Bhavnagar : તલગાજરડા પીએમ શ્રી મોડેલ સ્કૂલ શિક્ષણનું ઉત્તમ મોડેલ, જ્ઞાન સાધના અને નમો સરસ્વતી જેવી સરકારી યોજનાઓનો મળે છે લાભ

શાળામાં 15 સ્માર્ટ ક્લાસરૂમ, આઠ પ્રકારની અદ્યતન લેબ, કમ્પ્યુટર લેબ, વિજ્ઞાન પ્રયોગશાળા, આધુનિક લાઇબ્રેરી, સંગીત રૂમ તેમજ ઇન્ડોર અને આઉટડોર રમતગમતની સુવિધા ઉપલબ્ધ છે.

તલગાજરડા પીએમ શ્રી સ્કૂલ

સ્વચ્છ અને હરિયાળું કેમ્પસ વિદ્યાર્થીઓને ઉત્તમ શૈક્ષણિક વાતાવરણ પૂરું પાડે છે. પીએમ શ્રી યોજના હેઠળ શાળામાં ડિજિટલ શિક્ષણ, પ્રયોગાત્મક અભ્યાસ, બેગલેસ ડે, ટી.એલ.એમ. આધારિત શિક્ષણ અને વિવિધ સહઅભ્યાસિક પ્રવૃત્તિઓ નિયમિત યોજાય છે. જ્ઞાન સાધના અને નમો સરસ્વતી જેવી યોજનાઓનો લાભ પણ વિદ્યાર્થીઓને આપવામાં આવે છે. ગત વર્ષે 350 જેટલા વિદ્યાર્થીઓને મહારાષ્ટ્રના શૈક્ષણિક પ્રવાસે પણ લઈ જવામાં આવ્યા હતા.

ડિજિટલ શિક્ષણ અને આધુનિક લેબથી ઘડાય છે વિદ્યાર્થીઓનું ભવિષ્ય

ગુણવત્તાસભર શિક્ષણ અને આધુનિક સુવિધાઓના કારણે આ સરકારી શાળા ખાનગી શાળાઓને પણ ટક્કર આપી રહી છે. આ વર્ષે શાળા શરૂ થતાં જ તમામ પ્રવેશ પૂર્ણ થઈ ગયા હતા અને અંદાજે 70 વિદ્યાર્થીઓ ખાનગી શાળાઓ છોડીને અહીં અભ્યાસ માટે જોડાયા છે.

વિદ્યાર્થીઓ શૈક્ષણિક ક્ષેત્ર ઉપરાંત રમતગમત અને સાંસ્કૃતિક પ્રવૃત્તિઓમાં પણ સતત સફળતા મેળવી રહ્યા છે. આધુનિક સુવિધાઓ, અનુભવી શિક્ષકો, ડિજિટલ શિક્ષણ અને વિદ્યાર્થીઓના સર્વાંગી વિકાસ માટેની પ્રતિબદ્ધતાના કારણે તલગાજરડાની પીએમ શ્રી મોડેલ સ્કૂલ સમગ્ર મહુવા પંથકમાં સરકારી શિક્ષણની નવી ઓળખ ઉભી કરી રહી છે. જેના કારણે વાલીઓમાં પણ આ શાળા પ્રત્યે વિશ્વાસ સતત વધી રહ્યો છે.

આ પણ વાંચો : Headline 03 PM : વાંચો બપોરના 12 થી બપોરના 3 વાગ્યા સુધીના મહત્વના સમાચાર એક કિલક પર