પાકિસ્તાનનું આક્રમણ અને પ્રથમ ક્વાર્ટર

કોઈપણ મોટી મેચમાં શરૂઆત ખૂબ જ મહત્વની હોય છે અને આ મેચમાં પાકિસ્તાને બરાબર તે જ કર્યું. પહેલા ક્વાર્ટરમાં પાકિસ્તાનની ટીમે આક્રમક રમત દાખવીને 1-0 ની લીડ મેળવી લીધી હતી. પાછળ પડ્યા બાદ ભારતીય ટીમે આ ક્વાર્ટરની અંતિમ મિનિટોમાં સ્કોર સરભર કરવા માટે પોતાના તમામ પ્રયાસો લગાવી દીધા. ભારતને સતત કેટલાક પેનલ્ટી કોર્નર પણ મળ્યા, પરંતુ પાકિસ્તાનના ડિફેન્સે મજબૂત દિવાલ બનીને ભારતના તમામ પ્રયાસોને નિષ્ફળ બનાવ્યા. આ જ ક્વાર્ટરમાં એક અત્યંત નાટકીય ક્ષણ આવી, જ્યારે ભારતીય ટીમના કેપ્ટન હરમનપ્રીત સિંહે એક અત્યંત શક્તિશાળી શોટ ફટકાર્યો. આ ખતરનાક શોટને રોકવાના પ્રયાસમાં પાકિસ્તાનનો ખેલાડી અબ્દુલ મન્નાન ઈજાગ્રસ્ત થયો હતો. તમામ આક્રમક પ્રયાસો છતાં, ટીમ ઈન્ડિયા ખાતું ખોલાવી શકી નહી અને પ્રથમ ક્વાર્ટરના અંતે પાકિસ્તાન 1-0 થી આગળ રહ્યું.

ભારતની જોરદાર વાપસીથી મેચનું ચિત્ર બદલાયું

પ્રથમ ક્વાર્ટરમાં પાછળ રહી ગયેલી ભારતીય ટીમે બીજા અને ત્રીજા ક્વાર્ટરમાં શાનદાર રમત દેખાડીને મેચનો સંપૂર્ણ રંગ બદલી નાખ્યો હતો. બીજા ક્વાર્ટરની શરૂઆતથી જ ભારતીય ખેલાડીઓ વધુ આક્રમક અંદાજમાં રમતા જોવા મળ્યા અને તેનો ફાયદો પણ તરત જ મળ્યો. યુવા ખેલાડી અભિષેકે પોતાની ઝડપી ચાલ અને કુશળતાનો પરિચય આપતા મહત્વપૂર્ણ ગોલ ફટકારીને સ્કોર 1-1થી સમાન કર્યો, જેના કારણે ટીમમાં નવા આત્મવિશ્વાસનો સંચાર થયો. ત્યારબાદ નીલકાંત શર્માએ પોતાની આંતરરાષ્ટ્રીય કારકિર્દીનો 19મો ગોલ નોંધાવી ભારતને 2-1ની મહત્વપૂર્ણ લીડ અપાવી. હાફટાઈમ સુધીમાં ભારતે મેચ પર મજબૂત પકડ બનાવી લીધી હતી. ત્રીજા ક્વાર્ટરમાં પણ ભારતીય ટીમનું પ્રભુત્વ યથાવત રહ્યું અને સતત દબાણ વચ્ચે પાકિસ્તાની ટીમ સંઘર્ષ કરતી જોવા મળી. આ દરમિયાન સુખજીત સિંહે વધુ એક સુંદર ગોલ કરીને ભારતની સરસાઈ 3-1 સુધી પહોંચાડી દીધી, જેના કારણે મેચમાં ભારતીય ટીમનો દબદબો સ્પષ્ટપણે જોવા મળ્યો.

અંતિમ મિનિટોનો હાઈ-વોલ્ટેજ ડ્રામા

ચોથો અને અંતિમ ક્વાર્ટર બંને ટીમો માટે અત્યંત નિર્ણાયક હતો. ભારતીય ટીમે પોતાની રણનીતિમાં થોડો ફેરફાર કર્યો અને મળેલા પેનલ્ટી કોર્નરનો પૂરો ફાયદો ઉઠાવ્યો. આ વખતે રાજીન્દરે એક જોરદાર ગોલ ફટકારીને સ્કોર 4-1 કરી દીધો. એક સમયે એવું સ્પષ્ટ લાગી રહ્યું હતું કે ટીમ ઇન્ડિયા આ મેચ અત્યંત સરળતાથી એકતરફી જીતી જશે. પરંતુ, હોકીની રમતમાં છેલ્લી સેકન્ડ સુધી બાજી પલટાઈ શકે છે. મેચની અંતિમ મિનિટોમાં પાકિસ્તાને અચાનક જબરદસ્ત વળતો હુમલો કર્યો. તેઓએ ભારતીય ડિફેન્સની ભૂલોનો ફાયદો ઉઠાવીને સતત 2 ગોલ ફટકારી દીધા. સ્કોરબોર્ડ અચાનક 4-3 થઈ ગયું, જેના કારણે મેદાન પર તણાવ અને ઉત્તેજના બંનેમાં જબરદસ્ત વધારો થયો. જોકે, ટીમ ઇન્ડિયાના ડિફેન્ડર્સે આ ભારે દબાણ વચ્ચે પણ પોતાનો સંયમ ગુમાવ્યો નહીં અને પાકિસ્તાનને બરાબરી કરવાની કોઈ જ તક ન આપી. અંતે ભારતે આ હાઈ-વોલ્ટેજ મુકાબલો 4-3 થી પોતાના નામે કરી લીધો અને મેચના 3 પોઈન્ટ મેળવ્યા.

આ પણ વાંચો : ICC Rankings માં ભારતનો ડંકો! માત્ર એક વર્ષમાં વિશ્વની નંબર-1 T20 બોલર બની શ્રી ચારણી