Dahod : ભીખ માંગવાના બહાને ₹5 લાખની ચોરી, રિક્ષા ચાલકે આપ્યો એક ક્લૂ'ને...

• Dahod : ભીખ માંગવાના બહાને ₹5 લાખની ચોરી, દાહોદ પોલીસે 15 દિવસમાં રકમ પરત અપાવી
• મહિલા ગેંગની અદભુત ચોરી, સીસીટીવી-રિક્ષાચાલકની મદદથી પોલીસે ઝડપી
• દાહોદ એપીએમસીમાં રકઝક કરી ₹5 લાખ લૂંટ્યા, એમપી સરહદેથી આરોપીઓ ઝડપ્યા
• રિક્ષાચાલકની સતર્કતાએ મળી ચોરીની કડી, વેપારીને પાંચ લાખ પરત મળ્યા
• તેરા તુજકો અર્પણ : દાહોદ પોલીસની ઝડપી કાર્યવાહીથી વેપારીને મળી રાહત

Dahod : દાહોદના એપીએમસી માર્કેટમાં 29 ઓક્ટોબરના રોજ એક અજીબોગરીબ ચોરીની ઘટના બની હતી. ભીખ માંગવાના બહાને આવેલી બાળકો સહિતની મહિલાઓની ટોળકીએ વેપારી લોકેશભાઈ ખંડેલવાલની ઓફિસમાં ઘૂસીને હોબાળો મચાવ્યો. કર્મચારીઓને રકઝકમાં ઉલઝાવી રાખી, એક મહિલાએ ચોરીનો લાભ લઈને કબાટમાંથી ₹5 લાખની રોકડ રકમ સાડીમાં છુપાવી લીધી અને ટોળું નીકળી ગયું.

  ઓફિસમાં લાગેલા સીસીટીવી ફૂટેજમાં સમગ્ર ઘટના કેદ થઈ ગઈ હતી. દાહોદ પોલીસે તુરંત તપાસ હાથ ધરી હતી. સીસીટીવી ઉપરાંત શહેરના અન્ય કેમેરાની મદદથી ચોરી કરનારી મહિલાઓ રિક્ષામાં બેસીને ભાગતી દેખાઈ હતી. પોલીસે રિક્ષા ચાલક ભીખાભાઈ દેવડાની પૂછપરછ કરતાં મહત્વનો ખુલાસો થયો. ભીખાભાઈએ જણાવ્યું કે મહિલાઓ તેમની રિક્ષામાંથી ઉતરીને એક ટાટા સફારી ગાડીમાં બેઠી હતી અને તેમણે શંકાસ્પદ હિલચાલને કારણે ગાડીનો નંબર નોંધી લીધો હતો. આ નંબર તપાસની સૌથી મોટી કડી બન્યો હતો.

ટેકનિકલ એનાલિસિસ અને બાતમીના આધારે પોલીસને માહિતી મળી કે આ ગેંગ મધ્યપ્રદેશથી પાછી દાહોદ તરફ આવી રહી છે. ગુજરાત-એમપી સરહદ પર નાકાબંધી કરી પોલીસે ટાટા સફારી સહિત તમામ આરોપી મહિલાઓને ઝડપી પાડી અને ચોરીની પૂરી ₹5 લાખની રકમ કબ્જે કરી લીધી હતી.

આજે “તેરા તુજકો અર્પણ” કાર્યક્રમમાં દાહોદ એસપી રાજકુમાર પાંડવના હસ્તે વેપારી લોકેશભાઈ ખંડેલવાલને ₹5 લાખની રકમ પરત કરવામાં આવી હતી. લોકેશભાઈએ પોલીસની ઝડપી કામગીરીના વખાણ કરતાં આભાર વ્યક્ત કર્યો. તે જ સમયે રિક્ષા ચાલક ભીખાભાઈ દેવડાને પણ મહત્વની માહિતી આપવા બદલ પ્રશસ્તિપત્ર અને પુરસ્કાર આપી સન્માનિત કરવામાં આવ્યા હતા.

અહેવાલ- સાબિર ભાભોર, દાહોદ

આ પણ વાંચો- 10 વર્ષના અથાગ પ્રયત્ન બાદ વિશ્વનું સૌથી મોટું શિવલિંગ તૈયાર, જાણો ક્યાં સ્થપાશે