Gujarat Rain: ચોટીલામાં કરા સાથે ધોધમાર વરસાદ, ખેડૂતોનો જીવ તાળવે ચોંટ્યો

અમદાવાદ શહેરમાં સમી સાંજના સુમારે અચાનક ભારે પવન સાથે ધોધમાર વરસાદ વરસવાનો શરૂ થયો હતો. અચાનક ધોધમાર વરસાદ વરસવાનું શરૂ થતા રાહદારીઓને ભારે હાલાકી ભોગવવાનો વારો આવ્યો હતો. તો બીજી તરફ વરસાદને પગલે ઠેર ઠેર પાણીના ખાબોચીયા ભરાઈ જવા પામ્યા હતા. કમોસમી વરસાદના કારણે ખેડૂતોને ભારે હાલાકી ભોગવવાનો વારો આવ્યો હતો.  હાલ કેરીની સીઝન ચાલી રહી છે. ભારે પવનનાં કારણે આંબા પર રહેલ કેરીઓ પડી જતા કેરીના પાકને ભારે નુકસાન થવાની શક્યતાઓ છે. હવામાન વિભાગ દ્વારા આગામી પાંચ દિવસ હજુ પણ કમોસમી વરસાદની આગાહી કરવામાં આવી છે. રાજ્યના અનેક જિલ્લાઓમાં વરસાદી માહોલ છવાયો હતો. ખેડાના ઠાસરા ગામે વૃક્ષ ધરાશાયી થતા બે લોકો દટાયા હતા. જેમાં વૃદ્ધ મહિલાનું મોત નિપજ્યું હતું. જ્યારે એક મહિલાને ગંભીર ઈજાઓ થતા તેને 108 મારફત સારવાર અર્થે ખસેડવામાં આવી હતી.