Ahmedabad Rathyatra: નાયબ મુખ્યમંત્રી હર્ષભાઈ સંઘવીનો ભક્તિભાવ, ખલાસીઓના જુસ્સાને આપ્યું સન્માન

પ્રેમ દરવાજાથી રથયાત્રાનો સંગાથ

નાયબ મુખ્યમંત્રીએ પ્રેમ દરવાજા વિસ્તારથી રથયાત્રા સાથે પ્રસ્થાન કર્યું હતું. રથયાત્રાના વાતાવરણમાં ભક્તિ અને દેશભક્તિના સૂર ગુંજી રહ્યા હતા ત્યારે હર્ષભાઈ સંઘવીએ રથ પર બિરાજમાન ભગવાન જગન્નાથ, બહેન સુભદ્રા અને ભાઈ બલરામજીના દર્શન કરી આશીર્વાદ મેળવ્યા હતા. રથયાત્રાના માર્ગ પર હજારોની સંખ્યામાં ઉમટેલા ભક્તો સાથે તેમણે આત્મીયતાથી સંવાદ કર્યો હતો.

ખલાસી ભાઈઓના ઉત્સાહમાં વધારો

રથયાત્રાનું મુખ્ય આકર્ષણ અને પરંપરા એટલે રથ ખેંચતા ખલાસી ભાઈઓ. નાયબ મુખ્યમંત્રીએ આ ખલાસીઓના જુસ્સાને બિરદાવતા તેમના ઉત્સાહમાં અનેરો વધારો કર્યો હતો. તેમણે ખલાસી ભાઈઓ સાથે વાતચીત કરી તેમની પરંપરાગત સેવાને બિરદાવી હતી. તેમણે જણાવ્યું હતું કે, “ભગવાનના રથને ખેંચવો એ એક અલૌકિક સેવા છે, અને આ સેવા કરનાર ખલાસી ભાઈઓ રથયાત્રાની શાન છે.”

Ahmedabad Rathyatra: સુરક્ષા અને વ્યવસ્થાની સમીક્ષા

રથયાત્રામાં કાયદો અને વ્યવસ્થાની સ્થિતિ ચુસ્ત રહે તે માટે નાયબ મુખ્યમંત્રી સતત અધિકારીઓના સંપર્કમાં હતા. તેમણે સુરક્ષા બંદોબસ્તની સરાહના કરતા જણાવ્યું હતું કે, અમદાવાદ પોલીસ અને વહીવટીતંત્રની સજાગતાને કારણે લાખો શ્રદ્ધાળુઓ શાંતિપૂર્ણ રીતે દર્શન કરી રહ્યા છે. રથયાત્રાના સમગ્ર રૂટ પર પોલીસના ચુસ્ત બંદોબસ્ત સાથે તેમણે સુરક્ષાના વિવિધ પાસાઓનું જાત નિરીક્ષણ કર્યું હતું. ભક્તિ અને વ્યવસ્થાના આ સંગમે ૧૪૯મી રથયાત્રાને એક યાદગાર ઘટના બનાવી દીધી છે.

આ પણ વાંચો: Botad: સાળંગપુર BAPS મંદિરમાં રથયાત્રાની ઉજવણી, હજારો હરિભક્તો દર્શન માટે ઉમટી પડ્યા