Vikas સહાયની વિદાય, KLN રાવને સરકારે બનાવ્યા ગુજરાતના ઇન્ચાર્જ DGP
- ગુજરાત પોલીસ વડા વિકાસ સહાય (DGP Vikas Sahay) આજે નિવૃત્ત : પોલીસ ભવનમાં વિદાય સમારંભ
- DGP વિકાસ સહાયનો 6 મહિનાનો એક્સ્ટેન્શન પૂર્ણ: ગુજરાત પોલીસને મળશે નવા વડા
- વિકાસ સહાયની વિદાય : 1989 બેચના IPS અધિકારીની ગૌરવપૂર્ણ સેવા અંતે
- ગુજરાત DGP વિકાસ સહાય નિવૃત્ત : રક્ષાશક્તિ યુનિ.થી લઈને પોલીસ વડા સુધીની સફર
ગુજરાત પોલીસ વડા વિકાસ સહાય (DGP Vikas Sahay) વિદાય સમારંભ વચ્ચે કેએલએન રાવને ઇન્ચાર્જ ડીજીપીની જવાબદારી: ગુજરાત રાજ્ય પોલીસ વિભાગમાં આજે એક યુગનો અંત આવી રહ્યો છે. રાજ્યના ડિરેક્ટર જનરલ ઓફ પોલીસ (DGP) વિકાસ સહાય આજે 31 ડિસેમ્બર 2025ના રોજ નિવૃત્ત થઈ ગયા છે. ખાલી પડેલી જગ્યા ઉપર કે લક્ષ્મીનારાયણ નારાયણ રાવને ઈન્ચાર્જ ડીસીપી તરીકેની જવાબદારી આપવામાં આવી છે. જૂન 2025માં તેમને મળેલું 6 મહિનાનું એક્સ્ટેન્શન આજે પૂર્ણ થઈ રહ્યું છે, અને તેમને વધુ એક્સ્ટેન્શન ન અપાયું હોવાથી તેઓ વિદાય લઈ રહ્યા છે. ગાંધીનગર સ્થિત પોલીસ ભવનમાં આજે તેમનો વિદાય સમારંભ યોજાઈ રહ્યો છે, જેમાં પોલીસ અધિકારીઓ અને કર્મચારીઓ વરદીમાં હાજર રહીને તેમને ગૌરવપૂર્ણ વિદાય આપશે.
વિકાસ સહાય 1989 બેચના અનુભવી IPS અધિકારી છે. તેમણે પોતાની કારકિર્દીની શરૂઆત આણંદ જિલ્લાના સુપરિન્ટેન્ડન્ટ ઓફ પોલીસ (SP) તરીકે કરી હતી. ત્યારબાદ તેમણે અમદાવાદ રૂરલ, સુરત અને અન્ય વિસ્તારોમાં મહત્વની જવાબદારીઓ નિભાવી ચૂક્યા છે. તેમણે ઇન્ટેલિજન્સ બ્યુરો (IB), CID ક્રાઇમ અને ટ્રાફિક જેવા વિભાગોમાં પણ ઉત્કૃષ્ટ કામગીરી કરી છે. વિશેષ રૂપે, તેઓ રક્ષાશક્તિ યુનિવર્સિટીના ડિરેક્ટર જનરલ તરીકે ફરજ બજાવી ચૂક્યા છે, જે દેશની પ્રથમ પોલીસ યુનિવર્સિટી છે અને તેની સ્થાપનામાં તેમનું મોટું યોગદાન છે. આ ઉપરાંત, તેઓએ યુએન પીસકીપિંગ મિશનમાં પણ ભાગ લીધો હતો.
માર્ચ 2023માં વિકાસ સહાયને ગુજરાતના DGP તરીકે નિયુક્ત કરવામાં આવ્યા હતા. તેમના કાર્યકાળમાં પોલીસ વિભાગમાં અનેક સુધારા અને આધુનિકીકરણના પગલાં લેવામાં આવ્યા. તેઓ શાંત અને કડક વહીવટ માટે જાણીતા છે. તેમના નેતૃત્વમાં યુવા પોલીસિંગ પ્રોગ્રામ અને કાયદા-વ્યવસ્થાના મજબૂતીકરણ પર ભાર મૂકવામાં આવ્યો. જૂન 2025માં તેમની નિવૃત્તિના દિવસે જ તેમને 6 મહિનાનું એક્સ્ટેન્શન આપવામાં આવ્યું હતું, જે "પબ્લિક ઇન્ટરેસ્ટ"માં ખાસ કેસ તરીકે મંજૂર કરવામાં આવ્યું.
આજે પોલીસ ભવનમાં વિદાય સમારંભની તૈયારીઓ પૂરજોશમાં કરવામાં આવી હતી. તમામ અધિકારીઓ અને કર્મચારીઓને વરદીમાં હાજર રહેવા સૂચના આપવામાં આવી હતી. આ સમારંભમાં તેમની સેવાઓને યાદ કરીને તેમને સન્માનિત કરવામાં આવશે. વિકાસ સહાયના પરિવારમાં પણ સિવિલ સર્વન્ટ્સની પરંપરા છે – તેમના ભાઈ વિવેક સહાય પશ્ચિમ બંગાળના DGP છે.
વિકાસ સહાયની નિવૃત્તિ પછી ગુજરાત પોલીસને નવા DGP મળવાના છે. ચર્ચાઓમાં ડૉ. કે.એલ.એન. રાવ અને જી.એસ. મલિક જેવા નામો આગળ છે. આ ફેરફારથી પોલીસ વિભાગમાં નવો ઉત્સાહ આવશે અને કાયદા-વ્યવસ્થા વધુ મજબૂત બનશે. સુત્રો પાસેથી મળી રહેલા સમાચાર અનુસાર, કેએલ રાવને ઈન્ચાર્જ ડીજીપી તરીકે નિયુક્ત કરવામાં આવ્યા છે. જોકે, હજું સુધી સરકારે સત્તાવાર આની જાહેરાત કરી નથી.
આ પણ વાંચો- BJPની નવી ટીમમાં ઝોનલ વિભાગ : મહામંત્રીઓની ઝોનવાઇઝ વહેંચણી કરાઇ જાહેર