રીબડા GIDC ખાડામાંથી 4 વર્ષીય બાળક મળી આવ્યું : તાત્કાલિક સારવાર બાદ રાજકોટ હોસ્પિટલમાં ખસેડાયું

પોલીસ-ટ્રસ્ટ-108ની પ્રશંસનીય કામગીરી

ઘટનાની જાણ થતાં જ સ્થાનિક એક સેવાભાવી વ્યક્તિએ તાત્કાલિક 112 (જનરક્ષક પોલીસ)ને જાણ કરી, જેના પગલે ગોંડલ તાલુકા પોલીસ ઘટનાસ્થળે દોડી આવી હતી. સાથે જ 108 ઇમરજન્સી એમ્બ્યુલન્સને પણ જાણ કરવામાં આવી. પસાર થતા ગોંડલના એમ.એમ. ચેરીટેબલ ટ્રસ્ટના સેવાભાવીઓ વિનેશભાઈ જોશી અને ધર્મિષ્ઠાબેન જોશીએ તાત્કાલિક મદદે આગળ આવીને પ્રાથમિક સારવાર આપી. તેમણે બાળકના કપડાં બદલ્યા, સમગ્ર શરીર સાફ કર્યું, મોં અને કાનમાંથી કીડીઓ દૂર કરી અને બાળકને સુરક્ષિત રીતે 108 એમ્બ્યુલન્સમાં બેસાડીને ગોંડલ સિવિલ હોસ્પિટલ ખાતે ખસેડવામાં આવ્યો.

માતા-પિતાને શોધવાનું કામ શરૂ

ગોંડલ સિવિલ હોસ્પિટલમાં બાળકની પ્રાથમિક સારવાર બાદ શિવમ સાર્વજનિક ટ્રસ્ટના સદસ્યોએ હેત વરસાવીને વધુ સારવાર માટે બાળકને રાજકોટની હોસ્પિટલમાં ખસેડવામાં મદદ કરી. બાળકના વાલી-વારસની શોધખોળ માટે ગોંડલ તાલુકા પોલીસના પી.આઈ. ડોડીયા અને તેમની ટીમ સક્રિયપણે કાર્યરત છે.

લોકોએ કામગીરીને બિરદાવી

આ ઘટનામાં ગોંડલ તાલુકા પોલીસની ઝડપી કાર્યવાહી, 108 એમ્બ્યુલન્સ સેવાની તત્પરતા તેમજ એમ.એમ. ચેરીટેબલ ટ્રસ્ટ અને શિવમ સાર્વજનિક ટ્રસ્ટના સેવાભાવીઓની માનવતાભરી કામગીરીને સ્થાનિક લોકોએ ખુલ્લા દિલે પ્રશંસા આપી છે. આવા સમયે સમાજમાં સેવાભાવના અને માનવતાનું ઉદાહરણ જોવા મળ્યું છે.

પોલીસે બાળકના પરિવારની શોધખોળ ચાલુ રાખી છે અને ઘટનાના કારણોની પણ તપાસ હાથ ધરી છે. આ ઘટના બાળકોની સુરક્ષા અને જાગૃતિનું મહત્વ ફરી એક વખત ઉજાગર કરે છે.

આ પણ વાંચો- પ્રેમલગ્નનો કરૂણ અંત : પતિના શંકાશીલ સ્વભાવ અને ધમકીઓથી કંટાળી યુવતીએ ટૂંકાવ્યું જીવન