મહિલા સુરક્ષા માટે Ahmedabad Police ની મેગા ડ્રાઇવ : સાયન્સ સિટી રોડથી દાસ્તાન સર્કલ સુધી ફૂટ પેટ્રોલિંગ
- Ahmedabad Police : અમદાવાદમાં મહિલાઓની સલામતી માટે સ્પેશિયલ ઓપરેશન, 5 મુખ્ય સ્પૉટ પર ફૂટ પેટ્રોલિંગ અને ચેકિંગ
- ભાડજ-સાયન્સ સિટી રોડ પર મહિલા પોલીસની ખાસ ટીમ: શંકાસ્પદ વ્યક્તિઓ પર કડક નજર
- દધીચી બ્રિજથી દાસ્તાન સર્કલ સુધી પોલીસનો ચક્રવ્યૂહ : મહિલા સુરક્ષા માટે મોટી કાર્યવાહી
- અમદાવાદ પોલીસની “સુરક્ષિત શહેર” ડ્રાઇવ : મહિલા ટીમ સાથે ફૂટ પેટ્રોલિંગ, શંકાસ્પદ વ્યક્તિઓની તપાસ
- રાત્રે પણ મહિલાઓ નિર્ભય : સાયન્સ સિટી, દાસ્તાન સહિત 5 વિસ્તારોમાં પોલીસનો કડક બંદોબસ્ત
અમદાવાદ : મહિલા સુરક્ષાને સૌથી ઉપર મૂકીને અમદાવાદ શહેર પોલીસે (Ahmedabad Police) આજથી શહેરના મુખ્ય અને સંવેદનશીલ વિસ્તારોમાં વિશેષ ડ્રાઇવ શરૂ કરી છે. આ ડ્રાઇવ હેઠળ ખાસ કરીને રાત્રિના સમયે મહિલાઓની સલામતી સુનિશ્ચિત કરવા ફૂટ પેટ્રોલિંગ અને ચેકિંગ પર ભાર મૂકવામાં આવ્યો છે.
આજે સાંજથી શરૂ થયેલી આ સ્પેશિયલ ડ્રાઇવમાં નીચેના પાંચ મુખ્ય વિસ્તારોને લક્ષ્ય બનાવવામાં આવ્યા છે.
- 1. ભાડજ સર્કલથી સાયન્સ સિટી રોડ
- 2. દધીચી બ્રિજ વિસ્તાર
- 3. દાસ્તાન સર્કલ
- 4. મહિલા પૂર્વ પોલીસ સ્ટેશન વિસ્તાર
- 5. મહિલા પશ્ચિમ પોલીસ સ્ટેશન વિસ્તાર
ખાસ કરીને ભાડજ-સાયન્સ સિટી રોડ પર મહિલા પોલીસ કર્મીઓની ટીમ સાથે ફૂટ પેટ્રોલિંગ કરવામાં આવી રહ્યું છે. આ વિસ્તારમાં મોડી રાત્રે કોઈ શંકાસ્પદ વ્યક્તિ કે વાહન જણાય તો તુરંત પૂછતાછ અને જરૂરી કાર્યવાહી કરવાની સૂચના આપવામાં આવી છે.
અમદાવાદ પોલીસ કમિશનર જી.એસ. મલિકના માર્ગદર્શન હેઠળ ચાલી રહેલી આ ડ્રાઇવમાં મહિલા પોલીસ કર્મીઓની ખાસ ટીમો તૈનાત કરવામાં આવી છે જેથી મહિલાઓ કોઈપણ સમસ્યા હોય તો સીધું વાત કરી શકે. પોલીસે જણાવ્યું કે, “છેલ્લા કેટલાક સમયમાં મહિલાઓ સામેની ઘટનાઓને ધ્યાનમાં રાખીને આ વિશેષ ડ્રાઇવ શરૂ કરવામાં આવી છે. શહેરના તમામ મુખ્ય માર્ગો, બ્રિજ અને એકલ-દોકલ જતી મહિલાઓના રૂટ પર પોલીસની હાજરી વધારવામાં આવી છે.”
આ ઉપરાંત પોલીસે નાગરિકોને પણ અપીલ કરી છે કે કોઈ શંકાસ્પદ વ્યક્તિ કે પરેશાની થાય તો તુરંત 100 કે 112 નંબર પર કૉલ કરવો અથવા નજીકની પોલીસ ટીમ સુધી પહોંચવાની સલાહ આપવામાં આવી છે. ઉલ્લેખનિય છે કે, આવી સતત ચેકિંગ અને ફૂટ પેટ્રોલિંગથી શહેરની મહિલાઓમાં સુરક્ષાની ભાવના વધશે.
આ પણ વાંચો- Gir Somnath : રાશન કાર્ડ E-KYC માટે લાંચ લેતા કોમ્પ્યુટર ઓપરેટર સહિત ત્રણ ઝડપાયા