Fastest T20 century : ઇન્ડિયન પ્રીમિયર લીગ (IPL 2026) ની એલિમિનેટર મેચમાં રાજસ્થાન રોયલ્સ (Rajasthan Royals - RR) ના 15 વર્ષીય યુવા બેટ્સમેન વૈભવ સૂર્યવંશી (Vaibhav Sooryavanshi) એ એવી ધમાકેદાર ઇનિંગ રમી કે સમગ્ર ક્રિકેટ જગત આશ્ચર્યચકિત બની ગયું. સનરાઇઝર્સ હૈદરાબાદ (Sunrisers Hyderabad - SRH) સામે રમાયેલી આ હાઇ-વોલ્ટેજ મેચમાં વૈભવે માત્ર 29 બોલમાં 97 રનની તોફાની ઇનિંગ રમી હતી.

12 છગ્ગા અને 5 ચોગ્ગા સાથે મેદાનમાં મચાવ્યો તોફાન

બુધવારે મુલ્લાનપુર ખાતે રમાયેલી મેચમાં વૈભવ સૂર્યવંશીએ શરૂઆતથી જ આક્રમક બેટિંગ (Aggressive Batting) કરી હતી. તેની ઇનિંગમાં 12 વિશાળ છગ્ગા અને 5 ચોગ્ગાનો સમાવેશ થતો હતો. SRH ના બોલરો સામે તેણે એક પછી એક મોટા શોટ ફટકારીને મેચનો માહોલ બદલી નાખ્યો હતો. સ્ટેડિયમમાં બેઠેલા દર્શકો સતત ઇતિહાસ રચાતો જોવા આતુર હતા.

સૌથી ઝડપી IPL સદીનો રેકોર્ડ તૂટતા તૂટતા રહી ગયો

વૈભવ સૂર્યવંશી IPL ઇતિહાસમાં સૌથી ઝડપી સદી (Fastest Century) ફટકારનાર ખેલાડી બનવાથી માત્ર એક શોટ દૂર રહ્યો. તે 28 બોલમાં 97 રન પર રમતો હતો અને તેને ફક્ત એક મોટા શોટની જરૂર હતી. જોકે, પ્રફુલ હિંગે (Prafull Hinge) ના શોર્ટ બોલ પર તે કેચ આઉટ થતાં ઐતિહાસિક રેકોર્ડ બનતા રહી ગયો. જો વૈભવે 29મા બોલ પર સદી પૂરી કરી હોત તો તે T20 ક્રિકેટમાં સૌથી ઝડપી સદી ફટકારનાર ખેલાડીઓની યાદીમાં ત્રીજા સ્થાને પહોંચી ગયો હોત. સાથે જ તેણે ‘યુનિવર્સ બોસ’ (Universe Boss) તરીકે ઓળખાતા ક્રિસ ગેલ (Chris Gayle) નો IPL નો 13 વર્ષ જૂનો રેકોર્ડ પણ તોડી નાખ્યો હોત.

T20 ક્રિકેટમાં સૌથી ઝડપી સદી ફટકારનાર ખેલાડીઓ

હાલ T20 ક્રિકેટમાં સૌથી ઝડપી સદીનો રેકોર્ડ એસ્ટોનિયાના (Estonia) બેટ્સમેન સાહિલ ચૌહાણ (Sahil Chauhan) ના નામે છે. તેણે 2024માં સાયપ્રસ (Cyprus) સામે માત્ર 27 બોલમાં સદી ફટકારી હતી. ભારતીય ક્રિકેટમાં ઉર્વિલ પટેલ (Urvil Patel) અને અભિષેક શર્મા (Abhishek Sharma) એ 28 બોલમાં સદી ફટકારીને સંયુક્ત રીતે બીજું સ્થાન મેળવ્યું છે. જ્યારે તુર્કીના (Turkey) બેટ્સમેન મુહમ્મદ ફહાદ (Muhammad Fahad) એ 2025માં બલ્ગેરિયા (Bulgaria) સામે 29 બોલમાં સદી ફટકારી હતી.

IPL માં હજુ પણ ક્રિસ ગેલ ટોચ પર

IPL ઇતિહાસમાં સૌથી ઝડપી સદીનો રેકોર્ડ હજુ પણ ક્રિસ ગેલ પાસે છે. રોયલ ચેલેન્જર્સ બેંગ્લોર (Royal Challengers Bengaluru - RCB) તરફથી રમતા ગેલે 2013માં પુણે વોરિયર્સ ઇન્ડિયા (Pune Warriors India - PWI) સામે માત્ર 30 બોલમાં સદી ફટકારી હતી. વૈભવ સૂર્યવંશી આ યાદીમાં હવે બીજા ક્રમે પહોંચી ગયો છે. ખાસ વાત એ છે કે IPL 2025માં ગુજરાત ટાઇટન્સ (Gujarat Titans - GT) સામે તેણે માત્ર 35 બોલમાં સદી ફટકારી હતી.

ભારતીય ક્રિકેટને મળ્યો નવો સુપરસ્ટાર

વૈભવ સૂર્યવંશી ભલે ક્રિસ ગેલનો રેકોર્ડ તોડી શક્યો નહીં હોય, પરંતુ 15 વર્ષની નાની ઉંમરે એલિમિનેટર જેવી દબાણભરી મેચમાં તેણે જે બેટિંગ કરી તે ભારતીય ક્રિકેટ માટે ખૂબ મોટો સંકેત છે. વિશ્વના ટોચના બોલરો સામે તેની નિર્ભય બેટિંગ દર્શાવે છે કે ભારતીય ક્રિકેટને ભવિષ્ય માટે એક નવો સુપરસ્ટાર મળી ગયો છે.

આ પણ વાંચો : IPL 2026 Qualifier 2 : GTની ટીમ આજે Vaibhav Sooryavanshi નામના તોફાન સામે ટકરાશે