Ahmedabad : કોલ્ડ સ્ટોરેજમાં રાખેલા સાડા પાંચ હજાર કિલો માવા સહિત રૂ. 1.82 કરોડની ખાદ્ય સામગ્રી જપ્ત

અમદાવાદ મ્યુનિસિપલ કોર્પોરેશનના ફૂડ વિભાગની ટીમે શહેરના વિવિધ વિસ્તારોમાં કોલ્ડ સ્ટોરેજમાં રાખવામાં આવેલા સાડા પાંચ હજાર કિલોથી વધુ માવા સહિત રૂ. 1.82 કરોડની ખાદ્ય સામગ્રી જપ્ત કરી છે. જપ્ત કરાયેલી વસ્તુઓના સેમ્પલ લઈને તપાસ માટે મોકલી આપવામાં આવ્યા છે.

આગામી તહેવારોને ધ્યાનમાં રાખીને માવા જેવી ખાદ્ય ચીજોનું કલેક્શન વધ્યું છે. લોકોના આરોગ્યને ધ્યાનમાં રાખીને મહાનગરપાલિકાના ફૂડ વિભાગે કોલ્ડ સ્ટોરેજમાં ચેકિંગ શરૂ કર્યું છે. જે અંતર્ગત કોલ્ડ સ્ટોરેજમાંથી મીઠાઈ બનાવવા માટે રાખવામાં આવેલ 1474 કિલો માવાના સેમ્પલ લઈને ટેસ્ટીંગ માટે મોકલવામાં આવ્યા હતા. તેની કિંમત 3.68 લાખ રૂપિયાથી વધુ છે.

માત્ર મીઠાઈ બનાવવા માટે રાખવામાં આવેલા 3474 કિલો માવાના સેમ્પલ પણ લેવામાં આવ્યા છે અને માવાને સીઝ કરવામાં આવ્યો છે. તેની કિંમત નવ લાખ રૂપિયાથી વધુ છે. આ ઉપરાંત 3.25 લાખની કિંમતના મીઠા માવાના સેમ્પલ લઈને તપાસ માટે મોકલવામાં આવ્યા છે. અન્ય કોલ્ડ સ્ટોરેજમાં 64 હજાર કિલો મીડીયમ ફેટ ક્રીમના સેમ્પલ લઈને તપાસ માટે મોકલવામાં આવ્યા હતા. આ ક્રીમ પણ જપ્ત કરવામાં આવી છે, જેની કિંમત લગભગ 1.62 કરોડ રૂપિયા હોવાનું કહેવાય છે.

મ્યુનિસિપલ કોર્પોરેશનના ફૂડ ડિપાર્ટમેન્ટના જણાવ્યા અનુસાર, શહેરના કોલ્ડ સ્ટોરેજમાંથી એક જ દિવસમાં 72437 કિલો ખાદ્ય પદાર્થોના નમૂના લેવામાં આવ્યા છે.

આ પણ વાંચો : Navratri 2023 : હવે રાત્રે 2 વાગ્યા સુધી ચાલશે મેટ્રો, 10 વાગ્યા પછી દરેક સ્ટેશનેથી 20 મિનિટે ટ્રેન મળશે