Aamod તાલુકા પંચાયત વિવાદ : કારોબારી ચેરમેનના પતિના વાયરલ વીડિયો પર કોંગ્રેસના આરોપ, TDO પર બેદરકારીના આક્ષેપ

Aamod સફાઈ કર્મચારી સસ્પેન્ડ કરવાનો શું અર્થ?

ઘટનાની વિગતો અનુસાર, 4 જાન્યુઆરી 2026ના રોજ રવિવારે રજા હોવા છતાં કેતન પટેલે સફાઈ કર્મચારી પાસેથી ચાવી લઈને તાલુકા પંચાયત કચેરી ખોલી અને બાંધકામ સહિત વિવિધ વિભાગોના કોમ્પ્યુટર પર કામ કર્યું હતું. આ વીડિયો વાયરલ થયા બાદ TDOએ માત્ર 8 હજાર પગારવાળા વાલ્મીકી સમાજના સફાઈ કર્મચારી અશોક સોલંકીને સસ્પેન્ડ કરીને સંતોષ માન્યો છે. પરંતુ કોંગ્રેસ અગ્રણીઓના આરોપ છે કે TDOએ કેતન પટેલ સામે કોઈ કાર્યવાહી કરી નથી, જેમને કચેરીમાં કોઈ સત્તાવાર હોદ્દો નથી. આ પહેલા 9 ઓક્ટોબર 2025ના વીડિયોમાં પણ કેતન પટેલ પત્નીની ખુરશી પર બેઠા અને કામ કરતા જોવા મળ્યા હતા, પરંતુ કોઈ કાર્યવાહી થઈ નહોતી.

ટીડીઓની શંકાસ્પદ કામગીરી!

સંદીપ માંગરોલાએ DDOને વીડિયો સાથેની ફરિયાદમાં જણાવ્યું છે કે, "રજાના દિવસે અજાણ્યા વ્યક્તિ સરકારી કોમ્પ્યુટર પર કામ કરે તો તે ચોરી અને અનધિકૃત પ્રવેશનો કેસ બને છે. TDOએ સીધી પોલીસ ફરિયાદ કરવી જોઈએ, પરંતુ તેઓ રાજકીય દબાણમાં છે. જો સફાઈ કર્મચારીને સસ્પેન્ડ કરી શકે તો કેતન પટેલ સામે કેમ નહીં?" આમોદ તાલુકા પંચાયત છેલ્લા ઘણા સમયથી TDO વિના છે અને જંબુસરના TDO ઇન્ચાર્જ તરીકે કામ કરે છે, જેના કારણે વહીવટી ખામીઓ વધી છે.

માનવ અધિકાર આયોગ સુધી પહોંચ્યો મામલો

આ વિવાદ પંથકમાં ટોક ઓફ ધ ટાઉન બન્યો છે. કોંગ્રેસે આ મામલાને માનવ અધિકાર આયોગ, વિકાસ કમિશ્નર અને પોલીસ અધિક્ષક સુધી પહોંચાડ્યો છે. તેઓની માંગ છે કે CCTV ફૂટેજની તપાસ કરી કેતન પટેલ સામે ફોજદારી કાર્યવાહી કરવામાં આવે. જો આમ ન થાય તો વિરોધ વધુ તીવ્ર બનશે. આમોદ પંચાયતમાં સરકારી વહીવટની પારદર્શિતા અને જવાબદારી પર પ્રશ્નો ઉભા થયા છે, જેના કારણે સ્થાનિક લોકોમાં અસંતોષ વધી રહ્યો છે.

આ પણ વાંચો- Civil Hospitalમાં અદ્ભુત બચાવ : 20 દિવસ પહેલા ગળી ગયેલી સેફ્ટી પીન બહાર કાઢી મહિલાનું જીવન બચાવ્યું

અહેવાલ- દિનેશ મકવાણા, ભરૂચ