દિલ્હી-NCRમાં હવા ઝેરી બનતા GRAP-1 લાગુ, 15 વર્ષ જૂના વાહનો ચલાવવા પર પ્રતિબંધ

• GRAP-1 :  દિલ્હી અને એનસીઆરમાં વાયુ પ્રદૂષણની સ્થિતિ ગંભીર બની છે
• દિલ્હી-NCRમાં હવા ઝેરી બનતા GRAP-1 લાગુ કરાયું
• બાંધકામ પર પ્રતિબંધની ચેતવણી અપાઇ 

દિલ્હી અને એનસીઆરમાં વાયુ પ્રદૂષણની સ્થિતિ ગંભીર બની છે. 14 ઓક્ટોબર 2025 ના રોજ દિલ્હીનો એર ક્વોલિટી ઇન્ડેક્સ (AQI) 211 નોંધાતા, સેન્ટ્રલ એર ક્વોલિટી મેનેજમેન્ટ (CAQM) દ્વારા સમગ્ર NCRમાં તાત્કાલિક અસરથી ગ્રેડેડ રિસ્પોન્સ એક્શન પ્લાન (GRAP) નો પ્રથમ તબક્કો (Stage I) લાગુ કરવામાં આવ્યો છે. દિલ્હીની હવા ગુણવત્તાને હવે "ખરાબ" શ્રેણીમાં મૂકવામાં આવી છે.

આ પગલું ભારતીય હવામાન વિભાગ (IMD) અને ભારતીય ટેકનોલોજી સંસ્થા (IITM) ની આગાહીઓના આધારે લેવામાં આવ્યું છે. આ સંસ્થાઓએ સંકેત આપ્યો છે કે આગામી દિવસોમાં પણ પ્રદૂષણનું સ્તર આ જ "ખરાબ" શ્રેણીમાં રહેવાની શક્યતા છે. GRAP પેટા-સમિતિએ વર્તમાન હવા ગુણવત્તા અને હવામાન આગાહીઓની સમીક્ષા કર્યા બાદ આ નિર્ણય પર મહોર મારી છે.

શું છે GRAP-I ? અને ક્યા પગલાં લેવાશે?

ગ્રેડેડ રિસ્પોન્સ એક્શન પ્લાન (GRAP) એ દિલ્હી-NCR માં પ્રદૂષણના સ્તર પ્રમાણે પગલાં લેવા માટેનું માળખું છે. GRAP નો તબક્કો 1 એ AQI 201 થી 300 (ખરાબ શ્રેણી) માટે છે, અને તે હેઠળ નીચે મુજબના પગલાં લેવા ફરજિયાત છે.

બાંધકામ પ્રવૃત્તિઓનું સસ્પેન્શન (ચોક્કસ નિયમો સાથે)

ટ્રાફિક વ્યવસ્થાપન માટે ખાસ પગલાં અમલમાં મૂકવા.

ચોક્કસ પ્રદૂષક ઉદ્યોગોના સંચાલન પર નિયંત્રણો મૂકવા.

GRAP-I:  નાગરિકો માટે CAQMની સલાહ

CAQM એ GRAP-I હેઠળ નાગરિકોને પણ વાયુ પ્રદૂષણ ઘટાડવામાં યોગદાન આપવા માટે નીચેના પગલાં લેવા વિનંતી કરી છે.

વાહન સંબંધિત: વાહનના એન્જિનને ટ્યુન કરાવો, ટાયર પ્રેશર યોગ્ય જાળવો અને અપ-ટુ-ડેટ PUC પ્રમાણપત્રો રાખો. લાલ લાઇટ પર એન્જિન બંધ રાખો.

સફાઈ અને કચરો: કચરો ફેંકવાનું અને ખુલ્લામાં કચરો બાળવાનું સદંતર ટાળો.

જાગૃતિ: ગ્રીન દિલ્હી એપ અથવા અન્ય પ્લેટફોર્મ દ્વારા પ્રદૂષણ ફેલાવતી ગેરકાયદેસર પ્રવૃત્તિઓની જાણ કરો.

પ્રદૂષણ ટાળો: જૂના ડીઝલ/પેટ્રોલ વાહનો (10-15 વર્ષ જૂના) ચલાવવાનું ટાળો અને ફટાકડા ફોડવાનું બંધ કરો.

CAQM નો આ આદેશ ઉત્તર પ્રદેશ, રાજસ્થાન અને હરિયાણાની સરકારોને પણ મોકલવામાં આવ્યો છે.   આ રાજ્યોના ઘણા ભાગો NCR ક્ષેત્રમાં આવે છે. તમામ NCR એજન્સીઓને કડક દેખરેખ રાખીને GRAP હેઠળના પગલાંનો સઘન અમલ કરવા માટે સૂચના આપવામાં આવી છે. પર્યાવરણીય નિષ્ણાતો આ પ્રદૂષણ વધારા માટે વાહનોના ઉત્સર્જન, ઔદ્યોગિક ગતિવિધિઓ અને પડોશી રાજ્યોમાં પરાળ બાળવા જેવી પ્રવૃત્તિઓને જવાબદાર ગણાવે છે.

આ પણ વાંચો:   જીતન રામ માંઝીની પાર્ટી HAM(S)એ તમામ 6 બેઠકો પર ઉમેદવારોના નામ જાહેર કર્યા