India Pakistan Tension : ઓપરેશન સિંદૂર પછી, જમ્મુ-કાશ્મીર, પંજાબ, રાજસ્થાનમાં હાઈ એલર્ટ, શાળાઓ બંધ
- જમ્મુ કશ્મીરમાં આવતીકાલે શાળા-કોલેજ બંધ રહેશે
- પાકિસ્તાનના સતત હુમલાને લઈ શાળાઓ બંધના આદેશ
- જમ્મુ-કાશ્મીર, પંજાબ, રાજસ્થાનમાં હાઈએલર્ટ, સ્કૂલ બંધ
ઓપરેશન સિંદૂર પછી, ભારત અને પાકિસ્તાન વચ્ચે તણાવ ચરમસીમાએ છે. પાકિસ્તાન તરફથી LoC પર સતત ગોળીબાર થઈ રહ્યો છે. જેમાં 16 નાગરિકોના મોત થયા છે. ઓપરેશન સિંદૂર પછી, સરહદી રાજ્યો જમ્મુ અને કાશ્મીર, રાજસ્થાન, પંજાબ, ચંદીગઢને હાઇ એલર્ટ પર રાખવામાં આવ્યા છે. પંજાબ પાકિસ્તાન સાથે ૫૩૨ કિમી લાંબી સરહદ ધરાવે છે જ્યારે રાજસ્થાન આશરે ૧,૦૭૦ કિમી લાંબી સરહદ ધરાવે છે. બંને દેશો વચ્ચે ચાલી રહેલા તણાવને ધ્યાનમાં રાખીને, જમ્મુ-કાશ્મીર, પંજાબ અને રાજસ્થાનમાં શાળાઓ બંધ કરી દેવામાં આવી છે.
ઓપરેશન સિંદૂર બાદ ભારત અને પાકિસ્તાન વચ્ચે ચાલી રહેલા તણાવને કારણે જમ્મુ અને કાશ્મીરમાં હાઈ એલર્ટ જાહેર કરવામાં આવ્યું છે. વર્તમાન પરિસ્થિતિને ધ્યાનમાં રાખીને, જમ્મુ, સાંબા, કઠુઆ, રાજૌરી અને પૂંછ જિલ્લાઓમાં આવતીકાલે એટલે કે 9 મેના રોજ તમામ શાળાઓ, કોલેજો અને શૈક્ષણિક સંસ્થાઓ (ખાનગી અને સરકારી) બંધ જાહેર કરવામાં આવી છે.
પંજાબની સરહદે આવેલા જિલ્લાઓમાં શાળાઓ બંધ
પાકિસ્તાન સાથે ચાલી રહેલા તણાવને ધ્યાનમાં રાખીને, પંજાબ પોલીસે તેના તમામ કર્મચારીઓની રજાઓ રદ કરી દીધી છે, જ્યારે રાજ્ય સરકારે છ સરહદી જિલ્લાઓમાં શાળાઓ બંધ કરી દીધી છે. પંજાબના ફિરોઝપુર, પઠાણકોટ, ફાઝિલ્કા, અમૃતસર, ગુરદાસપુર અને તરનતારનની બધી શાળાઓ આગામી આદેશ સુધી બંધ રાખવામાં આવી છે. પંજાબના મંત્રી અમન અરોરાએ જણાવ્યું હતું કે, "પંજાબ પાકિસ્તાન સાથે 532 કિલોમીટર લાંબી સરહદ ધરાવે છે. તેથી, કોઈપણ લશ્કરી તણાવ દરમિયાન પંજાબ સરકારની ભૂમિકા અત્યંત મહત્વપૂર્ણ બની જાય છે. સરહદ નજીકના તમામ જિલ્લાઓને 'હાઈ એલર્ટ' પર રાખવામાં આવ્યા છે. વર્તમાન પરિસ્થિતિને ધ્યાનમાં રાખીને, સરકારે તમામ જાહેર કાર્યક્રમો પણ રદ કર્યા છે."
આ પણ વાંચોઃ Oparation Sindoor: 'આ એ જ દેશ છે જ્યાં લાદેન છુપાયેલો હતો', ઓપરેશન સિંદૂર બ્રિટિશ સંસદમાં પડઘો પડ્યો
રાજસ્થાનમાં પણ બધી શાળાઓ બંધ
રાજસ્થાન સરકારે સરહદી વિસ્તારોમાં તૈનાત તમામ વહીવટી અધિકારીઓ અને પોલીસ કર્મચારીઓની રજાઓ પણ રદ કરી દીધી છે. રાજસ્થાનમાં સાવચેતીના પગલા તરીકે, ચાર સરહદી જિલ્લાઓ - શ્રી ગંગાનગર, બિકાનેર, જેસલમેર અને બાડમેરમાં બધી સરકારી અને ખાનગી શાળાઓ બંધ રાખવામાં આવી છે.