CNG Price Hike: અમદાવાદ (Ahmedabad) સહિત સમગ્ર ગુજરાતમાં મોંઘવારીનો વધુ એક ફટકો પડ્યો છે. અદાણી ટોટલ ગેસ લિમિટેડ (Adani Total Gas Limited) દ્વારા સીએનજી (CNG) ના ભાવમાં વધારો કરવાની જાહેરાત કરવામાં આવી છે. આ નિર્ણયને કારણે રિક્ષાચાલકો, ટેક્સી ચાલકો અને ખાનગી CNG વાહન ધરાવતા મધ્યમ વર્ગના પરિવારો પર આર્થિક બોજ વધશે.
જાણો કેટલો થયો વધારો
કંપની દ્વારા સીએનજીના ભાવમાં પ્રતિ કિલોએ 1.50 રૂપિયા (Rs. 1.50) નો વધારો કરવામાં આવ્યો છે. આ નવા ભાવ આજથી જ અમલી બની ગયા છે. આંતરરાષ્ટ્રીય બજારમાં ગેસના ભાવમાં થતા ફેરફાર અને સપ્લાય ચેઈનના ખર્ચને ધ્યાનમાં રાખીને આ નિર્ણય લેવાયો હોવાનું મનાય છે.
જાણો તમારા શહેરનો લેટેસ્ટ ભાવ
ગુજરાતના જુદા જુદા જિલ્લાઓમાં ટેક્સ અને ટ્રાન્સપોર્ટેશનના આધારે ભાવમાં તફાવત જોવા મળી રહ્યો છે. રાજ્યના આ મુખ્ય શહેર અમદાવાદ (Ahmedabad) માં સીએનજીનો નવો ભાવ હવે 83.77 રૂપિયા (Rs. 83.77) પ્રતિ કિલો થઈ ગયો છે. વડોદરાના નાગરિકો માટે નવો ભાવ 82.10 રૂપિયા (Rs. 82.10) પ્રતિ કિલો રહેશે. દક્ષિણ ગુજરાતના નવસારીમાં ભાવ સૌથી વધુ એટલે કે 84.45 રૂપિયા (Rs. 84.45) પર પહોંચ્યો છે. ખેડા જિલ્લામાં હવે વાહનચાલકોએ પ્રતિ કિલો 82.86 રૂપિયા (Rs. 82.86) ચૂકવવા પડશે. ઝાલાવાડ પંથકમાં નવો ભાવ 82.61 રૂપિયા (Rs. 82.61) પ્રતિ કિલો નિર્ધારિત કરવામાં આવ્યો છે.
વાહનચાલકોમાં રોષ
સીએનજી એ સામાન્ય રીતે પેટ્રોલ અને ડીઝલ કરતા સસ્તો વિકલ્પ માનવામાં આવે છે, પરંતુ છેલ્લા કેટલાક સમયથી થઈ રહેલા સતત વધારાને કારણે હવે આ તફાવત ઓછો થઈ રહ્યો છે. ખાસ કરીને અમદાવાદ (Ahmedabad) જેવા શહેરોમાં જ્યાં હજારો રિક્ષાઓ (Rickshaws) સીએનજી પર ચાલે છે, ત્યાં ડ્રાઈવરોની દૈનિક આવક પર સીધી અસર પડશે. ટ્રાન્સપોર્ટરોનું કહેવું છે કે જો સીએનજી મોંઘો થશે તો આગામી સમયમાં નૂર ભાડામાં પણ વધારો થઈ શકે છે, જેની અસર અંતે જીવન જરૂરિયાતની ચીજવસ્તુઓના ભાવ પર પડશે.
આ પણ વાંચો: Cylinder Price : જાણો હવે કેટલામાં મળશે ગેસ સિલિન્ડર? મેટ્રો શહેરોમાં કોમર્શિયલ ગેસના ભાવમાં તોતિંગ વધારો
