6 હાઇપ્રોફાઇલ આરોપીની ધરપકડ
એસીબી દ્વારા આપેલા નિવેદન અનુસાર, આ ચર્ચિત કૌભાંડમાં માત્ર રાજકીય નેતા જ નહીં પરંતુ ઉચ્ચ સરકારી અધિકારીઓ અને ખાનગી કંપનીઓના માલિકો સામેલ હતા. ધરપકડ કરાયેલા લોકોમાં દિલ્હીના પૂર્વ જળ મંત્રી સત્યેન્દ્ર કુમાર જૈન, દિલ્હી જળ બોર્ડના પૂર્વ CEO અને IAS અધિકારી ઉદિત પ્રકાશ રાય, જળ બોર્ડના પૂર્વ કન્સેલ્ટન્ટ અંકિત શ્રીવાસ્તવ, M/s AN એન્ટરપ્રાઇઝના માલિક નાગેન્દ્ર યાદવ, M/s યુરોટેક એન્વાયરનમેન્ટ પ્રાઇવેટ લિમિટેડના માલિક રાજા કુમાર કુરા અને M/s સૃજનહારના માલિક પંકજ વર્માનો સમાવેશ થાય છે.
આ સમગ્ર મામલો મે 2024માં નોંધાયેલી FIR સાથે સંબંધિત છે. આ કેસ ભ્રષ્ટાચાર નિવારણ અધિનિયમ, 1988ની વિવિધ કલમો તેમજ ભારતીય દંડ સંહિતા (IPC) ની કલમ 420, 409, 418 અને 120-B હેઠળ દાખલ કરવામાં આવ્યો હતો. દિલ્હી સરકારના વિજિલન્સ ડિરેક્ટોરેટ દ્વારા કરવામાં આવેલી ફરિયાદ બાદ એસીબીએ ઊંડાણપૂર્વક તપાસ શરૂ કરી હતી.
ચોક્કસ કંપનીને ફાયદો પહોંચાડવા ટેન્ડરની શરતોમાં ફેરફાર
ACBની તપાસ અનુસાર, દિલ્હી જળ બોર્ડના સીવેજ ટ્રીટમેન્ટ પ્લાન્ટ (STP) ના અપગ્રેડેશન અને ક્ષમતા વધારવા માટે બહાર પાડવામાં આવેલા ટેન્ડરમાં ભારે ગેરરીતિઓ આચરવામાં આવી હતી. ટેન્ડર પ્રક્રિયામાં એવી તકનીકી શરતો ઉમેરવામાં આવી હતી જેથી અન્ય સ્પર્ધકો બહાર થઈ જાય અને માત્ર એક ખાસ ટેકનોલોજી પ્રોવાઈડર કંપની 'Euroteck Environment Pvt. Ltd.' ને જ તેનો સીધો લાભ મળે.
તપાસ એજન્સીએ દાવો કર્યો છે કે નિયમ મુજબ જે પાઇલટ સ્ટડી કરાવવી જરૂરી હતી તે કરાવવામાં આવી નહોતી. આ ઉપરાંત, તકનીકી વિશિષ્ટતાઓમાં ફેરફાર અને કોરિજેન્ડમ (શુદ્ધિપત્રક) દ્વારા શરતો એવી રીતે બદલવામાં આવી હતી કે જેથી સરકારી તિજોરી પર ભારે નાણાકીય બોજ પડ્યો હતો.
ઇલેક્ટ્રોનિક પુરાવા અને ગુપ્ત બેઠકોનો ખુલાસો
એસીબીએ દાવો કર્યો છે કે ડિજિટલ અને ઇલેક્ટ્રોનિક સાધનોના પૃથ્થકરણ દરમિયાન સરકારી અધિકારીઓ અને ખાનગી વ્યક્તિઓ વચ્ચે ટેન્ડર સંબંધિત દસ્તાવેજો તથા શરતોની આપ-લે થઈ હોવાના પુરાવા મળ્યા છે. ખાનગી પક્ષકારો અને અધિકારીઓ વચ્ચેની આ કથિત મિલીભગતથી એક જ કંપનીના પક્ષમાં નિર્ણય લેવામાં આવ્યો હતો. તપાસ દરમિયાન રાજા કુમાર કુરા, નાગેન્દ્ર યાદવ અને અંકિત શ્રીવાસ્તવ વચ્ચે થયેલી મુલાકાતો અને વાતચીત પણ સામે આવી છે.
₹1.52 કરોડની લાંચ અને મની ટ્રેઇલ
નાણાકીય તપાસમાં ચોંકાવનારો ખુલાસો થયો છે કે કમિશન અને લાંચની રકમ શેલ કંપનીઓ અને મધ્યસ્થી સંસ્થાઓ દ્વારા ટ્રાન્સફર કરવામાં આવી હતી. IAS અધિકારી ઉદિત પ્રકાશ રાય અને તેમના સગાં-સંબંધીઓના બેંક ખાતાઓમાં AN Enterprises દ્વારા આશરે ₹1.52 કરોડ ટ્રાન્સફર કરવામાં આવ્યા હતા. આ રકમનો ઉપયોગ અચળ સંપત્તિ (રિયલ એસ્ટેટ) ખરીદવા માટે થયો હતો.
ACBના સંયુક્ત પોલીસ કમિશનર વિક્રમજીત સિંઘે જણાવ્યું કે તમામ પુરાવાઓના આધારે પૂછપરછ કર્યા બાદ 18 ઓગસ્ટ 2026ના રોજ આ ધરપકડ કરવામાં આવી છે અને આગળની કાનૂની કાર્યવાહી ચાલી રહી છે.
આ પણ વાંચોઃ Batwara 1947 માં સની દેઓલનો ‘ગદર’ વાળો જાદુ કેમ ન ચાલ્યો? શું આ 3 કારણોએ બગાડી ફિલ્મની રમત?
