અને ઓળખની ચોરી (Identity Theft) જેવા સાયબર ગુનાઓમાં જોરદાર ઉછાળો આવી શકે છે.

મેટાને મળ્યું ૩ દિવસનું અલ્ટીમેટમ

આ બેઠકમાં કોઈ અંતિમ નિર્ણય લેવાયો નથી. સરકારે મેટા કંપની પાસે આ ફીચર અંગે વિગતવાર અહેવાલ (Report) અને સ્પષ્ટતા માંગી છે. કંપનીને પોતાનો સત્તાવાર જવાબ રજૂ કરવા માટે ૩ દિવસની સમયસીમા (Deadline) આપવામાં આવી છે. મેટાના જવાબની સમીક્ષા કર્યા બાદ જ સરકાર આગળનું પગલું ભરશે.

શું છે સમગ્ર વિવાદ?

આ વિવાદ ત્યારે શરૂ થયો જ્યારે કેન્દ્ર સરકારે વોટ્સએપને ભારતમાં આ ફીચર લોન્ચ ન કરવા માટે જણાવ્યું. સરકારની દલીલ છે કે મોબાઈલ નંબરના બદલે માત્ર યુઝરનેમથી ચેટ શરૂ કરવાની સુવિધાનો ગુનેગારો ખોટો ફાયદો ઉઠાવી શકે છે. ઠગો કોઈપણ બેંક, સરકારી વિભાગ, જાણીતી કંપની કે સેલિબ્રિટીના નામ સાથે મળતું આવતું નકલી યુઝરનેમ બનાવીને સામાન્ય લોકોને સરળતાથી છેતરી શકે છે. બીજી તરફ, મેટાનું કહેવું છે કે આ ફીચરનો મુખ્ય હેતુ યુઝર્સની ગોપનીયતા વધારવાનો છે. આનાથી લોકો પોતાનો પર્સનલ મોબાઈલ નંબર શેર કર્યા વગર પણ વાતચીત કરી શકશે. કંપનીએ ખાતરી આપી છે કે સેલિબ્રિટીઝ અને સરકારી સંસ્થાઓના યુઝરનેમ સુરક્ષિત (Reserved) રાખવામાં આવશે અને તેને પબ્લિકલી સર્ચ પણ નહીં કરી શકાય.

ટેલિગ્રામ અને સિગ્નલને પણ નોટિસ

સરકારે માત્ર વોટ્સએપ જ નહીં, પરંતુ આવી જ સુવિધા આપતી અન્ય મેસેજિંગ એપ્સ જેવી કે ટેલિગ્રામ (Telegram) અને સિગ્નલ (Signal)ને પણ નોટિસ ફટકારી છે. સરકાર આ પ્લેટફોર્મ્સ પાસેથી પણ જાણવા માંગે છે કે તેમની પાસે યુઝરનેમ ફીચરના દુરુપયોગને રોકવા માટે કેવા સુરક્ષાના પગલાં (Security Measures) ઉપલબ્ધ છે.

આ પણ વાંચો : Google Antitrust Case : Googleને મોટો કાનૂની ઝટકો! એન્ટીટ્રસ્ટ કેસમાં હાર, ચૂકવવો પડશે 4.1 અબજ યુરોનો તોતિંગ દંડ